កំពង់ឆ្នាំង៖ នៅព្រឹកថ្ងៃទី២៦ ខែធ្នូ ឆ្នាំ២០២២នេះ លោកឧត្តមសេនីយ៍ទោ ខូវ លី ស្នងការនគរបាលខេត្តកំពង់ឆ្នាំង និងលោក ហ៊ីង ភ័ព្វមីនា អភិបាលក្រុងកំពង់ឆ្នាំង បាន​អោយក្រុមការងារសណ្តាប់ធ្នាប់ខេត្តក្រុង ចុះរៀប​ចំ​សណ្តាប់​ធ្នាប់​តាម​ដ​ង​ផ្លូវ​ដែល​អាជីវករ​ បានយកដាក់សម្ភារៈលក់ដូរ ចាប់ពីផ្លូវក្រោយផ្សារលើ រហូតដល់​ផ្សារ​ឆ្នាំង និងបានណែនាំដល់អាជីវករទាំងនោះ អោយចូលរួមថែរក្សាអនាម័យ និង​សណ្តាប់​ធ្នាប់​អោយបានល្អ។

 លោកឧត្តមសេនីយ៍ទោ ខូវ លី បានអោយដឹងថា ដោយមើលឃើញ​នូវ​ការ​កើន​ឡើង​​នូវ​ភាពលក់ដូរអនាធិបតេយ្យតាមដងផ្លូវ ចាប់ពីចំណុចផ្សារលើ ដល់ចំណុច​ផ្សារ​ឆ្នាំង ក្រុងកំពង់ឆ្នាំង និងអនុវត្តតាមការណែនាំរបស់ឯកឧត្តម ស៊ុន សុវណ្ណារិទ្ធិ អភិបាល​​ខេត្តកំពង់ឆ្នាំង លោក និងលោកអភិបាល​ក្រុង​បាន​ចាត់​តាំង​កម្លាំង​នគរបាល​សណ្តាប់ធ្នាប់ខេត្ត និងក្រុង ចុះរៀបចំសណ្តាប់ធ្នាប់តាមផ្លូវមួយចំនួន រួមមាន ផ្លូវមុខ និងក្រោយផ្សារលើ ផ្លូវមន្ទីរពាណិជ្ជកម្ម ផ្លូវពីផ្សារលើទៅផ្សារក្រោម និងផ្លូវមុខផ្សារឆ្នាំងរហូតដល់ប៉ុស្តិនគរបាលផ្សារឆ្នាំង ក្រុងកំពង់ឆ្នាំង។ ការចុះរៀប​ចំ​លើក​នេះ កម្លាំង​នគរបាល​បាន​អោយក្រុ​ម​អាជីវករ​ដែល​លក់​លៀន​លយ​លើ​ផ្លូវ​ទាំង​នោះ ដាក់សម្ភារៈ​លក់​ដូរ​ថយ​អោយ​ចំគំនូស​របស់​ក្រុម​ការងារ​បាន​កំណត់​អោយ​រួច​ហើយ​។ ត្រូវចូលរួមអនុវត្តអោយបានល្អចាប់ពីថ្ងៃនេះតទៅ និងត្រូវសម្អាត​បរិស្ថាន​ជុំវិញ​កន្លែង​លក់ដូរ ឬផ្ទះរបស់ខ្លួនអោយបានស្អាតល្អ និងមិនត្រូវបន្ត​យក​ចំណី​ផ្លូវ​មក​ដាក់​សម្ភារៈលក់ដូរទៀតឡើយ។ ប្រសិនបើនៅតែ​មាន​ការ​កើត​ឡើង​នូវ​ការ​ល្មើស​ជា​មួយ​សណ្តាប់ធ្នាប់ ឬអនាម័យទៀត ក្រុមការងារ​នគរបា​ល​សណ្តាប់​ធ្នាប់​នឹង​អនុវត្តវិធានការរដ្ឋបាលយ៉ាងម៉ឺងម៉ាត់បំផុត។

 គួរបញ្ជាក់ថា នៅតាមដងផ្លូវផ្លូវមុខ និងក្រោយផ្សារលើ ផ្លូវមន្ទីរពាណិជ្ជកម្ម ផ្លូវ​ពី​ផ្សារ​លើ​ទៅផ្សារក្រោម និងផ្លូវមុខផ្សារឆ្នាំងរហូតដល់ភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង តែងតែកើតមានការលក់ដូរលៀនលយចូលមកលើផ្លូវជាដរាបមក ទោះបីក្រុម​ការងារបានរៀបចំជាច្រើនលើកក៏ដោយ។ ក្នុងក្រុមអាជីវករ​លៀន​លយ​ទាំង​នោះ ក៏មានប្រពន្ធ ឬបងប្អូនមន្ត្រីរាជការជាច្រើននាក់ផងដែរ ដែលមិនចូល​រួម​សហការ​រៀបចំ​សណ្តាប់ធ្នាប់នេះ។ ការលក់លៀនលយមកលើផ្លូវ នាំអោយ​មាន​ផល​​ប៉ះពាល់ដល់ការធ្វើចរាចរណ៍ អាចមាន​ករណី​គ្រោះថ្នាក់​ចរាចរណ៍​ដោយ​ចៃដន្យ ធ្វើអោយ​សណ្តាប់​ធ្នាប់​តាម​ដង​ផ្លូវ​ក្លាយ​ជា​អនាធិបតេយ្យ​គ្មាន​របៀប​រៀប​រយ​ទៀត​ផង ៕ ហុង វាស្នា