​បាល់ទាត់៖ ​ក្រុម​តោ​ខៀវ Chelsea បាត់ឱកាស​បី​ពិន្ទុ​ក្នុង​ទឹកដី​ខ្លួនឯង ​ក្រោយពី​បាន​ត្រឹម​ស្មើគ្នា ០-០ ពេល​ទទួលភ្ញៀវ Brighton នៅ Stamford Bridge យប់មិញ​។ ​​ការប្រកួត​រវាង Chelsea និង Brighton យប់មិញ​ធ្វើឡើង​តំណាលគ្នា​ នឹង​សេចក្តីប្រកាស​ដកខ្លួន​ចេញពី European Super League របស់​ក្លិប​អង់គ្លេស​ទាំង ៦ ដែល​រួមមាន Chelsea ដែរ​។

​​Chelsea កំពុងមាន​កៅអី​ស្រាប់​នៅ​វគ្គ​ពាក់កណ្តាល​ផ្តាច់ព្រ័ត្រ UEFA Champions League ដែល​នឹងត្រូវ​ជួប​ជាមួយ Real Madrid​។ ​​Brighton មានឱកាស​ជាច្រើន​នៅ​ចុង​ម៉ោង​ ដោយ​កីឡាករ​បម្រុង Adam Lallana និង Danny Welbeck ដែល​ស៊ុត​បុក​បង្គោល​ទី មុនពេល​ដែល Ben White ទទួលបាន​កាត​លឿង​ទី២ បណ្តេញ​ចេញពី​ការប្រកួត​។ ​​យ៉ាងណាក្តី​ការប្រកួត​បញ្ចប់​ទៅដោយ​លទ្ធផល ០-០ ធ្វើអោយ Chelsea ទទួលបាន​មួយ​ពិន្ទុ​តែ​ឡើងមក​លេខ៤ វិញ​មាន ៥៥ពិន្ទុ​ស្មើគ្នា​ជាមួយ​ក្រុម​លេខ៥ West Ham​។ ​​ចំណែក Brighton មួយ​ពិន្ទុ​នេះ​ទៀត​ធ្វើអោយ​ពួកគេ​នៅ​ឈរ​លេខ ១៦ ដដែល​តែ​គម្លាត​ពី​តំបន់​គ្រោះថ្នាក់ ៧ពិន្ទុ​។ ​Chelsea នឹងត្រូវ​ជួប West Ham ថ្ងៃ​សៅរ៍​នេះ ខណៈ Brighton ទៅ​ទឹកដី Sheffield United៕

​អត្ថបទ​៖​នាង សុភា​វុ​ធ