​អ៊ុយក្រែន៖ លោក​ប្រធានាធិបតី​អ៊ុយ​ក្រែ​ន Volodymyr Zelenskiy កាលពី​ថ្ងៃ​ចន្ទ​បាន​និយាយ​ថា លោក​បាន​ស្វែងរក​ជំនួយ​ពី​នាយក​រដ្ឋមន្ត្រី​ឥណ្ឌា​ក្នុង​ការ​អនុវត្ត​ផែនការ​សន្តិភាព នៅ​ក្នុង​ការ​សន្ទនា​តាម​ទូរស័ព្ទ​ជាមួយ​លោក​នាយក​រដ្ឋមន្ត្រី Narendra Modi​។

​ការសន្ទនា​នេះ​មាន​ឡើង​ ស្រប​ពេល​​ឥណ្ឌា​កំពុង​ព្យាយាម​ពង្រឹង​ទំនាក់ទំនង​ពាណិជ្ជកម្ម​ជាមួយ​ទីក្រុង ​Moscow ​ខណៈ​បណ្ដា​ប្រទេស​លោក​ខាង​លិច​ដាក់​ចេញ​វិធានការ​ថ្មីៗ ​ដើម្បី​បញ្ឈប់​សង្គ្រាម​របស់​រុស្ស៊ី។ លោក Zelenskiy បាន​សរសេរ​នៅ​លើ​បណ្ដាញ​សង្គម Twitter ថា ខ្ញុំ​បាន​សន្ទនា​តាម​ទូរស័ព្ទ​ជាមួយ​លោក​នាយក​រដ្ឋមន្ត្រី Narendra Modi និង​ជូនពរ​លោក​ឲ្យ​ទទួល​បាន​ជោគជ័យ​ជា​ប្រធាន​កិច្ចប្រជុំ​កំពូល G20​។

វា​ជា​វេទិកា​មួយ​ដែល​ខ្ញុំ​បាន​ប្រកាស​ពី​ផែនការ​សន្តិសុខ ហើយ​ពេលនេះ​ខ្ញុំ​នឹង​ពឹង​ផ្អែកលើ​ការ​ចូល​រួម​របស់​ឥណ្ឌា​ក្នុង​ការ​អនុវត្ត​របស់​ខ្លួន។ លោក Zelenskiy បាន​ស្នើ​ក្រុម​ប្រទេស​មាន​ឧស្សាហកម្ម​លូត​លាស់​ទាំង​២០ ​ឬ G20 កាលពី​ខែ​មុន​ឲ្យ​អនុវត្ត​ផែនការ​សន្តិភាព​ទាំង​ ១០​ចំណុច និង​ការ​បញ្ចប់​សង្គ្រាម។ ប្រទេស​ឥណ្ឌា​នឹង​ធ្វើជា​ម្ចាស់ផ្ទះ​កិច្ចប្រជុំ G20 នៅ​ឆ្នាំ២០២៣​៕

អត្ថបទ៖ សុខមាន