ភ្នំពេញ៖ ថ្ងៃទី២៩ ខែធ្នូ ឆ្នាំ២០២២ ជាខួបទី ២៤ឆ្នាំ ​ នៃការអនុវត្តជោគជ័យនយោបាយឈ្នះឈ្នះ របស់​ប្រមុខរាជរដ្ឋាភិបាលកម្ពុជា ​ដែលយុវជន​ មើលឃើញ ​នយោបាយឈ្នះ ឈ្នះ នឹងបន្តនាំ​មក​នូវសន្តិភាព ​និងការរីកចម្រើន ។

ថ្ងៃទី២៩ ខែធ្នូ រាជរដ្ឋាភិបាលកម្ពុជា បានកំណត់ជាទិវានយោបាយឈ្នះ ឈ្នះ។ រយៈពេល ២៤ឆ្នាំ នៃការបញ្ចប់សង្គ្រាមស៊ីវិលទាំងស្រុង ២៩ ធ្នូ ១៩៩៨ មកទល់នាពេលបច្ចុប្បន្ននេះ ​យុវជនកម្ពុជា ក៏ដូចជាប្រជាពលរដ្ឋគ្រប់រូប អាចទទួលបានរស់នៅដោយភាពសុខសាន្ត រស់នៅដោយភាព​ភ័យខ្លាច ទទួលបានសិទ្ធិ និងរស់មើលឃើញពីការរីកចម្រើនរបស់ប្រទេសជាតិជាបន្តបន្ទាប់។

ជាយុវជន ទទួលបានផ្លែការពីការបញ្ចប់សង្គ្រាមស៊ីវិលទាំងស្រុងដោយនយោបាយឈ្នះ ឈ្នះ ពួកគេមានភាពជឿជាក់ពីដំណើរប្រព្រឹត្តិទៅប្រកបដោយភាពវិជ្ជមានរបស់កម្ពុជា។ ភាពវិជ្ជមានដែលពួកគេសំដៅនេះ ​គឺជាការរស់ដោយសុខសាន្តទាំងផ្លូវកាយ ​ផ្លូវចិត្ត ពុំមានការ​ព្រួយបារម្ភ។

ម្យ៉ាងវិញទៀត ពួកគេជឿជាក់ថា ការរស់ក្នុងសង្គមសន្តិភាព ​និងការរស់នៅដោយមានសាមគ្គីភាព ពុំមានការបែកបាក់ផ្ទៃក្នុងដូចសព្វថ្ងៃ ​គឺនឹងនាំកម្ពុជាឆ្ពោះទៅបន្តការរីកចម្រើន។

គួររម្លឹកថា កម្ពុជាទោះបីមានថ្ងៃជ័យជំនះ ​៧មករា ឆ្នាំ ១៩៧៩ ​ជា​ថ្ងៃផ្ដួល​រំលំរបបប្រល័យពូជសាសន៍​ខ្មែរក្រហម និង​កិច្ច​ព្រមព្រៀង​ទីក្រុងប៉ារីស ​ថ្ងៃទី២៣​ ខែតុលា ឆ្នាំ១៩៩១ ​កម្ពុជានៅតែបន្តមានការ​ប្រយុទ្ធ​គ្នារវាងខ្មែរ​ និងខ្មែរនៅឡើយ។

សង្គ្រាមខ្មែរ និងខ្មែរគ្រប់ភាគី ​បាន​បញ្ចប់ទាំងស្រុង​ ក្នុងឆ្នាំ ១៩៩៨ ក្រោមការអនុវត្ត​ដោយជោគជ័យ​នៃ​នយោបាយឈ្នះឈ្នះ ក្រោមការដឹកនាំរបស់សម្ដេចតេជោ ​ហ៊ុនសែន ​នាយករដ្ឋមន្រ្តីកម្ពុជា។

រាជរដ្ឋាភិបាល បាន​កសាងវិមាន ឈ្នះ ឈ្នះ ដោយមានការតម្កល់ទុកនូវនិមិត្តរូប វត្ថុតាង ដែល​បង្ហាញ​ពី​ដំណើរការតស៊ូសង្គ្រោះប្រទេសជាតិ​ ព្រមទាំង​សមិទ្ធផលនៃការកសាង និង​ការពារ​មាតុភូមិទុកជាការចងចាំ​ និងជាមេរៀន៕ អត្ថបទ៖ គឹមហុក