បាល់ទាត់៖ នៅ​ពីមុខ​អ្នកគាំទ្រជាង ​២០០០០​នាក់ និង​ពីមុខ​ប្រធានាធិបតី Joko Widodo ក្រុមបាល់ទាត់​ជម្រើសជាតិ​ឥណ្ឌូនេស៊ីបាន​យកឈ្នះ​ក្រុម​ជម្រើសជាតិ​កម្ពុជា ២​ទល់នឹង​១ ការប្រកួត​កីឡាបាល់ទាត់​ពានរង្វាន់​តំបន់​អាស៊ីអាគ្នេយ៍ នៅ​ពហុ​កីឡដ្ឋាន​ Gelora Bung Karno ទីក្រុង​ហ្សា​ការ​តាល្ងាច​ថ្ងៃទី​២៣ ខែធ្នូ ឆ្នាំ២០២២​។​

​ដោយ​ទើបតែ​ប្រកួត​ដំបូង​ក្នុង​ពូ​ល A ម្ចាស់ផ្ទះ​ឥណ្ឌូនេស៊ីបើក​ការ​នាំមុខ បន្ទាប់​ពី​លេង​បាន​ត្រឹមតែ ​៧​នាទី​ប៉ុណ្ណោះ​ពី​ការ​ស៊ុត​បញ្ចូល​ទី​របស់​កីឡាករ Egy Maulana បន្ទាប់ពី​កីឡាករ Pratama Arhan ប​ញ្ជួ​ន​បាល់​ឱ្យ​។ មួយ​គ្រាប់​នេះ​ធ្វើឱ្យ​អ្នកគាំទ្រ​ឥណ្ឌូ​នេ​ស៊ីរីករាយ​យ៉ាងខ្លាំង​។​ ​ក្រោយមក​ភាព​រីករាយ​ត្រូវបាន​ស្ងប់ស្ងាត់​ទៅវិញ បន្ទាប់ពី​គោព្រៃ​កម្ពុជាតាម​ស្មើ​នៅ​នាទី​ទី​១៦ ពេលដែល​កីឡាករ ​សឿត បារាំង ប​ញ្ជួ​ន​បាល់​ចេញពី​ជ្រុ​ញឱ្យ ​លឹម ពិសុទ្ធ ហើយ​ ពិសុទ្ធ ក៏​ប​ញ្ជួ​ន​ឱ្យ ​បារាំង ​វិញ រួច​ប​ញ្ជួ​ន​ទៅឱ្យ ​សារ៉េត គ្រី​យ៉ា តែ​ត​បញ្ចូល​ទី​បានសម្រេច​។​ ​យ៉ាងណា​ក៏​ដូច​ឥណ្ឌូនេស៊ីដាក់​សម្ពាធ​បន្ថែមរហូត​រកបាន​គ្រាប់​បាល់​នាំមុខ​ជាថ្មីនាទី​ទី​៣៥ ដោយ​កីឡាករ Witan Sulaeman​ ពេលដែល​កីឡាករ Marselino Ferdinan ប​ញ្ជួ​ន​បាល់​ឱ្យ​។ ចប់​តង់​ទី​១ ឥណ្ឌូនេស៊ីនាំមុខ​កម្ពុជា ២​ទល់នឹង​១​។​

​ការប្រកួត​តង់​ទី​២ ទាំង​ម្ចាស់ផ្ទះ និង​ភ្ញៀវសុទ្ធ​មានឱកាស​រៀងៗ​ខ្លួន តែ​ធ្វើ​មិនបាន​សម្រេច​។ ចប់​ការប្រកួត គ្រុឌ​ឥណ្ឌូនេស៊ីឈ្នះ​គោព្រៃ​កម្ពុជា ២​ទល់នឹង​១​។ ​អ្នកចាំទី​កម្ពុជា កែង សុខ​សិលា បញ្ជាក់ថា ​ការប្រកួត​នេះ​ពិតជា​តានតឹង តែ​ត្រូវឱ្យ​បានល្អ​ជាង​នេះ​សម្រាប់​ប្រកួត​បន្ទាប់​។ ​ប្រកួត​បន្ទាប់​ថ្ងៃទី២៦ ខែធ្នូ ព្រុយ​ណេ​ទទួល​ឥណ្ឌូនេស៊ី ខណៈ​កម្ពុជាត្រូវ​ទទួល​ព្រុយ​ណេ​ដែរនៅ​ថ្ងៃទី​២៩ ខែធ្នូ ឆ្នាំ​២០២២ នៅ​ពហុ​កីឡដ្ឋាន​ជាតិ​មរតក​តេ​ជោ រាជធានី​ភ្នំពេញ​៕

អត្ថបទ៖ គង់ ហួន