ភ្នំពេញ៖ លទ្ធផលប្រឡងបាក់ឌុប សម័យប្រឡង ៥ធ្នូ ឆ្នាំ២០២២ បានបង្ហាញនូវលទ្ធផលជាប់ចំនួន ៧២,៣៣% ​នៃចំនួនបេក្ខជនដែលមានវត្តមានក្នុងការប្រឡង។​ ចំពោះលទ្ធផលនេះ ក្រសួងអប់រំ យុវជន និងកីឡា ​ក៏បានលើកឡើងថា​ លទ្ធផលបាក់ឌុប​ ពុំមែនជាចុងបញ្ចប់នៃការសិក្សានោះទេ។ រីឯសិស្សដែលធ្លាក់បាក់ឌុប ​សូមកុំបាក់ទឹកចិត្ត និងគួរចាប់យកជំនាញ​ រឺសិក្សាថ្នាក់ទី ១២ជាថ្មី ទៅតាមការសម្រេចចិត្តរបស់ខ្លួន។

ក្រោយលទ្ធផលប្រឡងបាក់ឌុប បង្ហាញថា មានបេក្ខជនចំនួន ៧២,៣៣% បានប្រឡងជាប់ ឯកឧត្តម រស់ សុវាចា អ្នកនាំពាក្យក្រសួងអប់រំ ​យុវជន និងកីឡា ​បានផ្ដល់ជាសារណែនាំ​មួយ​ចំនួន​សម្រាប់ទាំងសិស្សដែលបានប្រឡងជាប់ ​និងសិស្សដែលពុំបានប្រឡងជាប់។

ឯកឧត្តមអ្នកនាំពាក្យ លើកឡើងថា​ លទ្ធផលប្រឡងបាក់ឌុបគ្រាន់ជាចំណុចចាប់ផ្ដើមថ្មីមួយ ហើយ​វាពុំមែនជាចុងបញ្ចប់នៃសិក្សានោះទេ​ ព្រោះការសិក្សាជាដំណើរប្រព្រឹត្តទៅពេញមួយជីវិត។ ឯកឧត្តម លើកទឹកចិត្តដល់សិស្សគ្រប់រូបថា ​ក្នុងជីវិតរបស់យើង ​តែងជួបនូវជោគជ័យ បទ​ពិសោធន៍ផ្សេងៗគ្នា ​ហើយយើងត្រូវយកបទពិសោធន៍ទាំង​ឡាយជាមេរៀនជីវិត ដើម្បី​កសាងអនាគត។ ​ក្នុងន័យនេះ​ គឺលើកទឹកចិត្ត ​កុំឱ្យសិស្សបាក់ទឹកចិត្តដោយសារលទ្ធផលប្រឡង។

ចំពោះការ​បន្តដំណើរទៅមុខ ​អ្នកនាំពាក្យលើកឡើងជាសារថា ​ទាំងសិស្សដែលជាប់បាក់ឌុប និង​សិស្សដែលធ្លាក់បាក់ឌុប​ សុទ្ធតែអាចបន្តការសិក្សាបាន។

សម្រាប់​សិស្សធ្លាក់បាក់ឌុប ​គឺចាប់យកការសិក្សា ជំនាញ រឺសិក្សាថ្នាក់ទី ១២ ជាថ្មី ដោយអាស្រ័យ​លើ​គោលបំណង​រៀងៗខ្លួន​ និងត្រូវដឹងច្បាស់ពីពីតម្រូវការជីវិតខ្លួនឯងឱ្យច្បាប់។ ឯកឧត្តម បញ្ជាក់ត្រង់ចំណុចនេះថា ​ការសិក្សាជំនាញ​ ពុំគួរជាជម្រើសទី២នោះទេ។

ចំពោះការបន្តសិក្សាជំនាញ រឺបន្តសិក្សាថ្នាក់ឧត្តម ក្នុងនាមជាអ្នកនាំពាក្យ បានផ្ដល់​ការ​ណែនាំ​បន្ថែមថា ​យុវជនត្រូវមានការពិចារណា ​លើចំណុចមួយចំនួនជាចាំបាច់ ​ក្នុងនោះរួមមានទាំង ការ​យល់​ដឹងពីជំនាញ ​ឧបនិស្ស័យបុគ្គល ​ពិនិត្យមើលលទ្ធភាពផ្ទាល់ខ្លួនដោយរាប់បញ្ចូល​ទាំង​ទីផ្សារការងារផងដែរ។

ជុំវិញការសិក្សាបន្តនេះ ​ក្រសួងអប់រំ តាមរយៈនាយកដ្ឋានជំនាញចំនួន៣ ​ជាប្រចាំបានចុះយុទ្ធនាការ ក្នុង​ការពន្យល់តម្រង់ទិសមុខ​ជំនាញ​ដល់សិស្សថ្នាក់ទី១២​ ទូទាំងប្រទេសដើម្បីបង្កើនការយល់ដឹង​ក្នុង​ការចាប់យកមុខជំនាញ ​អភិវឌ្ឍន៍សង្គម សេដ្ឋកិច្ច៕ អត្ថបទ៖ គឹមហុក