ភ្នំពេញ៖ ក្នុងឱកាសអបអរសាទរខួបលើកទី២៤ ទិវានយោបាយឈ្នះ ឈ្នះ ខិតជិតមកដល់ ក្រសួង​ការពារជាតិ ចាប់ផ្តើមរៀបចំស្តង់ពិព័រណ៍១៩ស្តង់ ដើម្បីឱ្យប្រជាពលរដ្ឋអាច​អញ្ជើញ​ចូលរួម​ទស្សនា និង​ស្វែងយល់ពីការចូលរួម​អនុវត្ត​នយោបាយឈ្នះ-ឈ្នះ។

នៅថ្ងៃទី២៩ ខែធ្នូនេះ កម្ពុជានឹងប្រារព្ធខួបលើកទី ២៤ ទិវានយោបាយឈ្នះ-ឈ្នះ ​ក្រោមអធិបតីភាព​សម្តេចពិជ័យសេនា ទៀ បាញ់ ឧបនាយករដ្ឋមន្ត្រីរដ្ឋមន្ត្រីក្រសួងការពារជាតិតំណាង​ដ៏​ខ្ពង់ខ្ពស់​សម្តេចតេជោ ហ៊ុន សែន នាយករដ្ឋមន្ដ្រីនៃកម្ពុជា ដើម្បីអបអរសាទរខួបលើកទី២៤ឆ្នាំ​នៃ​ការ​បញ្ចប់សង្រ្គាមស៊ីវិលនៅកម្ពុជា និងការអនុវត្តប្រកបដោយជោគជ័យ​នយោបាយ​ឈ្នះ-ឈ្នះ ​របស់ សម្តេចតេជោ ហ៊ុន សែន។

ក្រុមការងារ ចាប់ផ្តើមរៀបចំស្តង់ពិព័រណ៍ជាបណ្តើរៗ​នៅបរិវេណវិមានឈ្នះ-ឈ្នះ ដែលជា​ទីតាំងប្រារព្ធទិវា ​និងអនុញ្ញាតឲ្យប្រជាពលរដ្ឋចូលរួមកម្សាន្ត និង​ទស្សនាស្តង់ពិព័រណ៍​របស់​កងយោធពលខេមរភូមិន្ទ។

ទន្ទឹមគ្នានេះដើម្បីបង្កភាពសប្បាយរីករាយជាមួយសុខសន្តិភាព​ វិមានឈ្នះ-ឈ្នះ នឹង​មាន​ការបាញ់កាំជ្រួចពីរលើក ​នៅថ្ងៃទី២៩ និងថ្ងៃទី៣១​ នៃ​ថ្ងៃឆ្លង​ឆ្នាំ​សកល សម្រាប់បងប្អូន​ប្រជាពលរដ្ឋ​ដែល​អញ្ជើញ​ទៅកម្សាន្តនៅវិមានឈ្នះ-ឈ្នះផងដែរ៕