​ចិន៖ ខេត្ត Zhejiang របស់​ប្រទេស​ចិន​បាន​រាយការណ៍​ករណី​ឆ្លង​វីរុស​ថ្មី​ជាង ១​លាន​ករណី​កាលពី​ថ្ងៃអាទិត្យ ខណៈ​ចំនួន​នៃ​ករណី​ឆ្លង​កើនឡើង​នៅ​ទូទាំងប្រទេស​។ អាជ្ញាធរ​សុខាភិបាល​ខេត្ត​និយាយថា ចំនួន​អ្នក​ឆ្លង​វីរុស ​Covid-19 ​ថ្មីត្រូវបាន​គេ​រំពឹងថា​នឹង​ឡើងដល់​កម្រិត​ខ្ពស់​នៅមុន​ថ្ងៃបុណ្យ​ចូលឆ្នាំសកល ដែល​តួលេខ​ប្រចាំថ្ងៃ​អាច​ឡើងដល់ ២លាន​។

ប៉ុន្តែ​មជ្ឈមណ្ឌល​គ្រប់គ្រង និង​បង្ការ​ជំងឺ​របស់​ប្រទេស​ចិននិយាយថា ករណី​ឆ្លង​វីរុស COVID-19 ថ្មី​ទូទាំងប្រទេស​បាន​កើនឡើង​ត្រឹមតែ ២,៩៤០ករណី​ប៉ុណ្ណោះ​កាលពី​ថ្ងៃ​សៅរ៍​។ មជ្ឈមណ្ឌល​និយាយថា ករណី​ដែល​បានបញ្ជាក់​នៅ​ខេត្ត Zhejiang មាន​ត្រឹមតែ ២២​ករណីជា​ចំនួន​តិច​ខ្លាំង បើ​ប្រៀបធៀប​ទៅនឹង​តួលេខដែល​ត្រូវបាន​រាយ​ការ​ដោយ រដ្ឋាភិបាល​តំបន់​។​ ​ភាពខុសគ្នា​ដ៏​ច្រើន​ត្រូវបាន​គេ​មើលឃើញ​នៅក្នុង​ការសរុប​របាយ​ការណ៍​ប្រចាំថ្ងៃ ​ដែល​ត្រូវបាន​ចេញផ្សាយ​ដោយ​អាជ្ញាធរ​ជាតិ និង​អាជ្ញាធរ​មូលដ្ឋាន​។ ខេត្ត Zhejiang គឺជា​តំបន់ឧស្សាហកម្ម​ធំ​មួយ​ដែលមាន​ប្រជាជន​ប្រមាណ ៦៥លាន​នាក់ ហើយ​ជា​មូលដ្ឋាន​សម្រាប់​ពាណិជ្ជកម្ម​ជប៉ុន​ជាច្រើន​។​

​មន្ទីរពេទ្យ​ Peking University Third Hospital ជា​មន្ទីរពេទ្យ​ធំ​មួយ​នៅក្នុង​ទីក្រុង​ប៉េកាំង បាន​ចាត់វិធានការ​ជាច្រើន​ដើម្បី​ធានាបាន​នូវ​ការផ្តល់សេវា​ទាន់ពេលវេលា និង​ដោយ​រលូន​សម្រាប់​អ្នកជំងឺ​ដែល​ត្រូវការ​ជំនួយ ដោយ​មន្ទីរពេទ្យ​ដឹងថា​មាន​ភាព​តានតឹង​ពី​ការកើនឡើង​ករណី​ឆ្លង​វីរុស COVID-19 ។ ផ្នែក​សង្គ្រោះបន្ទាន់ និង​ផ្នែក​អ្នកជំងឺ​ក្រៅ​នៃ​មន្ទីរពេទ្យនៅតែ​មើលឃើញ​អ្នកជំងឺ​តម្រង់​ដ៏​វែង ប៉ុន្តែ​គ្រប់ផ្នែក​របស់​មន្ទីរពេទ្យ​កំពុងដំណើរការ​ដោយ​របៀបរៀបរយ​។​ ​ជា​រៀងរាល់ថ្ងៃ​មាន​អ្នកជំងឺ​ជាង ៦០០នាក់​ចូលមក​កាន់​ផ្នែក​សង្គ្រោះបន្ទាន់ ដែល​ភាគច្រើន​ជាម​នុស្សចាស់​៕

អត្ថបទ៖ ប៊ុនថន