កំពង់ចាម៖ នាថ្ងៃទី២៥ ខែធ្នូ ឆ្នាំ២០២២ ឯកឧត្តមបណ្ឌិត ម៉ឹង មករា ប្រធានក្រុមការងារជន​បង្គោល​ចុះជួយស្រុកជើងព្រៃ ខេត្តកំពង់ចាម តំណាង​ឯកឧត្តមបណ្ឌិត ហ៊ុន ម៉ាណែត និងលោកជំទាវ ពេជ ចន្ទមុន្នី បានជួប​សំណេះសំណាល និង​ចែកអំណោយ​ជូន​ប្រជាកសិករ​ចំនួន ១១១៨គ្រួសារ និង​សិស្សវិទ្យាល័យចំនួន ១១១៨នាក់ ស្ថិតក្នុងសហគមន៍កសិករសែនជ័យ ស្រុកជើងព្រៃ ខេត្តកំពង់ចាម។

អំណោយដ៏ថ្លៃថ្លារបស់ឯកឧត្តមបណ្ឌិត ហ៊ុន ម៉ាណែត និងលោកជំទាវ ដែលបានចែកជូន​ប្រជាកសិក​រ​រួមមាន៖ ជីកសិកម្មសម្រាប់បំប៉នស្រូវ ​និងដំណាំ​ផ្លែឈើផ្សេងៗ រីឯសិស្សានុសិស្ស​ម្នាក់ៗ ទទួលបានប៊ិច១ ខ្មៅដៃ៥ ប្រដាប់ខួងខ្មៅដៃ១ ​ជ័រលុប១ បន្ទាត់១​ កាបូបដាក់ប៊ិច១ កាបូបស្ពាយ១ ដបទឹក១ និងសៀវភៅ៥ក្បាល។

ក្នុងឱកាសនោះឯកឧត្តមបណ្ឌិត ម៉ឹង មករា បានពាំនាំ​ការសួរសុខទុក្ខ ​និងការនឹករលឹកពី ឯកឧត្តមបណ្ឌិត ហ៊ុន ម៉ាណែត ​និងលោកជំទាវ ​ដល់ប្រជាកសិករ ​និងសិស្សានុសិស្ស។

ឯកឧត្តម ក៏បានសំណេះសំណាល និងពន្យល់ប្រជាកសិករ និងសិស្សានុសិស្ស អំពីសារៈសំខាន់ និង​ផលប្រយោជន៍ នៃការធ្វើកសិកម្មជាប្រព័ន្ធតាមរយៈសហគមន៍កសិកម្ម ​ជាមួយនឹងវិស័យឯកជន និងស្ថាប័នរដ្ឋដែលពាក់ព័ន្ធ ដើម្បីធានា​បាននូវភាពជោគជ័យ​ក្នុងការប្រកបមុខ​របរ​កសិកម្ម​នៅ​តាមជនបទ។ ការធ្វើកសិកម្មជាប្រព័ន្ធបែបនេះ ​និងជួយកាត់បន្ថយបញ្ហាទុក្ខលំបាកជាច្រើន​របស់​ប្រជាកសិករ ជាពិសេសការចំណាយក្នុងការធ្វើផលិតកម្មកសិកម្ម ​ការខ្វះខាតនូវបច្ចេកទេស ទុន និង​ការធានាបាននូវបរិមាណ​ និងគុណភាព ក្នុងការផ្គត់ផ្គង់កសិផលដល់ទីផ្សារ។

ឯកឧត្តមបណ្ឌិត ម៉ឹង មករា ក៏បានលើកទឹកចិត្តឱ្យសិស្សានុសិស្សដែលមានចំណង់ចំណូល​ចិត្ត​ចំពោះវិស័យកសិកម្ម ​គួរជ្រើសរើសសិក្សាយកមុខវិជ្ជាកសិកម្ម ដើម្បីរួមចំណែក​ជាមួយ​រាជ​រដ្ឋា​ភិបាល ក្នុងការជម្រុញវិស័យកសិកម្មក្នុងប្រទេស ឱ្យកាន់តែមាន​សក្ដានុពល ​និង​កាលានុវត្តភាព​នៃការធ្វើពាណិជ្ជូបនីយកម្មកសិកម្ម ដើម្បីធានាបាននូវសន្តិសុខស្បៀង ​បង្កើនប្រាក់ចំណូល និង​លើកស្ទួយជីវភាព​សេដ្ឋកិច្ចគ្រួសារប្រជាពលរដ្ឋឲ្យកាន់តែប្រសើឡើង។

ឯកឧត្តម បានថ្លែងថា "អ្វីៗអាចសម្រេចទៅបាន ​គឺមកពីកត្តាមនុស្សជាចម្បង​ មនុស្សជាអ្នកគិត មនុស្សជាអ្នកធ្វើ ​បើយើងមានធនធានមនុស្ស ប្រទេសជាតិយើងនឹងមានការអភិវឌ្ឍរីកចម្រើន"។

ឯកឧត្តមបណ្ឌិត បានសង្កត់ធ្ងន់ថា "ដើម្បីធ្វើឲ្យវិស័យកសិកម្មនៅកម្ពុជា​ មានការអភិវឌ្ឍ​រីកចម្រើន ចាំបាច់​ត្រូវមានធនធានមនុស្សដែលមានជំនាញច្បាស់លាស់​លើវិស័យកសិកម្ម ដើម្បីទាក់ទាញ​ស្រូបយក ​ការវិនិយោគលើវិស័យកសិកម្មទាំងក្នុងស្រុក ​និងមកពីបរទេស"។

ក្រុមការងារជនបង្គោលចុះជួយ ស្រុកជើងព្រៃ​ ខេត្តកំពង់ចាម ​ក្រោមការដឹកនាំរបស់ ឯកឧត្ដម​បណ្ឌិត ម៉ឹង មករា និងការចង្អុលបង្ហាញដោយផ្ទាល់ពី ​ឯកឧត្ដមបណ្ឌិត ហ៊ុន ម៉ាណែត ក្រុមការងារ​បានរួម​ចំណែកយ៉ាងច្រើន ​ក្នុងការជួយដល់កិច្ចការមនុស្សធម៌ មានដូចជា​ វិស័យសុខាភិបាល វិស័យ​អប់រំ វិស័យកសិកម្ម និងការកសាងហេដ្ឋារចនាសម្ព័ន្ធ​ ជូនប្រជាពលរដ្ឋនៅជនបទរួមមាន ការ​កសាងផ្លូវថ្នល់ សាលារៀន មន្ទីរពេទ្យ វត្តអារាម ទំនប់ទឹក ​ប្រលាយទឹក ស្រះទឹក ការដាំកូន​ឈើ​លម្អអមសងខាងផ្លូវ ព្រមទាំងហេដ្ឋារចនាសម្ព័ន្ធផ្សេងៗឯទៀត ដើម្បីរួមចំណែកជាមួយ​រាជ​រដ្ឋាភិបាល​ក្នុង​ការកាត់បន្ថយភាពក្រីក្ររបស់ប្រជាពលរដ្ឋនៅតាមជនបទ៕