មណ្ឌលគិរី៖ សម្រស់ធម្មជាតិរបស់ខេត្តមណ្ឌលគិរី ដែលគ្រប់ដណ្ដប់ទៅដោយវាលស្មៅពណ៌មាស​ក្នុងរដូវកាលនេះ ថែមទាំងប្រជុំភ្នំ តូចធំ ខ្យល់អាកាសល្អបរិសុទ្ធ បានក្លាយជាជម្រើសលំហែកាយ​ដ៏ទាក់ទាញរបស់អ្នកទេសចរ ហើយនៅក្នុងឱកាសបុណ្យ ឆ្លងឆ្នាំសកល នៅចុងសប្ដាហ៍នេះ ខេត្តមណ្ឌលគិរី ​ក៏នឹងមានភ្ញៀវទេសចររាប់ម៉ឺននាក់ចូលមកកម្សាន្ត​ ព្រោះយោងតាម របាយការណ៍​របស់​មន្ទីរទេសចរណ៍ខេត្ត ផ្ទះសំណាក់ សណ្ឋាគារ និងរីសត ជាង៨០ភាគរយ ត្រូវបានកក់ពេញអស់ហើយ។

តាមការសង្កេតឃើញថា កាលពីថ្ងៃសៅរ៍-អាទិត្យសប្ដាហ៍មុន ក្រុងសែនមនោរម្យ ចាប់ផ្ដើម​មាន​អ្នកដំណើរ​ជាច្រើន ចូលកម្សាន្តជាបណ្ដើរៗ ​និងបានធ្វើឲ្យខេត្តមណ្ឌលគិរី ​មាន​ភាពអ៊ូអរ​មួយ​កម្រិតផងដែរ ។

លោក ពាត សុវណ្ណាល័ក្ខ ជាម្ចាស់អាជីវកម្មផ្ទះសំណាក់មួយកន្លែងនៅក្នុងក្រុងសែនមនោរម្យ បាន​លើកឡើងថា មួយរយៈចុងក្រោយនេះ ​ឃើញថា ចំនួនភ្ញៀវមានការកើនឡើងច្រើន។ ចំណែក​ឱកាសបុណ្យឆ្លងឆ្នាំសកលខាងមុខ ផ្ទះសំ ណាក់​ របស់លោក ក៏ត្រូវបានភ្ញៀវកក់បន្ទប់​ពេញ​ទាំង​អស់តែម្ដង ។

ប្រធានមន្ទីរទេសចរណ៍ខេត្តមណ្ឌលគិរី ​លោក សេង សឿន បានឲ្យដឹងថា នៅឱកាសបុណ្យឆ្លងឆ្នាំ​សកលនេះ ផ្ទះ សំណាក់ ​សណ្ឋាគារ ត្រូវបានភ្ញៀវកក់បន្ទប់សម្រាកប្រហែល៨០ទៅ៨៥%ហើយ ។ ក្នុងនោះមន្ទីរ ​ក៏បានផ្សព្វផ្សាយដល់ ​សណ្ឋាគារ ម៉ូតែល បូទិច ផ្ទះសំណាក់ រមណីយដ្ឋាន​ទេសចរណ៍​ ដែលមានសេវាកម្មស្នាក់នៅ​ និងតង់ស្នាក់នៅ ​ត្រូវរៀបចំ ​សណ្តាប់ធ្នាប់ តុបតែង​លម្អភ្លើង​ រក្សាអនាម័យ​ឲ្យបានល្អជូនអ្នកទេសចរ ​ចំណែកនៅតាមភោជនីយដ្ឋាន អាហារដ្ឋាន ត្រូវ ត្រៀមផ្តល់សេវា ​និងមិនត្រូវដំឡើងតម្លៃនាថ្ងៃបុណ្យនេះទេ ។

លោក បានឱ្យដឹងថា មានរៀបចំតុបតែងលម្អនៅទំនប់ទឹកសែនសុខដុម និងទំបន់សែនមនោរម្យ តាមទីសាធារណៈ នានា ក្នុងក្រុងសែនមនោរម្យ ដើម្បីត្រៀមបាញ់កាំជ្រួញអបអរថ្ងៃឆ្លងឆ្នាំសកល​២០២២ ចូលឆ្នាំ២០២៣ ​ហើយក៏បាន​ ត្រៀមរៀបចំ​ឱ្យមានការប្រគំតន្ត្រីកម្សាន្ត ការតាំង​ពិព័រណ៍​សកម្មភាពការងារសមិទ្ធផល​ផ្សេងៗ ​និងពិព័រណ៍អាជីវកម្ម ​ផ្សេងៗផងដែរ ៕អត្ថបទ៖ អ៊ិត ភីរុណ