ភ្នំពេញ៖ នៅសប្តាហ៍ក្រោយនេះ ក្រសួងទេសចរណ៍ និងក្រសួងអប់រំយុវជន និងកីឡានឹងបើកដំណើរការវិទ្យាល័យចំណេះទូទៅបចេ្ចកទេសចំនួន ៤វិទ្យាល័យ ដែលការបើកវិទ្យាល័យនេះនឹងបើកឱកាសឲ្យសិស្សានុសិស្សដែលសិក្សាចប់ថ្នាក់ទី៩ ឡើងទៅគឺអាចជ្រើសរើសចាប់យកជំនាញវិជ្ជាជីវៈបចេ្ចកទេសផ្នែកទេសចរណ៍មួយ សម្រាប់សិក្សាបន្ថែមលើកម្មវិធីសិក្សាចំណេះទូទៅរបស់ក្រសួងអប់រំរហូតដល់ថ្នាក់ទី១២។
បើតាមឯកឧត្តម ទ្រី ឈីវ ទីប្រឹក្សាទេសចរណ៍បានថ្លែងប្រាប់ BTV នៅថ្ងៃទី២៤ ខែធ្នូនេះថា ចាប់ពីឆ្នាំ២០២៣ នេះ ក្រសួងទេសចរណ៍ និងក្រសួងអប់រំយុវជន និងកីឡានឹងចាប់ផ្តើមបើកដំណើរការសាកល្បង វិទ្យាល័យចំណេះទូទៅ បច្ចេកទេសផ្នែកទេសចរណ៍ចំនួន ៤វិទ្យាល័យដំបូងគេរួមមាន៖ វិទ្យាល័យកំពុងឈើទាលនៅតំបន់ប្រាសាទសំបូរព្រៃគុហ៍ខេត្តកំពង់ធំ, មជ្ឈមណ្ឌលកម្ពុជា-ជប៉ុននៅខេត្តសៀមរាប, សាលាសន្តប៉ូលនៅខេត្តតាកែវ និងវិទ្យាល័យជម្ពូវ័ន្តនៅរាធានីភ្នំពេញ។ ឯកឧត្តម ទ្រី ឈីវ បញ្ជាក់ថា សម្រាប់សិស្សានុសិស្សដែលចូលសិក្សាចាប់យកជំនាញវិជ្ជាជីវៈទេសចរណ៍ចាប់ពីថ្នាក់ទី៩ ហើយសិក្សាបានចំនួន ៣ឆ្នាំចប់គឺគាត់អាចប្រឡងយកទទួលសញ្ញាបត្រមធ្យមសិក្សាបច្ចេកទេស ផ្នែកជំនាញទេសចរណ៍ទទួលស្គាល់តាមស្តង់អាស៊ាន ហើយមានតម្លៃស្មើនឹងសញ្ញាបត្របាក់ឌុប។
ឯកឧត្តមបន្តថា តាមរយៈបង្កើតវិទ្យាល័យចំណេះទូទៅបច្ចេកទេសនេះ នឹងបើកឱកាសសិស្សានុសិស្សដែលរៀបចំចប់ថ្នាក់ទី១២ ឬសិស្សានុសិស្សមានសញ្ញាបត្របាក់ឌុប និងមិនមានសញ្ញាបត្របាក់ឌុបគឺអាចចូលបម្រើការងារនានាក្នុងវិស័យទេសចរណ៍ ឬអាចបង្កើតមុខរបរមួយដើម្បីរកចំណូលបាន។ សូមបញ្ជាក់ថា បច្ចុប្បន្នក្រសួងទេសចរណ៍មានសាលារដ្ឋ សាលាអង្គការ និងសាលាឯកជនបានផ្តល់បណ្តុះបណ្តាលជំនាញវិជ្ជាជីវៈនានា ក្នុងវិស័យទេសចរណ៍ចំនួនជាង ២០កន្លែង ក្នុងនោះមានជំនាញវិជ្ជាជីវៈ ៧០មុខជំនាញមានទទួលស្គាល់តាមស្តង់ដារអាស៊ាន ហើយសិស្សមិនមានសញ្ញាបត្របាក់ឌុបក៏អាចចូលសិក្សាបាន៕ អត្ថបទ៖ ស៊ុម សុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
