បាល់ទាត់៖ ក្រុមជម្រើសជាតិកម្ពុជាបានបន្ដការប្រមូលផ្ដុំហ្វឹកហាត់របស់ខ្លួន ក្រោយត្រឡប់មកពីប្រទេសឥណ្ឌូនេស៊ីវិញដើម្បីត្រៀមការប្រកួតបន្ទាប់ នៃពានរង្វាន់បាល់ទាត់ជើងឯកអាស៊ីអាគ្នេយ៍ AFF Mistubishi Electric Cup 2022 ដោយនឹងត្រូវបើកទ្វារពហុកីឡដ្ឋានជាតិមរតកតេជោ ទទួលក្រុមជម្រើសជាតិប្រ៊ុយណេនាថ្ងៃទី២៩ ខែធ្នូ ឆ្នាំ២០២២ សប្ដាហ៍នេះ។
នេះគឺជាការប្រកួតទី៣ ក្នុងពូល A រវាងក្រុមទាំងពីរដែលត្រូវជួបគ្នាលើទឹកដីកម្ពុជា។ សម្រាប់ ២ប្រកួតដំបូងរបស់កម្ពុជាគឺបានយកឈ្នះហ្វីលីពីនក្នុងដី ៣-២ តែសោកស្ដាយបានចាញ់ម្ចាស់ផ្ទះឥណ្ឌូនេស៊ី ២-១។ រីឯ ២ប្រកួតរបស់ប្រ៊ុយណេគឺសុទ្ធតែបរាជ័យ រួមមានចាញ់ក្រុមភ្ញៀវថៃ ៥-០ និងចាញ់ម្ចាស់ផ្ទះហ្វីលីពីន ៥-១។ សម្រាប់ប្រកួតបន្ទាប់នេះគឺជាជំនួបដ៏សំខាន់របស់កម្ពុជា មុនធ្វើការងារធ្ងន់ដោយត្រូវហោះទៅប្រកួតបញ្ចប់ពូល ជាមួយក្រុមម្ចាស់ផ្ទះថៃនាថ្ងៃទី០២ ខែមករា ឆ្នាំ២០២៣ ខាងមុខ។
២ប្រកួតចុងក្រោយនេះត្រូវការឈ្នះដាច់ខាត ដើម្បីមានឱកាសប្រជែងកៅអីវគ្គបន្ដនៃពានរង្វាន់បាល់ទាត់ជើងឯកអាស៊ីអាគ្នេយ៍ឆ្នាំ២០២២។ ប៉ុន្ដែមុនឈានដល់ការប្រកួតក្រុមគោព្រៃកម្ពុជា មានបេក្ខភាពក្នុងពូល A ចំនួន ២គូនឹងត្រូវធ្វើការប្រកួតនៅល្ងាចថ្ងៃទី២៦ ខែធ្នូនេះ រួមមានក្រុមខ្លាំងឥណ្ឌូនេស៊ីជួបក្រុមម្ចាស់ផ្ទះប្រ៊ុយណេ និងក្រុមការងារពារតំណែងជើងឯកថៃជួបក្រុមភ្ញៀវហ្វីលីពីន៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
