ភ្នំពេញ៖ រាជបណ្ឌិត្យសភាកម្ពុជា សហការជាមួយក្លឹបអ្នកកាសែតរៀបចំ សិក្ខាសាលាបណ្តុះបណ្តាលសារព័ត៌មាន ស្តីពីតួនាទីប្រពន្ធ័ផ្សព្វផ្សាយ និង ការបោះឆ្នោតនៅកម្ពុជា ដើម្បីលើកកម្ពស់សមត្ថភាពវិភាគបរិបទ និងដំណើរការបោះឆ្នោតនៅកម្ពុជា។
ឯកឧត្តមបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិ នៃកម្ពុជា នៃរាជបណ្ឌិត្យសភាកម្ពុជា បានមានប្រសាសន៍ថា សិក្ខាសាលាបណ្តុះបណ្តាលនេះមានគោលបំណងលើកកម្ពស់ការយល់ដឹងរបស់អ្នកសារព័ត៌មានអំពីក្របខណ្ឌច្បាប់ នីតិវិធី ប្រព័ន្ធ និងដំណើរការ នៃបោះឆ្នោតនៅកម្ពុជា និងតួនាទី និងក្រមសីលធម៌ប្រព័ន្ធផ្សព្វផ្សាយក្នុងការរាយការណ៍ព័ត៌មានបោះឆ្នោត។ លើកកម្ពស់សមត្ថភាពវិភាគបរិបទ និងដំណើរការបោះឆ្នោតនៅកម្ពុជា។ លើកកម្ពស់សមត្ថភាពវិភាគពីការប្រកួតប្រជែងភូមិសាស្ត្រនយោបាយរវាងមហាអំណាច មជ្ឈភាពអាស៊ាន និងការបោះឆ្នោត។ ចែករំលែកឧត្តមានុវត្តន៍ពាក់ព័ន្ធនឹងការចូលរួមនយោបាយ និងការចូលរួមការបោះឆ្នោតដោយសហគមន៍ពហុវប្បធម៌។ លើកកម្ពស់សមត្ថភាពអ្នកសារព័ត៌មានអាជីពក្នុងការវិភាគ និងស៊ើបអង្កេតព័ត៌មានពាក់ព័ន្ធនឹងការបោះឆ្នោត។ រួមចំណែកលើកកម្ពស់សុខដុមរមនា សន្តិភាព ការអភិវឌ្ឍ និងបរិយាបន្ន នៅកម្ពុជា។ រួមចំណែកប្រឆាំងនឹងព័ត៌មានបំភ្លៃ (Manipulation) ព័ត៌មានភាន់ច្រឡំ (Misinformation) ព័ត៌មានក្លែងបន្លំ (Disinformation) និងសេណារីយ៉ូដែលគេបង្កើតឡើង (Invented scenarios) សម្រាប់របៀបវារៈនយោបាយលាក់កំបាំង និងបើកចំហណាមួយពីមហាអំណាចខាងក្រៅ។
លោក ពុយ គា ប្រធានក្លឹបអ្នកកាសែតកម្ពុជា បានមានប្រសាសន៍ថា អ្នកសារព័ត៌មាន ត្រូវដឹងមានផែនការជាមុន ក្នុងការយកព័ត៌មានស្តីពីការបោះឆ្នោតក្នុងន័យជៀសវាងការផ្សាយព័ត៌មានមិនច្បាស់ ឬស្រពិចស្រពិល ដូច្នេះមានតែសារព័ត៌មានអាជីពតែប៉ុណ្ណោះ ដែលអាចជួយដល់សង្គមបាន កុំអោយមានការផ្សាយព័ត៌មានលំអៀងខ្លាំងពេក ដែលនាំមានចលាចល ដល់សង្គមនៅក្នុងអំឡុងពេលបោះឆ្នោត។
ឯកឧត្តម ខៀវ កញារិទ្ធ រដ្ឋមន្ត្រីក្រសួងព័ត៌មាន បានមានប្រសាសន៍ថា ដើម្បីអោយសង្គមប្រជាធិបតេយ្យមួយដើរទៅមុខបានទាល់តែមានការចូលរួមពីគ្រប់ភាគីពាក់ព័ន្ធ ជាពិសេសការចូលរួមពីអ្នកសារព័ត៌មានអាជីព។ ឯកឧត្តម បន្តថា តួនាទីអ្នកសារព័ត៌មាន ឯករាជ្យ សេរី និងវិជ្ជាជីវៈ គឺពិតជាសំខាន់ណាស់ព្រោះអ្នកសារព័ត៌មានជាអ្នកផ្តល់នូវចំណេះដឹង ដំណឹង សព្វបែបយ៉ាងទៅដល់ប្រជាពលរដ្ឋដែលព័ត៌មានទាំងអស់នោះ នឹងក្លាយជាធាតុចូលសំខាន់ មុននឹងសម្រេចចិត្តក្នុងការបោះឆ្នោតជ្រើសរើសមេដឹកនាំរបស់ខ្លួន។ ដូច្នេះដើម្បីអោយអ្នកសារព័ត៌មាន មានសមត្ថភាពគ្រប់គ្រាន់ជួយដល់សង្គមបាន លុះណាតែអ្នកសារព័ត៌មានទាំងនោះ ចេះអភិវឌ្ឍន៍ចំណេះដឹងទាំងផ្នែកច្បាប់ ក្រមសីលធ៌មវិជ្ជាជីវៈ និងយល់ដឹងពីបរិបទជាតិ និងអន្តរជាតិ។
សូមបញ្ជាក់ថា សិក្ខាសាលារបស់យើងនឹងប្រព្រឹត្តទៅរយៈពេល២ថ្ងៃ និងមានសិក្ខាកាមចូលរួមចំនួន ៥៤នាក់ ក្នុង នារី១៦នាក់ និងមកពីអង្គភាពចំនួន ២៦ ក្នុងនោះ រួមមាន មកពី គ.ជ.ប., ស្ថាប័នស្រាវជ្រាវចំនួន ២ស្ថាប័ន, សារព័ត៌មានបោះពុម្ពនិងអនឡាញ ១៥ អង្គភាព, វិទ្យុ ៣អង្គភាព ទូរទស្សន៍ ៣អង្គភាព, អង្គការសង្គមស៊ីវិល ១អង្គភាព និងសាកលវិទ្យាល័យ ១អង្គភាព។ សិក្ខាសាលានេះវាគ្មិនដែលជាគ្រូបង្គោល សរុបចំនួន ០៩រូប ដែលជាថ្នាក់ដឹកនាំជាន់ខ្ពស់ នៃគ.ជ.ប. អ្នកកាសែតអាជីពជើងចាស់ អ្នកជំនាញ អ្នកច្បាប់ និងអ្នកវិទ្យាសាស្ត្រនយោបាយ ដែលអញ្ជើញមកពីប្រទេសកម្ពុជា បារាំង អាល្លឺម៉ង់ និង អូស្ត្រាលី៕ អត្ថបទ៖ សូដាវណ្ណ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
