កំពង់ចាម៖ ថ្ងៃទី២៥ ខែធ្នូ ឆ្នាំ២០២២ ឯកឧត្តមបណ្ឌិត ជ្រុន ថេរ៉ាវ៉ាត សមាជិកគណៈកម្មាធិការកណ្តាលគណបក្សប្រជាជនកម្ពុជា អនុប្រធានយុវជនគណបក្សថ្នាក់កណ្តាល និងជាប្រធានជនបង្គោលយុវជនថ្នាក់កណ្តាល ចុះជួយស្រុកព្រៃឈរតំណាងឯកឧត្តមបណ្ឌិត ហ៊ុន ម៉ាណែត និងឯកឧត្តម ឃឹម សិរីវង្ស តំណាងឯកឧត្តម ប៉ាន សូរស័ក្តិ ប្រធានក្រុមការងារចុះជួយស្រុកព្រៃឈរ បានរៀបចំពិធីបញ្ចូលសមាជិក-សមាជិកាបក្សថ្មីជាយុវជនគណបក្សប្រជាជនកម្ពុជា មានអាយុ ១៨-៣៥ឆ្នាំ ចំនួន១,៣៧៥នាក់។

នាឱកាសនោះ ឯកឧត្តមបណ្ឌិត ជ្រុន ថេរ៉ាវ៉ាត មានប្រសាសន៍ថា គិតមកដល់ពេលនេះ គណបក្សប្រជាជនកម្ពុជាមានអាយុកាល ៧១ឆ្នាំ ជាគណបក្សនយោបាយមានភាពចាស់ទុំ និងតម្តល់ផលប្រយោជន៍ជាតិ និងប្រជាជនជាធំ។

ឯកឧត្តមបណ្ឌិត ជ្រុន ថេរ៉ាវ៉ាត បន្តថា ការសម្រេចចិត្តរបស់យុវជន យុវនារីនាពេលនេះ គឺជាការសម្រេចចិត្តដ៏ត្រឹមត្រូវ ដើម្បីចូលរួមបន្តរក្សាសុខសន្តិភាព និងការអភិវឌ្ឍរីកចម្រើនជាមួយគណបក្សប្រជាជនកម្ពុជា ដែលតែងលើកទឹកចិត្តគាំទ្រយុវជន ក្នុងការអភិវឌ្ឍន៍សង្គមជាតិ។

ឯកឧត្តមបណ្ឌិត ជ្រុន ថេរ៉ាវ៉ាត បញ្ជាក់ថា ក្រៅពីគុណបំណាច់ និងការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានពង្រឹងធនធានយុវជន មិនថាចំណេះដឹង និងសមត្ថភាព ដើម្បីជាអ្នកបន្តវេនចូលរួមការអភិវឌ្ឍប្រទេសជាមួយគណបក្សប្រជាជនកម្ពុជាឲ្យកាន់តែរឹងមាំជាងនេះ។

ជាមួយគ្នា ឯកឧត្តមបណ្ឌិត ជ្រុន ថេរ៉ាវ៉ាត បន្ថែមថា បន្ទាប់ពីចូលជាសមាជិកជាមួយគណបក្សប្រជាជនកម្ពុជា យុវជនមានតួនាទីការពារការវាយប្រហារគ្រប់រូបភាពរបស់ជនអគតិ ដែលតែងបំផ្លើស បំភ្លៃ និងបំផ្លាញចំពោះគុណបំណាច់ និងការលះបង់ដ៏កម្ររបស់គណបក្សផងដែរ៕