​បាល់ទាត់៖ ក្រុមគ្រួសា​រវីរបុរស​បាល់ទាត់​ប្រេ​ស៊ី​ល​លោក Pele បាន​ជួបជុំគ្នា​នៅក្នុង​មន្ទីរពេទ្យ​ដើម្បី​អបអរ​ថ្ងៃបុណ្យ​គ្រី​ស​ស្មាស ស្របពេល​ស្ថានភាព​ជំងឺ​របស់លោក Pele ស្ថិតក្នុង​ស្ថានភាព​វិវឌ្ឍ​កាន់តែ​អាក្រក់​។

​​បុរស​វ័យ ៨២​ឆ្នាំ​រូបនេះ​ត្រូវការ​ការថែទាំ​សុខភាព​របស់គាត់​យ៉ាង​យកចិត្តទុកដាក់​បំផុត ​ពី​ក្រុម​ជំនាញ​ពេទ្យ​ផ្នែក​មហារីក​នៅ​មន្ទីរពេទ្យ Albert Einstein ទីក្រុង Sao Paulo​។​ ​មិន​ត្រឹមតែ​បញ្ហា​ជំងឺ​មហារីក​ក្រពេញ​ប្រូ​ស្តា​ត​ទេ​លោក Pele ក៏មាន​បញ្ហា​បេះដូង​ផងដែរ​។​ ​សារព័ត៌មាន​មួយចំនួន​បាន​ចុះផ្សាយ​ថា ​ជំងឺមហារីក​របស់លោក Pele កំពុង​វិ​វ​ឌ្ឍ​កាន់តែ​ព្រួយបារម្ភ តែ​មិនទាន់​ដល់​ថ្នាក់​សម្រាក​ក្នុង​បន្ទប់សង្គ្រោះបន្ទាន់​នៅឡើយ​ទេ​។​

​​ដោយ​ត្រូវបាន​គេ​ចាត់ទុកថា​ ជា​កីឡាករ​អស្ចារ្យ​បំផុត​ក្នុង​ប្រវត្តិសាស្ត្រ​បាល់ទាត់​លោក Pele ត្រូវបាន​បញ្ជូន​មកកាន់​មន្ទីរពេទ្យ​ជាច្រើនលើក​រួចមកហើយ​ក្នុង​ឆ្នាំ​២០២២ នេះ​។ ​ក្រុមគ្រួសារ​របស់លោក Pele រួមមាន​កូនស្រី​ទាំងពីរ​នាក់ Kely Nascimento និង Flavia Arantes បាន​ច្រានចោល​ព័ត៌មាន​ដែល​ចុះផ្សាយ​ថា​ ស្ថានភាព​ជំងឺ​របស់​ឪពុក​ខ្លួន​ឈាន​ដល់​ដំណាក់កាល​ចុងក្រោយ​នៃ​ជីវិត​ហើយ​៕

​អត្ថបទ​៖​នាង សុភា​វុ​ធ