ភ្នំពេញ៖ សិស្សជាច្រើនមកពីបណ្ដារាជធានី-ខេត្តបានមកសិក្សាបន្ថែមនៅសាលារៀនជ័យថាវី ដើម្បីត្រៀមសម្រាប់ការប្រឡងចូលសាកលវិទ្យាល័យមួយចំនួន។ ការមកសិក្សាត្រៀមចូលថ្នាក់សាកលវិទ្យាល័យនេះ គឺសិស្សភាគច្រើនបានមកសិក្សាតាំងពីមុនដឹងលទ្ធផលប្រឡងបាក់ឌុបមកម្ល៉េះ។
សិស្សជាច្រើនដែលទើបតែជាប់ក្នុងការប្រឡងបាក់ឌុបសម័យប្រឡង ៥ធ្នូ ឆ្នាំ២០២២ ពុំបានខ្ជះខ្ជាយពេលវេលានោះទេ។ ជាក់ស្ដែងសិស្សមួយចំនួនមកបណ្ដារាជធានី-ខេត្តបានឡើងមករាជធានីភ្នំពេញ ដើម្បីសិក្សាបន្ថែមនៅសាលាជ័យថាវី ក្នុងគោលដៅប្រឡងចូលសាកលវិទ្យាល័យដូចជា វិទ្យាស្ថានបច្ចេកវិទ្យាកម្ពុជា (តិចណូ) សាលាពេទ្យ និងវិទ្យាស្ថានភាសាបរទេស ( IFL) នៃសាកលវិទ្យាល័យភូមិន្ទភ្នំពេញ។ សាលាទាំងនេះជាសាលាល្បីដែលទាមទារឱ្យមានការប្រឡងចូលប្រកួតប្រជែងគ្នា ព្រោះជារៀងរាល់ឆ្នាំគឺមានបេក្ខជនជាច្រើនប្រកួតប្រជែងគ្នា ដើម្បីមានឱកាសសិក្សាក្នុងសាលាទាំងនេះ។ ការមកសិក្សាបន្ថែមនេះ ជាក់ស្ដែងគឺពុំមែនមានតែសិស្សដែលនៅរាជធានីភ្នំពេញនោះទេ។ សិស្សមកសិក្សាត្រៀមនេះគឺមកពីគ្រប់បណ្ដាខេត្ត ហើយភាគច្រើនពួកគេបានមកសិក្សាត្រៀមការប្រឡងចូលសាលាទាំងនេះ តាំងពីមុនពួកគេដឹងលទ្ធផលប្រឡងបាក់ឌុបមកម្ល៉េះ។
ពួកគេប្ដេជ្ញាថា នឹងព្យាយាមឱ្យអស់ពីសមត្ថភាពដើម្បីសម្រេចឱ្យបានគោលដៅ សិក្សានៅសាកលវិទ្យាល័យដែលជាក្ដីស្រមៃរបស់ខ្លួន។ សម្រាប់ការបង្រៀនបន្ថែមនៅសាលាជ័យថាវីនេះ លោកគ្រូ ជ័យ ថាវី លើកឡើងថា ចំនួនសិស្សជាច្រើនបានមកសិក្សាសម្រាប់ត្រៀមចូលសាលាល្បីទាំងបីនេះ ជាពិសេសកំឡុងថ្ងៃចន្ទដល់ថ្ងៃសុក្រ។ លោកគ្រូបញ្ជាក់ថែមដោយផ្តោតលើសិស្ស ដែលចង់រៀននៅសាលាតិចណូគឺត្រូវរៀនបន្ថែមរហូតដល់ ៤មុខវិជ្ជាឯណោះ។ គួរបញ្ជាក់ថា លទ្ធផលប្រឡងបាក់ឌុបសម័យប្រឡង ៥ធ្នូ ឆ្នាំ២០២២ ទើបតែប្រកាសផ្សព្វផ្សាយកាលពីថ្ងៃទី២២ និងថ្ងៃទី២៣ ខែធ្នូប៉ុណ្ណោះ។ លទ្ធផលបង្ហាញថា សិស្សចំនួន ៩០,៩៥០នាក់បានប្រឡងជាប់ស្មើនឹង ៧២,៣៣% នៃចំនួនបេក្ខជនដែលបានមកប្រឡង៕ អត្ថបទ៖ គឹមហុក
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
