ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានជំរុញទៅក្រសួងស្ថាប័នពាក់ព័ន្ធ ត្រូវ​បន្តកម្មវិធីផ្ដល់សម្បទានដីសង្គមកិច្ច ដល់ប្រជាពលរដ្ឋក្រីក្រ និងគ្មានដី រួមទាំងការចែកដី និង​ធ្វើ​ផ្ទះ​ជូន​កង​កម្លាំង​ប្រដាប់​អាវុធ ដែលកំពុងឈរជើងនៅតាម​បន្ទាត់ព្រំដែន​។

ក្នុងឱកាសអញ្ជើញជាអធិបតី ក្នុងពិធីបិទសន្និបាទក្រសួងរៀបចំដែនដី នគរូបនីយកម្ម និងសំណង់ នៅថ្ងៃទី២៧ ខែធ្នូ ឆ្នាំ​២០២២ សម្ដេចតេជោនាយករដ្ឋមន្ត្រី មានប្រសាសន៍ថា ត្រូវបន្តលើកទឹកចិត្ត និងគាំទ្រ​គម្រោង​សាងសង់​លំនៅ​ដ្ឋាន​តម្លៃសមរម្យ សំដៅលើកកម្ពស់សិទ្ធិ របស់ប្រជាពលរដ្ឋ ក្នុងការទទួលបានលំនៅដ្ឋានសមរម្យ​។

​សម្ដេចតេជោ បន្តថា ត្រូវបន្តកម្មវិធីសម្បទានដីសង្គមកិច្ច ដើម្បីចែកដីជូនប្រជាពលរដ្ឋ ក្រីក្រដែលខ្វះដី និង​បន្តអនុវត្ត​ចែក​ដី និងផ្ទះជូនកងកម្លាំងប្រដាប់អាវុធ កំពុងឈរជើងនៅតាម ព្រំដែន ដើម្បីធ្វើឲ្យស្ថានភាពនៅតាមព្រំដែន មាន​ភាព​អ៊ូអរ ហើយការដោះស្រាយនេះ ទៅ តាមលទ្ធភាពជាក់ស្ដែង។

​សម្ដេចតេជោ ហ៊ុន សែន បានបន្ថែមថា កម្មវិធីសម្បទានដីសង្គមកិច្ច ជូនប្រជាពលរដ្ឋ ដែលខ្វះដីពិតប្រាកដត្រូវ​ធ្វើអត្ត​សញ្ញាណ​កម្ម ដោយកំណត់មុខសញ្ញារបស់ប្រជាពលរដ្ឋ ដើម្បីផ្ដល់ដីឲ្យពួកគាត់ ហើយពួកគាត់អាចមានដីពិតប្រាកដ ក្នុងការកសាងជីវភាព។

​សម្ដេចតេជោនាយករដ្ឋមន្ត្រី បានគូសបញ្ជាក់ថា ជាមួយនេះ ត្រូវបន្តកសាងផ្ទះសម្រាប់ អតីតយុទ្ធជន បើគាត់មាន​ដី​ហើយ តែគ្មានលទ្ធភាពសាងសង់ផ្ទះ ត្រូវសាងសង់ជូនពួកគាត់ ដែលជាកម្មវិធីជាក់លាក់ បម្រើដល់គោលដៅនេះ៕ អត្ថបទ៖ បាន សុខរិទ្ធិ