ភ្នំពេញ៖ ដើម្បីធានានិរន្តរភាពការរស់នៅធម្មតាជាមួយវត្តមានជំងឺកូវីដ-១៩ ប្រជាពលរដ្ឋរស់នៅ​រាជធានីភ្នំពេញ បន្តទៅចាក់វ៉ាក់សាំងដូសជំរុញ ​តាមកាលកំណត់ ដើម្បីទប់ស្កាត់កុំឱ្យជំងឺកូវីដ​ងើបឡើងវិញ ។

នៅឯមន្ទីរពេទ្យបង្អែកច្បារអំពៅ ក្នុងរាជធានីភ្នំពេញ នៅថ្ងៃទី២៧ ខែធ្នូនេះ ប្រជាពលរដ្ឋ​បាននាំគ្នា​ចូល​ចាក់​វ៉ាក់សាំងដូសជំរុញជាបន្តបន្ទាប់ ​ដែលជាសកម្មភាពចូលរួមទប់ស្កាត់កុំឱ្យជំងឺកូវីដ-១៩រីករាល​ ដាលខ្លាំងឡើងវិញដូចកាលពីឆ្នាំមុនៗ​ ដែលនាំឱ្យប៉ះពាល់ដល់ដំណើរការសង្គម។

ប្រជាពល​ ដែលបានចូលចាក់វ៉ាក់សាំងដោយការស្ម័គ្រចិត្ត នៅតែមិនភ្លេចសំដែងការ​អរគុណ​ដល់​សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ដែលបានស្វះស្វែងរកវ៉ាក់សាំងមកចាក់ជូន​ប្រជាពលរដ្ឋ​ដោយមិនគិតថ្លៃ។

លោកវេជ្ជបណ្ឌិត ឌី ប៊ុនលន ប្រធានក្រុមគ្រូពេទ្យចាក់វ៉ាក់សាំងនៅមន្ទីរពេទ្យបង្អែកច្បារអំពៅ បាន​ឱ្យដឹងថា បច្ចុប្បន្ន ការចាក់វ៉ាក់សាំងកូវីដ-១៩ ​ទាំងដូសមូលដ្ឋាន និងដូសជំរុញ នៅមន្ទីរពេទ្យ​បង្អែកនេះ ​មានការថមថយច្រើនជាងពេលចាប់ផ្តើមដំបូង។ ​ការថមថយនេះ គឺដោយសារ​ពលរដ្ឋភាគច្រើន ធ្លាប់បានចាក់វ៉ាក់សាំងរួចរាល់​ ម្យ៉ាងទៀតពួកគេយល់ឃើញថា ​ឥឡូវជំងឺកូវីដ មិនឆ្លងច្រើន ​និងហេតុផលផ្សេងៗ​មួយចំនួនទៀត។

យ៉ាងណាក្តី ដើម្បីបង្ការកុំឱ្យជំងឺកូវីដ-១៩ ងើបឡើងវិញ ​លោកវេជ្ជបណ្ឌិត បានបន្តក្រើនរំលឹក​ប្រជាពលរដ្ឋ​មិនត្រូវធ្វេសប្រហែសនោះទេ ​ព្រោះថាជំងឺកូវីដ-១៩ នៅបន្តបំប្លែងខ្លួនថ្មីៗជាប់ជានិច្ច។

បច្ចុប្បន្នការចាក់វ៉ាក់សាំងបង្កាជំងឺកូវីដ-១៩ ​ត្រូវបានរាជរដ្ឋាភិបាល បន្តចាត់ទុកជាយុទ្ធសាស្រ្ត​ដ៏​សំខាន់មួយ ​ដើម្បីធានានិរន្តរភាព សេដ្ឋកិច្ច ​និងការរស់នៅជាធម្មតា ​តាមបែបគន្លងថ្មី ជាមួយ​ជំងឺកូវីដ-១៩ ។

សម្រាប់ប្រជាពលរដ្ឋ ​មិនទាន់ចាក់វ៉ាក់សាំងកូវីដ ​ចាប់ពីដូសមូលដ្ឋានរហូតដល់ដូសជំរុញ គឺអាច​ទៅទទួលការចាក់វ៉ាក់សាំងបាននៅគ្រប់ទីតាំងសុខាភិបាលសាធារណៈ​ ឬទីតាំងចល័ត ដែលរៀបចំ​ដោយក្រសួងសុខាភិបាល​ សហការជាមួយដៃគូរពាក់ព័ន្ធផ្សេងៗ ៕អត្ថបទ៖ ទូច សោភ័ណ