ភ្នំពេញ៖ ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បាន​បង្ហាញ​នូវ​ការ​ពឹង​ចំពោះ​ប្រទេសចិន នឹងជួយធ្វើឲ្យសេដ្ឋកិច្ចរបស់ប្រទេសកម្ពុជា កាន់តែមានភាពរីកចម្រើន និង​ក្លាយ​​​ជាគំរូ​របស់ប្រទេសក្នុងតំបន់អាស៊ាន។

ក្នុងពិធីបិទវេទិកាវិទ្យាសាស្ត្រស្តីពី ទំនាក់ទំនងកម្ពុជា-ចិន និងរំឭកខួប១០០ព្រះវស្សា កាល​ពី​ល្ងាច​ថ្ងៃ​ទី២២ ខែធ្នូ ឆ្នាំ២០២២ ឯកឧត្តម សុខ ទូច មានប្រសាសន៍ថា កម្ពុជា និងចិន កំពុង​មាន​ទំនាក់​ទំនង​ជាមួយគ្នាលើ ៥ចំណុចធំៗ តាំងពីអតីត បច្ចុប្បន្ន រហូតដល់អនាគត ក្នុង​នោះ​មាន​ប្រវត្តិសាស្ត្រ សេដ្ឋកិច្ច វប្បធម៌ បរិស្ថាន និងពេលទៅថ្ងៃអនាគត ។

ឯកឧត្តមបានបន្តថា ក្នុងចំណោមទាំង៥ចំណុចនេះ គឺផ្នែកសេដ្ឋកិច្ច ដោយចិន​បាន​ជួយ​ធ្វើ​ឲ្យ​កម្ពុជា​មាន​ការ​រីកចម្រើនផងដែរ តាមរយៈការវិនិយោគមកលើវិស័យផ្សេងៗ ហើយ​បាន​ធ្វើ​ឲ្យ​តម្លៃ​អចលន​ទ្រព្យ​នៅ​កម្ពុជា មានការកើនឡើង និងសង្ឃឹមថា នៅពេលចប់កូវីដ-១៩ វិនិយោគគិនចិន នឹង​មក​បណ្ដាកទុកវិនិយោគនៅកម្ពុជាច្រើនឡើងបន្ថែមទៀត។

ជាមួយនេះ ឯកឧត្តមបណ្ឌិតសភាចារ្យ រំពឹងផងដែរ មិត្ត​ចិន​នឹង​ជួយ​ស្ដារ​ដៃ​ព្រែក​តភ្ជាប់​ទៅ​ខេត្ត​កំពត ដើម្បីកម្ពុជាងាយស្រួល ក្នុងការនាំផលិតផលទៅកាន់សមុទ្រ ដែល​ចំណាយ​តិច​លើ​ការ​ដឹក​ជញ្ជូន ជាងការដឹកតាមរថយន្ត និងរថភ្លើង។

គួរបញ្ជាក់ថា បច្ចុប្បន្នព្រះរាជាណាចក្រកម្ពុជា និងសាធារណរដ្ឋប្រជាមានិតចិន កំពុង​អនុវត្ត​នូវ​កិច្ច​​ព្រមព្រៀងពាណិជ្ជកម្មសេរី ដោយកម្ពុជាបាននាំយកនូវផលិតផល ក៏ដូចជា​​កសិផល​មួយ​ចំនួន ទៅកាន់ទីផ្សារចិន ក្នុងនោះមាន អង្ករ ស្វាយកែវរមៀត ចេក និងមៀនប៉ៃលិនជាដើម ៕ អត្ថបទ បាន សុខរិទ្ធិ