ភ្នំពេញ៖ គណៈកម្មាធិការប្រយុទ្ធប្រឆាំងផលិតផលក្លែងក្លាយ (គ.ប.ផ.ក) កំពុងរៀបចំសំណុំរឿង បញ្ជូនជនសង្ស័យ​ទៅ​តុលា​ការ ដើម្បីចាត់ការតាមនីតិវិធីច្បាប់ ករណីការលួចបន្លំផលិតគ្រឿង សម្អាង (ឡេ) ម៉ាក់ឈ្មោះ BLACK SHEEP ដែលរឹបអូសវត្ថុតាង ចំនួន ៦តោន នៅក្នុងស្រុក អង្គស្នួល ខេត្តកណ្ដាល។

ក្នុង​សន្និសីទសារព័ត៌មានពាក់ព័ន្ធលទ្ធផលបង្ក្រាបករណីនេះ នៅថ្ងៃទី២៦ ខែធ្នូ ឆ្នាំ២០២២ នាយឧត្តមសេនីយ មៀច សុ​ផា​ន់ណា ប្រធានគណៈកម្មាធិការប្រយុទ្ធប្រឆាំងផលិតផលក្លែង ក្លាយ មានប្រសាសន៍ថា ក្នុងប្រតិបត្តិការនោះ កម្លាំង​ចម្រុះបានរកឃើញផលិតផលគ្រឿងសម្អាង ចំនួន ៦តោន ​មិនធ្លាប់បង្ក្រាបបាននាពេលកន្លងមក ដែល​លួច​ផ​លិ​ត​ស្តុកទុក និងចែកចាយផលិតផលគ្រឿងសម្អាងម៉ាក់ BLACK SHEEP BODY LOTION ក្លែងក្លាយ​គ្មាន​បទ​ដ្ឋាន​បច្ចេ​ក​ទេស និងគ្មានច្បាប់​អនុញ្ញាត​ពីក្រសួងសុខាភិបាល។

ឯកឧត្តម បានបន្តថា ជនសង្ស័យបានលួចបន្លំប្រភព នៃការផលិតឡេម៉ាក់មួយនេះ ជា​ផលិតផលរបស់ប្រទេសថៃ ម​ក​លួច​ផលិត ហើយបានលួចប្រើប្រាស់បុគ្គលិកចំនួន ២៣នាក់ ដែលក្នុងនោះ ក៏មានអនីតិជនផងដែរ ហើយ​ករណី​នេះ គ.ប.ផ.ក នឹងត្រូវបញ្ជូនទៅតុលាការ។

នាយឧត្តមសេនីយ៍ មៀច សុផាន់ណា បានគូសបញ្ជាក់ថា ចំពោះករណីនេះ ក៏មានការ ផាកពិន័យជាថវិកា រួមទាំងបន្ត​ស៊ើ​ប​អង្កេតទ្រព្យសម្បត្តិ របស់ជនសង្ស័យ បើមានពាក់ព័ន្ធនឹង ប្រាក់ទទួលបាន ពីការលក់​ផលិតផល​គ្រឿង​សម្អាង​ក្លែ​ង​ក្លាយ​នេះ ក៏ប្រឈមនឹងការដកហូតផងដែរ។

ឯកឧត្តម បានបន្ថែមថា ការប្រើប្រាស់សម្អាងដែលគ្មានគុណភាព វានឹងបង្កឲ្យមានផល ប៉ះពាល់ ជាច្រើនដល់សុខ​ភា​ព ទាំងក្នុងរយៈពេលខ្លី មធ្យម និងយូរអង្វែង ក្នុងនោះមានបញ្ហាស្បែក និងការ​ជ្រៀបចូល​ទៅ​ក្នុង​រន្ធ​ឈាម​បង្កជា​ជំងឺ​ជា​ច្រើនទៀត។

គួរ​បញ្ជាក់ថា ប្រតិបត្តិការបង្ក្រាបករណីខាងលើធ្វើឡើង កាលពីថ្ងៃទី២១ ខែធ្នូ ឆ្នាំ២០២២ នៅក្នុងបុរីពិភពថ្មីកំបូល៣ ផ្ទះ​លេខ៦២ ៦៣ និង៦៤ ផ្លូវលេខ៨B ស្ថិតក្នុងភូមិត្រពាំងសុក្រំ ឃុំ បែកចាន ស្រុកអង្គស្នួល ខេត្តកណ្ដាល៕អត្ថបទ៖ បាន សុខរិទ្ធិ