ភ្នំពេញ៖ នាយកដ្ឋាននគរបាលបង្ការ ពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ នៅព្រឹកថ្ងៃទី២៦ ខែធ្នូ ឆ្នាំ២០២២នេះ បានបន្តសហការជាមួយធនាគារស្ថាបនា ​បើកការធ្វើលំហាត់​សមយុទ្ធពន្លត់អគ្គិភ័យ និងសង្គ្រោះ នៅអគារស្ថាបនា ដែលមាន​ទីតាំងស្ថិតនៅតាមបណ្ដោយ​មហាវិថី​ព្រះនរោត្តម​ ក្នុងខណ្ឌដូនពេញ រាជធានីភ្នំពេញ។

ថ្លែងប្រាប់អ្នកសារព័ត៌មាន ខណៈកំពុងដឹកនាំធ្វើលំហាត់សមយុទ្ធនោះ ឧត្តមសេនីយ៍ឯក នេត វន្ថា ប្រធាននាយកដ្ឋាននគរបាលបង្ការ ​ពន្លត់អគ្គិភ័យ​ និងសង្គ្រោះ លើកឡើងថា ការធ្វើសមយុទ្ធនៅ​ពេល​នេះ គឺដើម្បីឲ្យបុគ្គលិកនៅក្នុងអគារចេះអំពីវិធានការបង្ការ ​និងពន្លត់អគ្គិភ័យបឋម​ដោយ​ខ្លួនឯង និង​ចេះ​ជម្លៀស​ខ្លួនចេញពីកន្លែងកើតហេតុ ​ព្រមទាំងផ្សាភ្ជាប់ជាមួយជំនាញរបស់​សមត្ថកិច្ច​ជាដើម។

ជាមួយគ្នានោះដែរឧត្តមសេនីយ៍ឯក នេត វន្ថា ក៏បានសំណូមពរដល់អ្នកគ្រប់គ្រង​គ្រឹះស្ថាន​មីក្រូហិរញ្ញវត្ថុថ្នាក់ជាតិ ​និងថ្នាក់ក្រោមជាតិទាំងអស់ ​ត្រូវអនុវត្តវិធានការបង្ការ ពន្លត់អគ្គិភ័យនេះ ឲ្យមាន​ប្រសិទ្ធភាពសុវត្ថិភាពខ្ពស់ ​និងត្រូវអនុវត្តតាមច្បាប់បទដ្ឋានគតិយុត្តអគ្គិភ័យ ដែលមានចែង​នៅក្នុង​ប្រទេសកម្ពុជាផងដែរ។

ថ្លែងនៅក្នុងពិធីនោះដែរលោក Kenji Kuroki អនុប្រធាននាយកប្រតិបត្តិ ​នៃធនាគារស្ថាបនា បាន​លើកឡើងថា ​ដោយមើលឃើញពីសារៈសំខាន់ក្នុងការបង្ការ ទប់ស្កាត់ ​និងសង្គ្រោះគ្រោះអគ្គិភ័យ ហេតុដូច្នេះហើយធនាគារស្ថាបនា ​ក៏បានស្នើសុំកិច្ចសហការពីនាយកដ្ឋាន​នគរបាលបង្ការ ពន្លត់​អគ្គិភ័យ និងសង្គ្រោះ ដើម្បីបង្ហាត់បង្ហាញដល់បុគ្គលិករបស់ធនាគារ​ អំពីវិធីសាស្ដ្របង្ការ និង​សង្គ្រោះផ្សេងៗ នៅពេលមានហេតុការណ៍កើតឡើងជាយថាហេតុ។

លោក បន្ដទៀតថា ដោយសារតែអគារធនាគារស្ថាបនា ​មានកម្ពស់រហូតដល់១៩ជាន់ និងជម្រៅទៅ​ក្រោមដី៤ជាន់​ ជាមួយបុគ្គលិកជិត ១,០០០នាក់នោះ ​លោកមើលឃើញថា ការយល់ដឹងអំពីវិធី​សាស្ដ្រ​ទាំងអស់នេះ គឺជារឿងសំខាន់បំផុត។

លោកបញ្ជាក់ថា ​ធនាគារស្ថាបនា ​គឺតែងសហការជាមួយអគ្គស្នងការដ្ឋាននគរបាលជាតិ ដើម្បីធ្វើលំហាត់​សមយុទ្ធនេះជារៀងរាល់ឆ្នាំ។

សូមបញ្ជាក់ថា ក្នុងឆ្នាំ២០២២នេះ មានគ្រោះថ្នាក់អគ្គិភ័យកើតឡើង​នៅទូទាំងប្រទេស ចំនួន​៦១៨លើក លើ៦៧០លើក ថយចុះ៥២លើក ​បើធៀបនឹងរយៈពេលដូចគ្នាឆ្នាំ២០២១។ ក្នុងនោះបានបណ្ដាលឲ្យមនុស្សស្លាប់ ​១៧នាក់ លើ២៤នាក់, របួស ៥៩នាក់ លើ៣៥នាក់, ឆេះផ្ទះចំនួន៦៩៧ខ្នង, តូបចំនួន១០៩។ ដើមចម​ដែលនាំឲ្យមានគ្រោះអគ្គិភ័យនេះ​ គឺបណ្ដាលមកពី អគ្គិសនី ៤១.៥៥ភាគរយ, ប្រើប្រាស់​ភ្លើង ៣៨.២៤ភាគរយ ​និងក្ដាប់មិ​នបាន ២០.២១ភាគរយ៕អត្ថបទ៖ បាន ចក់