កណ្ដាល៖ នៅក្នុងអំឡុងពេលអាកាសធាតុកំពុងចុះត្រជាក់នេះ សំគាល់ឃើញថា នៅតាមបណ្តា​មូលដ្ឋាន​សុខាភិបាលនានា ​នៅខេត្តកណ្តាល​ ហាក់បាននិងកំពុងទទួលអ្នកជំងឺគ្រុនផ្តាសាយ ហូរសំបោរ រលាកបំពង់ក សួត ក្អក ចូលព្យាបាលច្រើនជាងបណ្តាជំងឺនានា ដែល​បញ្ហា​ក្រុមពេទ្យ​ក៏បានអំពាវនាវពលរដ្ឋបង្កើនប្រុងប្រយ័ត្នការពារថែទាំសុខភាពខ្លួនតាមរយៈរក្សាភាពអនាម័យ និង​ពាក់អាវរងារ រក្សាគន្លាត ពាក់ម៉ាស់ ​ឧស្សាហ៍លាងដៃជាដើម។

បើតាមវេជ្ជបណ្ឌិត ហេង ណាថេង អ្នកពិនិត្យជំងឺទូទៅ​នៃមន្ទីរពេទ្យជ័យជំនះ ​ក៏ដូច​លោកប្រធាន​មណ្ឌល​សុខភាព​ស្វាយរំលំ ​នៅក្រុងតាខ្មៅ ខេត្តកណ្តាល បានថ្លែងថា ​នៅក្នុងអំឡុងពេល​អាកាស​ធាតុ​កំពុង​ចុះត្រជាក់នេះ​ សំគាល់ឃើញថា ​មានពលរដ្ឋកើតជំងឺជាច្រើន ​បាន​ចូលរួម​ទទួល​សេវា​ពិនិត្យព្យាបាល ​ក្នុងនោះអ្នកជំងឺឈឺគ្រុនផ្តាសាយ ​ហូរសំបោរ រលាកបំពង់ក សួត ក្អក បាន​មក​ទទួល​សេវា​ព្យាបាល​ច្រើនជាងគេ ​ហើយនឹងអាចកើនឡើងកាន់តែថែមទៀត នៅពេល​អាកាសធាតុ​ត្រជាក់ផ្លាស់ប្តូរជាក្តៅវិញនៅពេលខាងមុខនេះ។

ក្រុមពេទ្យ ថ្លែងថា ​យ៉ាងណាក៏ដោយ អ្នកជំងឺគ្រុនផ្តាសាយ រលាកបំពង់ក សួត ​និងក្អកជាដើមនេះ គឺត្រូវទៅ​ទទួល​សេវាព្យាបាលឲ្យបានត្រឹមត្រូវ ​ចៀសវាង​ការទុកយូរបង្កវិវត្តទៅជាជំងឺរលាក​សួត​ធ្ងន់ធ្ងរ​ពិបាកព្យាបាល។

ពលរដ្ឋ ថ្លែងថា ការឈឺជំងឺគ្រុនផ្តាសាយនៅក្នុងពេលអាកាសធាតុត្រជាក់នេះ ​គឺ​គេមានការ​ព្រួយ​បារម្ភ​ខ្លាំង​ចំពោះការឆ្លងឈឺជំងឺកូវីដ១៩ ​ហើយ​គេក៏ត្រូវរូតរះមករកជួបគ្រូពេទ្យផងដែរ ដើម្បីមក​រក​ការ​ព្យាបាល​ឲ្យបានត្រឹមត្រូវ។

លោកជំទា ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល​ បានថ្លែងថា រហូត​ដល់ពេលនេះ​ ក្រសួងមិនទាន់បូកសរុបតួលេខអ្នកជំងឺគ្រុនផ្តាសាយ​ ហូរសំបោរ ​រលាកបំពង់ក ​សួត ក្អកជា​ដើមចូលព្យាបាលតាមមូលដ្ឋានសុខាភិបាលនេះទេ​ តែទោះយ៉ាងតាមសេចក្តីជូនព័ត៌មាន​បាន​បញ្ជាក់ថា នៅក្នុងរដូវធ្លាក់ខ្យល់ចុះត្រជាក់ចន្លោះខែធ្នូ ​ដល់ខែមករា ​តាមមូលដ្ឋានសុខាភិបាល មាន​ការជួបប្រទះ​ញឹកញាប់ ​ភាគច្រើនគឺជំងឺផ្លូវដង្ហើម ​ដែលបង្កជាគ្រុនផ្តាសាយ ​ហូរសំបោរ រលាកបំពង់ក ក្អក ​និងរលាកពោះវៀនជាដើម។

នៅក្នុងសេចក្តីជូនព័ត៌មាននេះដែរ ក្រសួងសុខាភិបាល ​ប្រកាសហាមប្រាមការប្រើប្រាស់ ឬលេប​ឱសថ​ប្រភេទអង់ទីប៊ីយូទិច ឬថ្នាំផ្សះ ​ដោយគ្មាន​វេជ្ជបញ្ជាផងដែរ នៅពេលពលរដ្ឋ​មាន​អាការៈ​មិនស្រួលខ្លួន៕ អត្ថបទ ស៊ុម សុខជា