កណ្ដាល៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានថ្លែងថា បើ​ខ្លួនធ្វើប៉ូលីស ហើយបែទៅជាជក់គ្រឿងញៀន គឺបង្កហានិភ័យធំណាស់ ខណៈតួនាទីនគបាល គឺ​ជា​អ្នកថែរក្សាសន្តិសុខសណ្តាប់ធ្នាប់ជូនប្រជាពលរដ្ឋ និងសង្គមជាតិនោះ។

ថ្លែងនៅក្នុងពិធីបិទវគ្គសុក្រឹតការថ្នាក់ដឹកនាំនគរបាល កម្រិត១ និងកម្រិត២ ជំនាន់ទី២ នៅ​បណ្ឌិត្យ​សភាន​គរបាលកម្ពុជា ស្ថិតនៅស្រុកកៀនស្វាយ ខេត្តកណ្ដាល នាថ្ងៃទី២៧ ខែធ្នូ ឆ្នាំ​២០២២​នេះ សម្ដេចក្រឡាហោម ស ខេង បានលើកឡើងថា មកដល់ពេលនេះ ការធ្វើ​កំណែ​ទម្រង់​នគរបាល​បាន​ធ្វើជាបន្តបន្ទាប់ ដោយយកចិត្តទុកដាក់ពីថ្នាក់ដឹកនាំក្រសួង ក៏ដូច​ជា​អង្គភាព​ប្រើប្រា​ស់​កម្លាំង ជាពិសេសនោះអង្គភាពបានបណ្តុះបណ្តាលតែម្តង។

សម្ដេច​ក្រឡាហោមបានសង្កត់ធ្ងន់ថា «បើខ្លួនធ្វើប៉ូលីស ខ្លួនបែរជាញៀនគ្រឿងញៀន គឺបង្ករ​នូវហានិភ័យ​ធំ​ណាស់រួចហើយ បង្កើតនូវបញ្ហាផ្សេងទៀត។ យើងដឹងហើយតួនាទីនគរបាល គឺ​ដើម្បី​ថែម​រក្សាសន្តិសុខសណ្តាប់ធ្នាប់ជូនប្រជាពលរដ្ឋ ក្នុងនោះរួមទាំងគ្រឿងញៀន»។

នៅ​ក្នុង​ឱកាសនោះដែរ សម្តេចក្រឡាហោម ស ខេង ក៏បានលើកឡើងផងដែរថា ទាក់ទង​នឹង​ការ​ផ្ទេរ​មន្ត្រី​នគរបាល​ប៉ុស្តិ៍​ក្រសួងមហាផ្ទៃមិនអនុញ្ញាតឲ្យផ្ទេរនោះទេចាប់ពីពេលនេះតទៅ។ ប៉ុន្តែ​ក្នុង​ករណី​ចាំបាច់​លុះត្រាតែមានការអនុញ្ញាតពីរដ្ឋមន្ត្រីក្រសួងមហាផ្ទៃ។ សម្តេចក្រឡាហោមលើកឡើងទៀតថា ការដាក់ចេញវិធានការនេះ គឺជាវិធានការចុងក្រោយដែល​ក្រសួង​បាន​នឹងកំពុងធ្វើការទាក់ទង និង​ការ​ជ្រើសរើស​នឹង​បំពេញ​កំលាំង​នគរបាល​នៅ​តាម​ប៉ុស្តិ៍​មាន​កំលាំង​គ្រប់គ្រាន់ បាន​សិក្សា​រៀន​សូត្រ​មាន​សមត្ថភាព និង​អនុវត្ត​តាម​គោល​នយោបាយ​ភូមិ​ឃុំ​មាន​សុវត្ថិភាព​ នៅ​ក្នុងឃុំសង្កាត់ខ្លួនទទួលបានជោគជ័យ៕ អត្ថបទ៖ បាន ចក់