ភ្នំពេញ៖សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា​ បានកំណត់ឲ្យក្រសួង និង​អាជ្ញាធរ​ពាក់ព័ន្ធ ត្រូវកាត់ឆ្វៀលដីជូនពលរដ្ឋនៅតំបន់២ ​និងតំបន់៣ ​នៃបឹងទន្លេសាប ឱ្យ​ចប់រួចរាល់​ត្រឹមចុង​ខែឧសភា ឆ្នាំ២០២៣ ខណៈគិតត្រឹមដំណាច់​ខែវិច្ឆិកា​កន្លងមកនេះ ​ក្រសួងរៀបចំដែនដី បានកាត់​ឆ្វៀលជាង២ម៉ឺនហិកតា ​សម្រាប់ចែកជូនពលរដ្ឋជាង ១ម៉ឺនគ្រួសារ ​ដើម្បីអាស្រ័យផល ។

ក្នុងឱកាសអញ្ជើញជាអធិបតីក្នុងពិធីបិទសន្និបាតក្រសួងរៀបចំដែនដី ​នគរូបនីយកម្ម និងសំណង់ កាលពីថ្ងៃទី២៧ ខែធ្នម្សិលមិញ សម្ដេចតេជោ នាយករដ្ឋមន្ត្រី បានជំរុញទៅក្រសួង និងអាជ្ញាធរ​ពាក់ព័ន្ធ ដោះស្រាយជូនប្រជាពលរដ្ឋរស់នៅជុំវិញបឹងទន្លេសាប ដោយធ្វើ​បច្ចុប្បន្នភាព​ផែនទី​តាមខេត្តនីមួយៗ កែសម្រួលព្រំប្រទល់តំបន់២ និងតំបន់៣ ​និងកាត់ឆ្វៀលទីតាំងដី ដែលប្រជាជន​រស់នៅពីយូរមកហើយ ។

សម្ដេចតេជោ បានសង្កត់ធ្ងន់ថា ការងារនេះ ​មិនត្រូវអូសបន្លាយតទៅទៀតនោះទេ ​ហើយអាជ្ញាធរ ខេត្តពាក់ព័ន្ធ ត្រូវចូលរួមធ្វើការងារនេះ ។

របាយការណ៍បូកសរុបលទ្ធផលការងារ ​ប្រចាំឆ្នាំ២០២២ និងលើកទិសដៅអនុវត្តបន្ត ឆ្នាំ២០២៣ នៃក្រសួងរៀបចំដែន ​នគរូបនីយកម្ម និងសំណង់ បានបង្ហាញថា លទ្ធផលការអនុវត្តវិធានការ​ទប់ស្កាត់ការ ​ទន្ទ្រានដីរដ្ឋ​ ក្នុងដែនព្រៃលិចទឹកតំបន់ទន្លេសាប ​មានខេត្តកំពង់ឆ្នាំង ​បាត់ដំបង ពោធិ៍សាត់ ​សៀមរាប កំពង់ធំ និងខេត្តបន្ទាយមានជ័យ​ រាជរដ្ឋាភិបាល បាន​សម្រេចកែសម្រួល​ព្រំប្រទល់តំបន់៣ ​និងតំបន់២ ​ដោយផ្ទៃដីបឹងទន្លេសាប សរុបទំហំជាង២ម៉ឺន ៤ពាន់ហិកតា ផ្ដល់​ដល់ពលរដ្ឋជាង ១ម៉ឺន៥ពាន់គ្រួសារ ។

របាយការណ៍ បានបញ្ជាក់ថា ផ្ទៃដីទំហំជាង១ម៉ឺន ១ពាន់ហិកតា​ ផ្ដល់​ជា​កម្មសិទ្ធិជូនប្រជាពលរដ្ឋ ចំនួនជាង ១ម៉ឺន២ពាន់គ្រួសារ ​និងផ្ទៃដីជាង១ម៉ឺន៣ពាន់ហិកតា ​និងផ្ដល់​ជាសិទ្ធិកាន់កាប់ និង​អាស្រ័យផលជូនប្រជាពលរដ្ឋចំនួន ៥៣០៨គ្រួសារ ៕អត្ថបទ៖ បាន សុខរិទ្ធិ