កែប​ ៖ ទូកនេសាទប្រភេទមងកេវមួយគ្រឿងបានលិចក្នុងសមុទ្រ ខណៈពេលត្រឡប់មកពីនេសាទ​ដល់ចំណុចក្បែរកោះទន្សាយ បណ្តាលឲ្យបាត់ខ្លួនបុរសម្នាក់ និងជួយសង្គ្រោះបាន៤នាក់ កាលពី​កណ្តាល​អធ្រាត្រថ្ងៃទី២៦ ខែធ្នូ ឆ្នាំ២០២២ ។ តាមការសន្និដ្ឋានថា ទូកលិចបណ្តាលមកពីផ្ទុកលើសចំណុះ ។

លោកសឹម ហ៊ីម ប្រធានសហគមន៍នេសាទត្រពាំងសង្កែ បានរៀបរាប់ថា កាលពីពាក់កណ្តាលយប់​ថ្ងៃទី២៦ ខែធ្នូ ទូកអូសមងកេវមួយគ្រឿងរបស់អ្នកនេសាទមកពីឃុំត្រពាំងព្រីង​ ស្រុកទឹកឈូ បាន​លិចត្រង់​ចំណុចក្បែរកោះទន្សាយ។ លុះមកដល់ព្រឹកថ្ងៃទី២៧​ ខែធ្នូ កម្លាំង​កងទ័ពជើងទឹក ព្រមទាំង​សមត្ថកិច្ចនគរបាលការពារព្រំដែនទឹកខេត្តកែប​ សហការជាមួយប្រជានេសាទសហគមន៍ បាន​តាមរកឃើញទូក ​និងសង្គ្រោះបុរសបួននាក់​ក្នុងចំណោមប្រាំនាក់ រួចនាំមកដីគោកវិញ។

លោកប្រធានសហគមន៍ បានបន្តថា បុរសដែលកំពុងបាត់ខ្លួននោះគាត់​មិន​ចេះហែល​ទឹកទេ។ មូលហេតុដែលបណ្តាលឲ្យទូកលិចនេះ​គឺមកការពីផ្ទុកលើសចំណុះ ​ព្រោះ​យប់​នោះ ​ពួកគាត់​នេសាទ​ត្រី​បានច្រើន​ខុសពីសព្វមួយដង៕អត្ថបទ៖ អន សារឹម