ភ្នំពេញ៖ នៅថ្ងៃទី២៨ ខែធ្នូនេះឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានអញ្ជើញប្រកាស​ផ្សព្វផ្សាយ ​កម្មវិធីសិក្សាផ្នែកអប់រំបច្ចេកទេសមធ្យមសិក្សាមធ្យមសិក្សាទុតិយភូមិផ្នែកទេសចរណ៍ និងជំនាញការិយាល័យជួរមុខ សម្រាប់ការប្រើប្រាស់នៅតាមសាលាវិទ្យាល័យ​ចំណេះទូទៅ​និង​បច្ចេកទេស​ ដើម្បីបើកឱកាសឱ្យ​សិស្សានុសិស្ស​សិក្សាចាប់ពីថ្នាក់ទី៩ គឺអាចចូលរៀនជំនាញ​ទេសចរណ៍​បន្ថែម​នៅតាមវិទ្យាល័យរដ្ឋ និងឯកជនចំនួន៤។

ឯកឧត្តមរដ្ឋមន្ត្រី ថោង ខុន ថ្លែងថា សាលាទាំងបួនដែលដែល ​ក្រសួងទេសចរណ៍ និង​ក្រសួងអប់រំ​យុវជន ​និងកីឡាសហការបង្កើតនេះ រួមមាន៖ មជ្ឈមណ្ឌលអប់រំបច្ចេកទេស​មិត្តភាពកម្ពុជា​ជប៉ុនខេត្តសៀមរាប , វិទ្យាស្ថានចំណេះទូទៅ​ និងបច្ចេកទេសអនុវត្តកំពង់ឈើទាល​ ខេត្តកំពង់ធំ, វិទ្យាស្ថានចំណេះទូទៅ និងបច្ចេកទេសឯកជន ​សន្តហ្វ្រង់ស្វ័រ ខេត្តតាកែវ និងវិទ្យាស្ថាន​ចំណេះ​ទូទៅ​និងបច្ចេកទេស​ឯកជន​ អេស៊ីធី ​រាជធានីភ្នំពេញ។

ឯកឧត្តម​រដ្ឋមន្ត្រី ថោង ខុន បន្តថា ​ការ​ដាក់​បញ្ចូល​ជាលើកទី១ ​នូវ​កម្មវិធីសិក្សា​ដល់​កម្សិត​វិទ្យាល័យ​ចំណេះទូទៅ​និង​បច្ចេកទេស ​និង​ផ្តល់ឱកាសឲ្យសិស្សានុសិស្សអាច​ចាប់​យក​ជំនាញ​ទេសចរណ៍​ទាំង​នៅវ័យក្មេង ​និងទទួលសញ្ញាបត្របច្ចេកទេស ​និងវិជ្ជាជីវៈដែល​មាន​តម្លៃសមមូល​នឹង​សញ្ញាបត្រមធ្យម​សិក្សាទុតិយភូមិ ​ឬបាក់ឌុប។

ឯកឧត្តម កុលផេង វឌ្ឍនា អនុរដ្ឋលេខាធិការក្រសួងអប់រំយុវជន និងកីឡា នឹងជម្រុញពង្រឹងការ​បណ្តុះ​បណ្តាល​ជំនាញទេសចរណ៍ ​ទាំងផ្នែករឹង ​និងផ្នែកទន់ ​ដើម្បីជម្រុញឲ្យសិស្សានុសិស្ស​ពេលរៀន​ចប់ថ្នាក់ទី១២ មានសញ្ញាបត្របាក់ឌុប ​គឺគេមានជំនាញវិជ្ជាជីវៈទេសចរណ៍​មួយថែមទៀត ដែល​អាចរកការធ្វើបាន ​និងការបង្កើតមុខរបរក្នុងវិស័យទេសចរណ៍ ក៏ដូចជម្រុញវិស័យ​ទេសចរណ៍​រីក​ចំរើន ​និងផ្តល់សេវាប្រកបដោយគុណភាព។

បណ្តាសិស្សានុសិស្ស បានថ្លែងការអបអរសាទរ ​និងគាំទ្រក្រសួងទេសចរណ៍ ​និងក្រសួងអប់រំ ដែល​រៀបចំកម្មវិធីសិក្សាជំនាញទេសចរណ៍នៅកម្សិតថ្នាក់វិទ្យាល័យនេះ ហើយពួកគេក៏សូមស្នើក្រសួង​ទាំងពីរបង្កើនការអនុវត្តកម្មវិធីសិក្សាជំនាញ​នៅតាមបណ្តាវិទ្យាល័យផ្សេងៗទៀតផងដែរ។

លោកទ្រី ឈីវ ប្រធាននាយកដ្ឋានសហប្រតិបត្តិការអន្តរជាតិ និ​ងអាស៊ាន នៃក្រសួងទេសចរណ៍​បានថ្លែងថា ​បច្ចុប្បន្ន ​មានសាលារដ្ឋ ​និងឯកជនប្រមាណជាង​ ២០សាលា បានសហការជាមួយ​ក្រសួង​ទេសចរណ៍បាន និងកំពុងផ្តល់ការបណ្តុះបណ្តាលជំនាញវិជ្ជាជីវៈទេសចរណ៍ រហូត​ដល់កម្រិតបរិញ្ញាបត្រ៕អត្ថបទ ស៊ុម សុខជា