ភ្នំពេញ៖ ឯកឧត្តមកិត្តិសេដ្ឋាបណ្ឌិត ឆាយ ថន ទេសរដ្ឋមន្ត្រីរដ្ឋមន្ត្រីក្រសួងផែនការ បានថ្លែងថា អង្គការសហប្រជាជាតិ (UN) បានណែនាំដល់កម្ពុជា ដាក់បញ្ចូលគោលដៅចំនួន ៥ចំណុច ទៅក្នុងរបាយការណ៍ត្រួតពិនិត្យថ្នាក់ជាតិឆ្នាំ២០២៣ ខណៈកម្ពុជាកំពុងប្រមូលធាតុចូល ដាក់ ក្នុងរបាយការណ៍នេះផងដែរ ។

នៅក្នុងសិក្ខាសាលាណែនាំពីការរៀបចំធាតុចូល សម្រាប់ការរៀបចំរបាយការណ៍ ត្រួតពិនិត្យថ្នាក់​ជាតិដោយស្ម័គ្រចិត្ត ឆ្នាំ២០២៣ នៃការសម្រេចបានគោលដៅអភិវឌ្ឍន៍​ប្រកបដោយ ​ចីរភាពកម្ពុជា នៅថ្ងៃទី២៧ ខែធ្នូ ឆ្នាំ២០២២ ​ឯកឧត្តមទេសរដ្ឋមន្ត្រី ​មានប្រសាសន៍ថា​ សម្រាប់ គោលដៅទាំង៥​ចំណុចនោះ ទី១. ការធានាឱ្យ​មានទឹក និងអនាម័យ ​និងការគ្រប់គ្រងទឹក និង អនាម័យប្រកប​ដោយចីរភាព​ដល់ពលរដ្ឋគ្រប់រូប, ទី២. ធានាការ​ផ្គត់ផ្គង់​ថាមពលអគ្គិសនីមួយ គ្រប់គ្រាន់ មាន​ចីរភាព អាចទុកចិត្តបាន​ និងមានតម្លៃសមរម្យ​ សម្រាប់អ្នកប្រើប្រាស់ ។

ឯកឧត្តមបន្តថា ទី៣. កសាងហេដ្ឋារចនាសម្ព័ន្ធ ​ដែលធន់នឹងការប្រែប្រួល អាកាស ធាតុ លើកកម្ពស់​ឧស្សាហូបនីយកម្មប្រកបដោយចីរភាព ​និងបរិយាបន្ន និង​លើក​កម្ពស់​នវានុវន្តន៍, ទី៤.​ ធ្វើឲ្យទីក្រុង និងកន្លែងតាំងលំនៅថ្មីសម្រាប់ប្រជាជន ​មានលក្ខណៈបរិយាបន្ន សុវត្ថិភាព ធន់នឹងការប្រែប្រួល​អាកាសធាតុ ​និងចីរភាព​ និងទី៥. ពង្រឹមមធ្យោបាយអនុវត្ត នានា និង​បង្កើតភាពរស់រវើកនៃភាព​ជា​ដៃគូសកល ​សម្រាប់ការអភិវឌ្ឍប្រកបដោយចីរភាព ។

ឯកឧត្តមកិត្តិសេដ្ឋបណ្ឌិត ឆាយ ថន បន្ថែមថា ប៉ុន្តែអង្គការសហប្រជាជាតិ ក៏បានផ្ដល់ សិទ្ធិដល់​ប្រទេស​ជាតិ​នីមួយៗ​ផងដែរ​ ក្នុងការកំណត់ជ្រើសរើសគោលដៅ​ និងចំនួនគោលដៅ សម្រាប់ដាក់​បញ្ចូល ​ក្នុងរបាយការណ៍ត្រួតពិនិត្យថ្នាក់ជាតិរបស់ខ្លួន ។

ជាមួយនេះ ឯកឧត្តមទេសរដ្ឋមន្ត្រី បានបញ្ជាក់ថា ​កម្ពុជានឹងរៀបចំរបាយការណ៍ត្រួត ពិនិត្យ​ថ្នាក់ជាតិ​ដោយស្ម័គ្រចិត្ត ​ឆ្នាំ២០២៣នេះ ​នឹងកំណត់យកគោលដៅទាំងអស់​ រួមទាំង ​គោលដៅទី១៨ ដែល​ជាគោលដៅជាតិ ​បញ្ចូល​ទៅក្នុងរបាយការណ៍​ ដោយគោលដៅទាំង៥ ​ដែលស្នើឡើងដោយ UN នឹងត្រូវរាយការណ៍ដោយលម្អិត​ និងគោលដៅចំនួន១៣ផ្សេងទៀត នឹងត្រូវរាយការណ៍​ដោយ​សង្ខេប ​ពីលទ្ធផលនៃការអនុវត្ត ៕អត្ថបទ បាន សុខរិទ្ធិ