កំពង់ឆ្នាំង ៖ ចាប់ពីថ្ងៃទី២៥ ខែមិថុនា ឆ្នាំ២០២០ រហូតដល់ថ្ងៃ២៥ ខែធ្នូ ឆ្នាំ២០២២ រាជរដ្ឋាភិបាលកម្ពុជា បានចំណាយ​ថវិកា​ជិត៤លានដុល្លារ​ហើយ ផ្តល់ឲ្យពលរដ្ឋក្រីក្រ និងពលរដ្ឋងាយរងគ្រោះ​ដោយ​សារកូវីដ-១៩ នៅក្នុងស្រុកកំពង់លែង ខេត្តកំពង់ឆ្នាំង។ នេះបើតាមសេចក្តីជូនដំណឹងរបស់មន្ទីរសង្គមកិច្ច អតីតយុទ្ធជន និងយុវនីតិសម្បទា ចេញថ្ងៃទី២៨ ខែធ្នូ ឆ្នាំ២០២២។

ប្រជាពលរដ្ឋក្រីក្រ និងងាយរងគ្រោះដោយសារកូវីដ-១៩បានអោយដឹងថា៖ ពួកគាត់បាន​ទទួល​សាច់ប្រាក់​តាំងពីអំឡុងឆ្នាំ២០២០មក ដល់បច្ចុប្បន្ន ពីសម្តេចតេជោ ហ៊ុន សែន ប្រមុខរាជរដ្ឋាភិបាល តាមរយៈក្រសួងសង្គមកិច្ច អតីតយុទ្ធជន និងវនិតិសម្បទា។ ក្រោយពីទទួលបានថវិកានេះ ក្នុងបរិបទកូវីដ១៩ ពួកគាត់អាចចិញ្ចឹមជីវិត និងក្រុមគ្រួសារបានមួយចំណែក តែមិនលំបាកឡើយ ។ ប្រជាពលរដ្ឋទាំងជិត៣ពាន់គ្រួសារ បានថ្លែងអំណរគុណដល់សម្តេចតេជោ ហ៊ុន សែន ដែលបានយកចិត្តទុកដាក់ជួយដល់កូនចៅ ដែលកំពុងជួបប្រទះនឹងការខ្វះខាត ដោយសារតែវត្តមានជម្ងឺកូវីដ១៩។

លោក ឈាង ចន្ធី ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទា បានអោយដឹងថា៖ ចាប់ពីថ្ងៃទី២៥ ខែមិថុនា ឆ្នាំ២០២០ រហូតដល់ថ្ងៃ២៥ ខែធ្នូ ឆ្នាំ២០២២ ប្រជាពលរដ្ឋគ្រួសារក្រីក្រ និងងាយរងគ្រោះអំឡុងពេលកូវីដ១៩​នៅក្នុងខេត្តកំពង់ឆ្នាំង​សរុប​ចំនួន២៧៧៨២គ្រួសារ ហើយរាជរដ្ឋាភិបាលបានចំណាយប្រាក់ប្រមាណជាង៣៤លាន៥សែនដុល្លា ចំណែកនៅ​ក្នុង​ស្រុកកំពង់លែងវិញមានជិត៣ពាន់គ្រួសារ និងចំណាយថវិកាអស់ជិត៤លានដុល្លា។ លោកបានអំពាវនាវឲ្យប្រជាពលរដ្ឋទៅបើកប្រាក់ឧបត្ថម្ភរបស់ខ្លួននៅក្នុងខែធ្នូនេះ នៅតាមបញ្ជរវីង ដោយមិនចាំបាច់ទៅ​សាលាឃុំ-សង្កាត់​ជាថ្មីឡើយ ចំពោះគ្រួសារក្រីក្រ​ដែលបានផ្ទៀងផ្ទាត់​រួចហើយ​កាលពីខែមុន។ រាជរដ្ឋាភិបាលកម្ពុជាបានប្រកាសដាក់ឲ្យអនុវត្តកម្មវិធីឧបត្ថម្ភសាច់ប្រាក់ជួយដល់ប្រជាពលរដ្ឋក្រីក្រ និងងាយរងគ្រោះក្នុង​អំឡុងពេល​នៃជំងឺកូវីដ១៩នេះ កាលពីថ្ងៃទី២៥ ខែមិថុនា ឆ្នាំ២០២០៕ ដោយ ៖ ហុង វាស្នា