កំពង់ឆ្នាំង៖ ផ្លូវកៅស៊ូ DBST៤ខ្សែទៀត ប្រវែងជិត៣៦គីឡូម៉ែត្រស្ថិតក្នុងស្រុកសាមគ្គីមានជ័យ ខេត្តកំពង់ឆ្នាំង កំពុងកសាងបានប្រមាណជាង៣០% ដែលជាគម្រោងកែលម្អផ្លូវជនបទ របស់ក្រសួងអភិវឌ្ឍន៍ជនបទ។ ផ្លូវទាំង៤ខ្សែនេះ នឹងបំរើដល់ការដឹកជញ្ជូនកសិផលរបស់ប្រជាកសិករ ការធ្វើដំណើរទៅមកសាលារៀនរបស់សិស្ស ក៏ដូចជាការធ្វើដំណើររបស់អ្នកទេសចរទៅកាន់រមណីយដ្ឋាននានាក្នុងស្រុកសាមគ្គីមានជ័យ និងស្រុកទឹកផុសផងដែរ។
ប្រជាពលរដ្ឋស្រុកសាមគ្គីមានជ័យបានអោយដឹងថា៖ មុនខែមេសា ឆ្នាំ២០២២ ផ្លូវទាំង៤ខ្សែនេះ ជាផ្លូវមានភាពលំបាកខ្លាំងក្នុងការធ្វើដំណើរ ព្រោះមានដីហុយ ពេលភ្លៀងមានភក់ ជង្ហុកធំៗ និងពុំសូវមានអ្នកធ្វើដំណើរតាមផ្លូវនេះឡើយ។ ក្រោយពេលគម្រោងផ្លូវទាំង៤ខ្សែបានចាប់ផ្តើមកសាង ប្រជាពលរដ្ឋទាំងអស់មានចិត្តត្រេកអរជាពន់ពេក ដោយសារតែពួកគាត់ទទួលបានផ្លូវថ្មីជាកៅស៊ូ២ជាន់ ហើយពួកគាត់នឹងលែងខ្វល់ពីដីហុយ មានជង្ហុកធំៗ ឬភក់ទៀតហើយ ។ ប្រជាពលរដ្ឋនឹងទទួលបាននូវការកាត់បន្ថយការចំណាយលើការធ្វើដំណើរ អាចមានភ្ញៀវទេសចរមកលេងកម្សាន្តនៅក្នុងស្រុក ក៏ដូចជាងាយស្រួលក្នុងការដឹកកសិផលពីស្រែទៅផ្ទះ និងការធ្វើដំណើរទៅមករបស់សិស្សសាលាផងដែរ។
លោក ឈួន ចាន់ណា អភិបាលស្រុកសាមគ្គីមានជ័យបានថ្លែងថា ចាប់ពីឆ្នាំ២០១០ មកដល់បច្ចុប្បន្ន ស្រុកសាមគ្គីមានជ័យទទួលបានផ្លូវកៅស៊ូ ដែលជាគម្រោងកែលម្អផ្លូវជនបទរបស់ក្រសួងអភិវឌ្ឍន៍ជនបទចំនួន៣លើក ស្មើនឹង១០ខ្សែហើយ ដែលគម្រោងលើកទី៣ នេះទទួលបាន៤ខ្សែទៀត មានប្រវែងជិត ៣៦គីឡូម៉ែត្រ។ គម្រោងកែលម្អផ្លូវជនបទលើកនេះ បានបន្ថែមជូនប្រជាពលរដ្ឋកាន់តែងាយស្រួលធ្វើដំណើរជាងពេលមុន ទាំងការដឹកកសិផល ការធ្វើដំណើររបស់ភ្ញៀវទេសចរ និងសិស្សានុសិស្ស។ ដោយសារការគិតគូរបានល្អិតល្អន់ក្នុងការអភិវឌ្ឍន៍ សម្តេចតេជោ ហ៊ុន សែន បានផ្តល់ជូននូវសមិទ្ធផលថ្មីជាច្រើនក្នុងស្រុក ជាពិសេសគឺការកសាងផ្លូវ ស្ពាន លូប្រអប់ ដើម្បីអោយការប្រាស្រ័យទាក់ទងគ្នា ការធ្វើដំណើរ កាន់តែងាយស្រួល កាត់បន្ថយការចំណាយជាងពេលមុន។
គម្រោងកែលម្អផ្លូវជនបទពីផ្លូវក្រាលគ្រួសក្រហម ៤ខ្សែ មកជាផ្លូវកៅស៊ូ DBSTនាពេលនេះ គឺអ៊ុតកៅស៊ូ២ជាន់ ទទឹងផ្លូវប្រវែង ៦ម៉ែត្រ ក្នុងនោះមានដាក់លូមូលជាង ៤០កន្លែង លូប្រអប់ចំនួន ៣កន្លែង និងមានប្រវែង ៣៥,៩គីឡូម៉ែត្រ តភ្ជាប់ឃុំចំនួន៤ គឺឃុំសេដ្ឋី ឃុំធ្លកវៀន ឃុំត្បែងខ្ពស់ និងឃុំខ្មាឆ្មា ស្រុកសាមគ្គីមានជ័យ។ ផ្លូវទាំង៤ខ្សែនេះ គ្រោងសាងសង់រួចរាល់ជាស្ថាពរនៅបំណាច់ឆ្នាំ២០២៣ខាងមុខ៕ អត្ថបទ៖ ហុង វាស្នា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
