ភ្នំពេញ៖ អាណាព្យាបាល ដែលមានកូនគ្រប់អាយុ ៦ឆ្នាំ រឺយ៉ាងតិច ៧០ ខែ បានបន្តទៅតាម​សាលារៀន​បឋមសិក្សា ​ដើម្បីចុះឈ្មោះឱ្យពួកគាត់បានសិក្សា។​ ការចុះឈ្មោះចូលរៀននេះ ក៏ស្របពេលដែលការបើកបវេសនកាលឆ្នាំសិក្សាថ្មី ​នឹងចូលមកដល់ថ្ងៃទី២ ​ខែមករា ឆ្នាំ ២០២៣ ខាងមុខនេះ។

វត្តមានអាណាព្យាបាលក្នុងសប្ដាហ៍ចុងក្រោយនៃឆ្នាំ ២០២២នេះ បានបន្តទៅសាលារៀន​ដើម្បី​ចុះឈ្មោះ​ចូលរៀន​កូនចៅគ្រប់អាយុសិក្សារបស់ពួកគេ។​ ការចុះឈ្មោះសិក្សានេះ គឺតម្រូវ​សម្រាប់កុមារ​ ដែលមានអាយុចាប់ពី ៣ឆ្នាំ ​ឬ៣៦ខែ ​រហូតដល់អាយុក្រោម ​៦ឆ្នាំ​ ឬយ៉ាងខ្ពស់បំផុត ៧០ខែ​ គិតត្រឹមថ្ងៃកំណត់ចូលសិក្សា ​សម្រាប់ថ្នាក់មតេយ្យ។

នេះបើផ្អែកលើសេចក្ដីណែនាំស្ដីពីដំណើរការគ្រឹះស្ថាន​មតេយ្យសិក្សា និងសេវាអប់រំកុមារតូចឆ្នាំ​សិក្សា ​២០២២-២០២៣។ រីឯការចុះឈ្មោះចូលរៀនថ្នាក់បឋមសិក្សាវិញ ​គឺកំណត់អាយុកុមារចាប់ពី ៦ឆ្នាំ ​ឬយ៉ាងតិច​ ៧០ខែ។

ការបន្តមកចុះឈ្មោះសិក្សាឱ្យកូនចៅនាពេលនេះ ​ក៏ស្របពេលដែលការបើកបវេសនកាល​ឆ្នាំ​សិក្សាថ្មី នឹងប្ររព្ធធ្វើឡើងនៅថ្ងៃទី ​២ខែមករា ឆ្នាំ​ ២០២៣ផងដែរ។

សម្រាប់អាណាព្យាបាលដែលបានជូនកូនចៅ ទៅចុះឈ្មោះសិក្សានៅសាលាបឋម​សិក្សា​ចតុមុខ​នាព្រឹកនេះ ​មានការយល់ច្បាស់ពីតម្លៃនៃការសិក្សា។​ ពួកគាត់លើកឡើងថា​ កូនចៅគ្រប់អាយុ គឺត្រូវ​តែនាំមកចុះឈ្មោះសិក្សា ​ដើម្បីភាពប្រសើររបស់ពួកគេនាពេលអនាគត។

ការចុះឈ្មោះសិក្សា ​គឺតម្រូវឱ្យភ្ជាប់មកជាមួយនូវឯកសារចាំបាច់មួយចំនួន ​រួមមានសំបុត្រកំណើត ឬ​សំបុត្រ​បញ្ជាក់កំណើត ​ឬសៀវភៅស្នាក់នៅ​ សំបុត្រពេទ្យ។ ​ការចុះឈ្មោះសិក្សា ក៏មិន​តម្រូវ​ឱ្យមានការចំណាយថវិកានោះដែរ។​ ការចុះឈ្មោះសិក្សានេះ​ គឺចាប់ផ្ដើមអនុវត្តតាំងពីថ្ងៃ ១៥ខែធ្នូ រហូត ដល់ថ្ងៃទី ៣១ ខែធ្នូ ឆ្នាំ ២០២២។

នេះបើផ្អែកលើសេចក្ដីណែនាំស្ដីពីដំណើរ​ការគ្រឹះស្ថានមតេយ្យសិក្សា និងសេវាអប់រំកុមារតូចឆ្នាំ​សិក្សា ​២០២២-២០២៣។

សេចក្ដីណែនាំដដែល បញ្ជាក់ថាក្រសួងអប់រំ មានទិសដៅសម្រេចឱ្យបានចំណុចដៅប្រចាំឆ្នាំសិក្សា ២០២២-២០២៣ នៃផែនការយុទ្ធសាស្រ្តវិស័យអប់រំ គឺអាត្រាចូលរៀនកុមារអាយុ ៥ឆ្នាំ ៦៣,១​ភាគរយ អាត្រាចូលរៀនកុមារអាយុ ៤ឆ្នាំ ៣៦,៣ភាគរយ និងអាត្រាចូលរៀនកុមារអាយុ ៣ឆ្នាំ គឺ១៤,១ ភាគរយ ព្រមទាំងឆ្ពោះទៅគោលដៅអភិវឌ្ឍន៍​ដោយចីរភាពឆ្នាំ ២០៣០ គឺ ធានាកុមារី កុមារាទាំងអស់ទទួលបានការអប់រំកម្រិតមតេយ្យសិក្សា ការថែរក្សា ការអភិវឌ្ឍកុមារតូច​ប្រកប​ដោយ​គុណភាព ​ដូច្នេះពួកគេត្រៀមខ្លួនជាស្រេចសម្រាប់ការអប់រំកម្រិតបឋមសិក្សា៕ អត្ថបទ៖ គឹមហុក