រយៈពេលជាង៨០ថ្ងៃ នៃការបើកឱ្យដំណើរការលើផ្លូវល្បឿនលឿនភ្នំពេញ-ក្រុងព្រះសីហនុ មាន​យានយន្ត​ធ្វើ​ចរាចរណ៍​សរុបប្រមាណជាង ៨០​ម៉ឺន​គ្រឿងហើយ (៨៣១,០០០គ្រ) ដែល​គិត​ជា​មធ្យម​មាន​យាន​យន្ត​ធ្វើ​ចរាចរណ៍​ប្រមាណ ១ម៉ឺនគ្រឿងក្នុងមួយថ្ងៃ ហើយនៅដំណាច់ឆ្នាំ ឬអំឡុងថ្ងៃបុណ្យឆ្លងឆ្នាំ២០២២-២០២៣​ខាង​មុខ​នេះ នឹងមានកំណើនរថយន្តធ្វើដំណើរកាន់តែច្រើន ដែលអាចឈានដល់ការកកស្ទះនៅច្រកចូលទៀតផង។ នេះ​បើ​តាមការបញ្ជាក់របស់ ឯកឧត្តម ហ៊ាង សុទ្ធាយុត្តិ អគ្គនាយកនៃអគ្គនាយកដ្ឋានបច្ចេកវិទ្យា និង​ទំនាក់​ទំនង​សាធារណៈ នៃក្រសួងសាធារណការ និងដឹកជញ្ជូន បានប្រាប់ឲ្យដឹងនៅថ្ងៃទី២២ ខែធ្នូ ឆ្នាំ២០២២។

ជាមួយគ្នានេះ ឯកឧត្តមបានអំពាវនាវដល់បងប្អូនប្រជាពលរដ្ឋ ដែលប្រើប្រាស់ផ្លូវ​ល្បឿន​លឿនទាំងអស់ សូម​គោរព​ច្បាប់​ចរាចរណ៍ និងសូមប្រើប្រាស់ប្រព័ន្ធបច្ចេកវិទ្យា ដែលក្រសួងសាធារណការ និងក្រុមហ៊ុនផ្លូវ​ល្បឿន​លឿន បាន​បំពាក់​ជូន​ឲ​ប្រើប្រាស់ ឬបង់លុយតាមស្លាកលេខរថយន្តជាមុន តាមរយៈទូរសព្ទដៃ ជាមួយ​ធនាគារ​ណាមួ​យ​ដែល​ជា​ដៃគូ​របស់ក្រសួង ដូចដែលបានជម្រាបជូនជាបន្តបន្ទាប់ ឬប្រើប្រាស់ឧបករណ៍ OBU ដើម្បី​បញ្ចៀស​ការ​កក​ស្ទះ​នៅ​ច្រក​ចូល និងចេញ ពិសេសនៅអំឡុងថ្ងៃបុណ្យឆ្លងឆ្នាំខាងមុខ។ ពីព្រោះការប្រើឧបករណ៍ OBU ឬបង់​លុយ​មុន​នេះ មិនពិបាករងចាំយកកាត ឬអាប់លុយឡើយ។

បើតាម ឯកឧត្តម ហ៊ាង សុទ្ធាយុត្តិ ក្រោយពីក្រសួងបានសហការជាមួយក្រុមហ៊ុនផ្លូវល្បឿនលឿន ក្នុង​ការ​រៀបចំ​ធ្វើ​ស្វ័យ​ប្រវត្តិកម្ម ក្នុងការរៀបចំការទូទាត់ប្រាក់ សម្រាប់ការធ្វើដំណើរលើផ្លូវល្បឿនលឿន ដើម្បី​សម្រួល​ដល់​ការ​ធ្វើ​ដំណើរ​របស់​ប្រជាពលរដ្ឋមក សង្គេតឃើញថា គឺមិនមានបញ្ហាកកស្ទះចរាចរណ៍ លើផ្លូវល្បឿនលឿនទៀតនោះទេ ទោះ​បី​មានយានយន្តច្រើនបានធ្វើចរាចរណ៍លើផ្លូវល្បឿនលឿនភ្នំពេញក្រុងព្រះសីហនុនេះក៏ដោយ។

ឯកឧត្តមគូសបញ្ជាក់ដែរថា សម្រាប់រយៈពេលចុងក្រោយនេះ កំណើនយានយន្តដឹកទំនិញលើផ្លូវល្បឿនលឿន ក៏​មា​ន​ការកើនឡើងគួរឱ្យគត់សំគាល់ បើធៀបទៅនឹងការបើកដំណើរការដំបូង ហើយជាមួយនឹងទំហំនៃការកើនឡើង ​នៃ​ការ​ធ្វើ​ចររាចរណ៍លើផ្លូវល្បឿនលឿនរបស់រថយន្តដឹកទំនិញធន់ធំនេះ និងកាន់តែល្អប្រសើរថែមទៀត ព្រោះ​នឹង​ធ្វើ​ឱ្យ​វិស័យឯកជន និងម្ចាស់យានយន្តឯកជនទទួលបានផលចំណេញកើនឡើង តាមរយៈ​ការ​កាត់​បន្ថយ​ពេលវេលា ចំណេញថវិកា និងកាត់បន្ថយការគ្រោះថ្នាក់ចរាចរណ៍លើដងផ្លូវផងដែរ។ តែទោះជាយ៉ាងណា កំណើន​នេះ នៅតែមានចំនួនតិចនៅឡើយ បើធៀបទៅនឹងការរំពឹងទុក មុនពេលបើកឱ្យដំណើរផ្លូវល្បឿនលឿននេះ។

សូមបញ្ជាក់ថា ផ្លូវល្បឿនលឿន-ភ្នំពេញព្រះសីហនុ ជាផ្លូវរបៀងយុទ្ធសាស្ត្រសំខាន់បំផុតនៅកម្ពុជា ជួយ​កាត់​បន្ថយ​ពេល​វេលា​ធ្វើដំណើរពីរាជធានីភ្នំពេញ ទៅផែសមុទ្រក្រុងព្រះសីហនុ ពីចំនួនប្រាំម៉ោងមកត្រឹមតែពីរម៉ោងប៉ុណ្ណោះ និង​ជួយ​កាត់បន្ថយតម្លៃភស្តុភារកម្មផងដែរ។ ផ្លូវល្បឿនលឿន​នេះសាងសង់ដោយក្រុមហ៊ុន PPSHV Expressway Co., Ltd និងក្រុមហ៊ុនបុត្រសម្ព័ន្ធនៃក្រុមហ៊ុនសាជីវកម្មស្ពានថ្នល់ចិន (CRBC) និងត្រួតពិនិត្យ បច្ចេកទេស​ដោយ​ក្រុម​ហ៊ុន MINCONSULT SDN. BHD. ប្រើរយៈពេលសាងសង់ ៤៨ខែ ចំណាយថវិកាជិត ២ពាន់​លាន​ដុល្លារ​សហរដ្ឋ​អាមេរិក និងបានសម្ពោធបើកឱ្យដំណើរជាផ្លូវការដោយសម្តេចតេជោ ហ៊ុន សែន នាយករដ្ឋ​មន្រ្តី​ នៃ​កម្ពុជា និងលោក លី ខឺឈាង នាយករដ្ឋមន្រ្តីចិន កាលពីថ្ងៃទី០៩ ខែវិច្ឆិកា ២០២២៕ អត្ថបទ៖ ឌី ពៅយី