ភ្នំពេញ៖ រដ្ឋាភិបាលចិន តាមរយៈស្ថានទូតចិននៅកម្ពុជា បានផ្តល់អំណោយវ៉ាក់សាំងការពារជំងឺឆ្លងសត្វចំនួន ១លានកម្រិត ជូនដល់ក្រសួងកសិកម្ម រុក្ខាប្រមាញ់ និងនេសាទកម្ពុជា ដើម្បីចូលរួមចំណែក​ក្នុងការជួយ​ទប់​ស្កាត់​ការ​ឆ្លង​រាលដាលជំងឺឆ្លងសត្វ ដែលបាននិងកំពុងកើតមាន​ជាបន្ថែមទៅនឹងវ៉ាក់សាំងដែលកម្ពុជាមានស្រាប់។

ក្រសួងកសិកម្ម រុក្ខាប្រមាញ់ និងនេសាទកម្ពុជា នៅរសៀលថ្ងៃទី២៧ ធ្នូ ឆ្នាំ២០២២នេះ បានឲ្យដឹងថា កម្មវិធីប្រគល់-ទទួល​វ៉ាក់សាំងការពារជំងឺឆ្លងសត្វចំនួន ១លានកម្រិត បានប្រារព្ធធ្វើឡើងនៅទីស្តីការក្រសួង ក្រោមវត្តមានរបស់ ឯកឧត្តមរដ្ឋមន្រ្តី ឌិត ទីណា និងឯកឧត្តម វ៉ាង វិនធៀន (Wang Wentian) ឯកអគ្គរដ្ឋទូត​សាធារណ​រដ្ឋ​ប្រជា​មានិត​ចិន​ប្រចាំកម្ពុជា។

ឯកឧត្តម រដ្ឋមន្រ្តី ឌិត ទីណា នៅក្នុងសុន្ទរកថា បានឲ្យដឹងថា កន្លងមក​ភាគីចិនបានគាំទ្រវិស័យចិញ្ចឹមសត្វ ក្នុងនោះ មាន​ការលើកកម្ពស់ការចិញ្ចឹមសត្វ តាមរយៈគម្រោងនិងកិច្ចសហប្រតិបត្តិការនានា​រួមមាន កម្មវិធីឡជីវឧស្ម័ន អំណោយ​ជាវ៉ាក់សាំងការពារជំងឺឆ្លងសត្វ និងកម្មវិធីបណ្តុះបណ្តាលជាច្រើន។

ឯកឧត្តម លើកឡើងបន្តថា នាពេលថ្មីៗនេះ យើងមានគម្រោងអាស៊ាន-ចិន ដែលនឹងគ្រោងសាងសង់មន្ទីរ​ពិសោធន៍​រោគ​វិនិច្ឆ័យជំងឺសត្វថ្នាក់ជាតិជូនអគ្គនាយកដ្ឋានសត្វ និងផលិតកម្មសត្វ ព្រមទាំងបានចុះអនុស្សារណៈយោគយល់គ្នា និងកិច្ចព្រមព្រៀងចំនួន២ ក្នុងនោះរួមមាន ការពង្រឹងកិច្ចសហប្រតិបត្តការលើបសុឱសថ វត្ថុធាតុជីវបសុព្យាបាល និងសារធាតុបន្ថែមចំណីសត្វ និងការផ្តល់ជំនួយវ៉ាកសាំងសត្វក្នុងពេលនេះ។

ឯកឧត្តម វ៉ាង វិនធៀន បានមានប្រសាសន៍ថា ក្នុងចំណោមវាក់សាំងការពារជំងឺឆ្លងសត្វរបស់ក្រសួងកសិម្ម និងកិច្ចការជនបទនៃប្រទេសចិនលើកនេះ មានវ៉ាក់សាំងជំងឺអ៊ុតក្តាម ៣ប្រភេទ សម្រាប់គោក្របី ចំនួន ៥០ម៉ឺនកម្រិត និងវ៉ាក់សាំងជំងឺបុសក្បាលគោ ក្របីសរុប ៥០ម៉ឺនកម្រិត។ ឯកឧត្តមសង្ឃឹមថា វ៉ាក់សាំងទាំងនេះ នឹងដើរតួនាទីជាវិជ្ជមានក្នុងការអភិវឌ្ឍលើវិស័យចិញ្ចឹមសត្វនៅកម្ពុជា។

ឆ្លៀតក្នុងឱកាសនោះ ឯកឧត្តមទូត បានបញ្ជាក់ថា ខណៈឆ្នាំ២០២៣ខាងមុខ ដែលជាខួបអនុស្សាវរិយ៍លើកទី៦៥ នៃការ​បង្កើតទំនាក់ទំនងការទូត រដ្ឋាភិបាលចិននិងកម្ពុជា បានប្រកាសរួមគ្នាកំណត់ថា នឹងក្លាយទៅ​ជាឆ្នាំ​មិត្តភាព​ចិន និង​កម្ពុជា កិច្ចសហប្រតិបត្តិការលើវិស័យកសិកម្មមានសារសំខាន់ខ្លាំង នៅក្នុងកិច្ច​សហប្រតិបត្តិ​ការ​ជាក់​ស្តែង​រវាង​ប្រទេស​ទាំងពីរ។

ឯកឧត្តមបន្ថែមទៀតថា នៅដើមឆ្នាំថ្មីខាងមុខនេះដែរ កិច្ចសហប្រតិបត្តិការរវាងភាគីទាំងពីរ នឹងមានភាព​មមាញឹក​ខ្លាំង ពោលចាប់ពីខែមករា ភាគីទាំងពីរនឹងធ្វើការនាំចេញម្រេចទៅប្រទេសចិន ហើយនៅខែមីនា អ្នកជំនាញក្រុមទី២ នៃ​គម្រោងផែនការអភិវឌ្ឍកសិកម្មកម្ពុជា ដែលជាជំនួយរបស់ប្រទេសចិន នឹងមកដល់កម្ពុជាដើម្បីចាប់ផ្តើមការងារ។ ក្រៅពីនេះ ការងារនាំចេញកសិផលដែលមានគុណភាពល្អប្រសើររបស់កម្ពុជា ដូចជាផលិតផលត្រចៀកកម្ម ដូង នឹង​ត្រូវ​អនុវត្តជាបន្តបន្ទាប់ផងដែរ៕ អត្ថបទ៖ឈិត បូរ៉ាវី