ភ្នំពេញ៖ អត្រាសិស្សប្រឡងសញ្ញាបត្រមធ្យមសិក្សាទុតិយភូមិនៅខេត្តកោះកុង ឆ្នាំ២០២២នេះ បានជាប់ជិត៦០ភាគរយ បើធៀបនឹងឆ្នាំកន្លងបានត្រឹមតែ ៤០.៥៦ភាគរយប៉ុណ្ណោះ ពោល​គឺកើនឡើងគួរជាទីមោទកភាពលើគុណភាពអប់រំ។

លោក ង៉ែត ឡឹង ប្រធានមន្ទីរអប់រំ យុវជន ​និងកីឡាខេត្តកោះកុង បាន​ឱ្យដឹងនៅព្រឹកថ្ងៃទី២៣ ខែធ្នូ ក្រោយ​អមដំណើរ​លោកជំទាវអភិបាលខេត្តកាត់លិខិត​លទ្ធផលប្រកាសប្រឡងថា​ ក្នុង​ចំណោម​បេក្ខជន​មានក្នុងបញ្ជីឈ្មោះប្រឡងសរុប ១.០៥៨នាក់ គឺមាន ៥៧២នាក់/ស្រី ៣៣៦នាក់ បាន​ជោគជ័យ​លើការលទ្ធផលប្រឡងបាននិទ្ទេសល្អចំពោះកិច្ចប្រឹងប្រែសិក្សា។

លោក ង៉ែត ឡឹង ក៏បានសម្តែងក្តីត្រេកអរចំពោះអាណាព្យាបាលសិស្ស សម្រាប់អត្រាប្រឡង​ជាប់​របស់សិស្សានុសិស្សឆ្នាំនេះ ​ដោយកើនឡើងទៅ ៥៩.៤៨ភាគរយ ប្រសិនបើធៀបនឹងឆ្នាំ​កន្លង​ទៅ​មានត្រឹមតែ ៤០.៥៦ភាគរយ។ក្នុងនោះអត្រាសិស្សប្រឡង​ជាប់និទ្ទេសAកើនឡើង​បាន១នាក់​បន្ថែមទៀត។

លោកជំទាវ មិថុនា ភូថង អភិបាលខេត្តកោះកុង បានកោតសរសើរចំពោះសិស្សានុសិស្សដែល​ប្រឹងប្រែង​យកចិត្តទុកសិក្សារៀនសូត្ររហូតដល់ពេលបានលទ្ធផលល្អ​ប្រសើរគួរជាទីមោទកភាព​សម្រាប់​មូលដ្ឋានខេត្ត ​និងក្រុមគ្រួសាររបស់ពួកគេ។

លោកជំទាវអភិបាលខេត្តកោះកុង មានជឿជាក់ថា ថ្ងៃអនាគត ខេត្តកោះកុងនឹងមានធនធាន​មនុស្ស​ចំណានៗជាច្រើន ​ដើម្បីចូលរួមអភិវឌ្ឍន៍ខេត្តកាន់​តែរីកចម្រើនទៅមុខ ហើយពួកគេទទួល​បានប្រាក់​ចំណូលខ្ពស់ពីចំណេះដឹងដែលខ្លួនមាន។

លោកជំទាវ អភិបាលខេត្តកោះកុង មិនទាន់កំណត់ពេលវេលាដែលនឹងត្រូវជួបសំណេះ​សំណាល​ជាមួយ​សិស្ស​ប្រឡងជាប់និទ្ទេសAទាំង៥នាក់ខាងលើនេះ។​ អំឡុងពេលថ្ងៃប្រឡង​លោកជំទាវ មិថុនា ភូថង ​បានសន្យាថា «ក្នុងនាមថ្នាក់ដឹកនាំខេត្ត ​នឹងឧបត្ថម្ភថវិកា​ ៤លានរៀល និងកុំព្យូទ័រយួរដៃ ១គ្រឿងបន្ថែមទៀត ​ប្រសិនក្មួយៗ ​ប្រឡងបាននិទ្ទេស A។ មួយវិញទៀតអាចទទួលបានអាហារូបករណ៍ពី​សកលវិទ្យាល័យផ្សេងទៀត ​ផងដែរ»។

ដោយឡែកសិស្សដែលមកពិនិត្យមើលលទ្ធផលនៅវិទ្យាល័យ​ចំណេះបច្ចេកទេសតេជោ ហ៊ុន សែន កោះកុង ​អះអាងថា ពួកគេបានប្រឡងជាប់និទ្ទេសC ហើយពួកខ្លួនពេញចិត្តនឹងលទ្ធផល ​នៅថ្ងៃនេះ ព្រោះថាវាជាកិច្ចខិតខំសិក្សាតាំងពីដើមឆ្នាំរហូតថ្ងៃចេញលទ្ធផលប្រឡង៕អត្ថបទ៖ ឈឹម មករា