បាល់ទាត់៖ ការប្រកួតបាល់ទាត់ជម្រើសជើងឯកលីគទី២ កម្ពុជានឹងបន្ដការប្រកួតសន្សំពិន្ទុសប្ដាហ៍ទី៤ នាថ្ងៃទី២៤ ខែតុលាស្អែកនេះ ស្របពេលក្រុមមិនទាន់ស្គាល់ចាញ់ ២ក្រុមគឺសមាគមកីឡាបាល់ទាត់ខេត្តព្រៃវែង និងក្រុមយុវជន U21 កងយោធពលខេមរភូមិន្ទ (ទ័ព) សុទ្ធតែត្រូវជួបក្រុមខ្លាំងដើម្បីស្វែងរកពិន្ទុបន្ថែម។
សមាគមកីឡាបាល់ទាត់ខេត្តព្រៃវែង នឹងត្រូវបើកទ្វារផ្ទះទទួលក្រុមយុវជន U21 ភ្នំពេញក្រោននៅកីឡដ្ឋានខេត្តព្រៃវែង គ្រាដែលក្រុម U21 កងយោធពលខេមរភូមិន្ទ នឹងត្រូវជួបក្រុមម្ចាស់ផ្ទះកោះកុងអែហ្វស៊ី។ នេះគឺជាគូជក់ចិត្តសម្រាប់សប្ដាហ៍ទី៤ ដែលទទួលបានការចាប់អារម្មណ៍ច្រើនពីសំណាក់អ្នកគាំទ្រ។ បច្ចុប្បន្នខេត្តព្រៃវែង និងក្រុម U21 កងយោធពលខេមរភូមិន្ទគឺមាន ៩ពិន្ទុក្នុងដៃក្រោយឈ្នះ ៣ប្រកួតផ្ទួនៗ ស្របពេលក្រុម U21 ភ្នំពេញក្រោន និងកោះកុងអែហ្វស៊ីទើបរកបាន ៦ពិន្ទុប៉ុណ្ណោះ បន្ទាប់ពីឆ្លងកាត់ ៣ប្រកួតឈ្នះ២ និងចាញ់១ប្រកួតដូចគ្នា។ ដូច្នេះចាំមើលតើសប្ដាហ៍នេះក្រុមទាំងពីរ អាចបង្អាក់កំណត់ត្រាក្រុមមិនទាន់ស្គាល់ចាញ់ទាំង ២ បានដែលឬទេ?
ប៉ុន្តែក្នុងម៉ោងដំណាលគ្នាសម្រាប់កម្មវិធីប្រកួតស្អែកនេះ ក៏មានគូពិសេស ៣ប្រកួតផ្សេងទៀតផងដែរ រួមមានក្រុម ISI ដង្កោសែនជ័យត្រូវធ្វើដំណើរទៅតតាំង ជាមួយក្រុមម្ចាស់ផ្ទះខេត្តកំពង់ស្ពឺ ស្របពេលក្រុមជម្រើសខេត្តត្បូងឃ្មុំ ត្រូវបើកទ្វារផ្ទះស្វាគមន៍ក្រុមឬទ្ធីសែន និងក្រុមសៀមរាបអែហ្វស៊ីជួបក្រុមភ្ញៀវខេត្តស្វាយរៀង។ ការប្រកួតនឹងចាប់ផ្ដើមនាវេលាម៉ោង ៣រសៀលដូចៗគ្នា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
