ភ្នំពេញ៖ នាយឧត្តមសេនីយ៍ អ៊ី ឈាន រដ្ឋលេខាធិការក្រសួងការពាជាតិ និងជាអតីតមេទ័ព នៃ របបកម្ពុជាប្រជាធិបតេយ្យ បានអះអាងថា បើគ្មានសម្ដេចតេជោ ហ៊ុន សែន នាយករដ្ឋមន្ត្រី គឺគ្មាននយោបាយឈ្នះ ឈ្នះ ហើយក៏គ្មានសុខសន្តិភាពដូចរាល់ថ្ងៃនេះដែរ ។
ក្នុងកិច្ចសម្ភាសន៍ជាមួយ BTV ក្នុងពិធីអបអរខួប២៤ឆ្នាំ នៃជ័យជំនះនយោបាយឈ្នះ ឈ្នះ នៅថ្ងៃទី២៩ ខែធ្នូ ឆ្នាំ២០២២ នាយឧត្តមសេនីយ៍ អ៊ី ឈាន មានប្រសាសន៍ថា កាលពី ជាង២០ឆ្នាំមុន បានទទួលយកពេញទំហឹង នូវគោលនយោបាយ ៣ខ របស់សម្ដេចតេជោ ក្នុង នោះទី១. ការរស់រាន, ទី២. ការរក្សានូវតួនាទី មុខដំណែង និងទី៣. ការរក្សានូវទ្រព្យសម្បត្តិ នេះហើយបានធ្វើឲ្យមានការជឿទុកចិត្ត ចំពោះសម្ដេចតេជោ ។
ឯកឧត្តម បានបង្ហាញការគាំទ្រចំពោះគោលនយោបាយឈ្នះ ឈ្នះ របស់សម្ដេចតេជោ ធ្វើឲ្យប្រទេសជាតិមានការរីកចម្រើនលើគ្រប់វិស័យ និងធ្វើឲ្យកម្ពុជា មានកិត្យានុភាពទៅលើ ឆាក់អន្តរជាតិ រួមទាំងការទទួលបានជោគជ័យ ដែលកម្ពុជាធ្វើជាម្ចាស់ផ្ទះ នៃកិច្ចប្រជុំអាស៊ាន ប្ដូរវេន ឆ្នាំ២០២២នេះផងដែរ ។
គួរបញ្ជាក់ថា នាយឧត្តមសេនីយ៍ អ៊ី ឈាន ធ្លាប់មានតួនាទីជាមេបញ្ជាការមួយរូបរបស់ ប៉ុល ពត កាន់ទិសខេត្តប៉ៃលិន ហើយបានធ្វើសមាហរណកម្មចូលរួមជាសម្ដេចតេជោ ហ៊ុន សែន កាលពីជាង ២០ឆ្នាំមុន នឹងបានក្លាយជាអភិបាលខេត្តប៉ៃលិន ហើយបានចាត់ទុកថា ជាតួអង្គមួយផងដែរ ធ្វើឲ្យនយោបាយឈ្នះ ឈ្នះ របស់រាជរដ្ឋាភិបាលទទួលបានជោគជ័យ ៕ អត្ថបទ បាន សុខរិទ្ធិ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
