សៀមរាប៖ ភ្ញៀវទេសចរជាតិ និងអន្ដរជាតិ​បានដើរលេងកំសាន្ត នៅខេត្ដសៀមរាប​ក្នុង​រយៈពេល​៧​ថ្ងៃ មានប្រមាណជាង ៧ម៉ឺន៦ពាន់នាក់ ដែលក្នុងនោះភ្ញៀវជាតិ ៧០០០០នាក់ និង​ភ្ញៀវ​ទេសចរ​បរទេស​មាន​ចំនួន​៦០២២​នាក់​ផង​ដែរ​។​ ចំនួន​ភ្ញៀវ​ទេសចរ​ដែល​បាន​ដើរ​កម្សាន្ត​មាន​ការ​កើន​ឡើងច្រើន​ជាបន្ដបន្ទាប់នេះ ចាប់ពីថ្ងៃទី១៩ដល់ថ្ងៃទី២៥ខែធ្នូ ឆ្នាំ២០២២ ស្រប​ពេល​ដែល​ប្រទេស​មាន​សន្ដិភាព និងការអភិវឌ្ឍរីកចំរើននូវហេដ្ឋារចនាសម្ព័ន្ធផ្លូវថ្នល់ ដែលផ្តល់ឱកាស អោយ​បង​ប្អូនប្រជាពលរដ្ឋប្រកបមុខរបរ បំពេញការងាររៀងៗខ្លួន មានសេចក្តីសុខ ទូទាំង​ប្រទេស ប្រកបស្នាមញញឹម នឹងភាពកក់ក្តៅ។

ជាមួយគ្នានោះ គោល​នយោបាយ​ចាក់​វ៉ាក់សាំង​កូវីដ-១៩ របស់ រាជរដ្ឋាភិបាលកម្ពុជា ដែល​ជា​យុទ្ធសាស្ត្រ​គន្លឹះ និងជាខ្សែក្រវ៉ាត់ការពារទីមួយ សំខាន់​ជាងគេ ដើម្បីការពារអាយុជីវិតប្រជាជន ក្នុង​ការបង្កើនឲ្យបាននូវភាពស៊ាំក្នុងសហគមន៍ ទប់​ទល់នឹងមេរោគកូវីដ-១៩ រហូត​អាច​បើក​ដំណើរ​ការ​ប្រទេសជាតិពេញលេញលើគ្រប់វិស័យ និង​ការ​រស់នៅតាម​បែប​គន្លង​ប្រក្រតី​ភាព​ថ្មី​ឡើង​វិញដូចបច្ចុប្បន្ននេះ។

យោងតាមទិន្នន័យ របស់​ក្រសួង​ទេសចរណ៍បានអោយដឹងថា ភ្ញៀវទេសចរ ដែល​ចេញ​ដើរ​កម្សាន្ត​នា​សប្ដាហ៍​ចុងខែធ្នូ ចាប់​ពី​ថ្ងៃ​ទី​១៩ ដល់ថ្ងៃទី២៥ ខែធ្នូ ឆ្នាំ២០២២ នៅទូទាំង​ប្រទេស​ទទួល​បាន​ភ្ញៀវ​ទេសចរ សរុបមានចំនួន៤៣៩,០៤៦នាក់ ក្នុងនោះភ្ញៀវជាតិមាន៤០២,៣៤៧នាក់ និងភ្ញៀវ​បរទេស​មាន ៣៦,៦៩៩នាក់៕