ភ្នំពេញ៖ រាជរដ្ឋាភិបាលកម្ពុជាបានកំណត់យកថ្ងៃទី២៩ ខែធ្នូជារៀងរាល់ឆ្នាំ ដើម្បីជួបជុំមហាជនប្រារព្ធពិធីចងចាំសន្តិភាព អរគុណសន្តិភាព និងការបញ្ចប់សង្រ្គាមស៊ីវិលនៅកម្ពុជា។

សម្រាប់ថ្ងៃជាប្រវត្តិសាស្ត្រនេះដែរ បណ្តាអ្នកធ្វើការដើម្បីសន្តិភាព​ និងបណ្តាពលរដ្ឋ ចាត់ទុកដូចគ្នាថា ថ្ងៃ២៩ ខែធ្នូ ឆ្នាំ១៩៩៨ គឺជាថ្ងៃបិទបញ្ចប់សង្រ្គាមស៊ីវិលនៅកម្ពុជា ​ហើយកម្ពុជា បានចាប់ផ្តើមមានពន្លឺសុខសន្តិភាព​ និងការរីកចំរើនរហូតមកដល់បច្ចុប្បន្ន។

លោកស្រី ហូ សុជីវណ្ណនី ប្រធានគណៈកម្មាធិការនារី ​ដើម្បីសន្តិភាពនៅកម្ពុជា ក៏ដូចបណ្តា​ពលរដ្ឋផ្សេងៗទៀត បានថ្លែងប្រាប់BTV ថា ២៩-ធ្នូ-១៩៩៨ គឺជាថ្ងៃដែលកម្ពុជាចាប់ផ្តើមមាន​សុខសន្តិភាព ក្រោយការអនុវត្តយុទ្ធសាស្ត្រនយោបាយឈ្នះ-ឈ្នះរបស់ ​សម្តេចតេជោ ហ៊ុន សែន នាយករដ្ឋមន្រ្តីកម្ពុជា​ ហើយក៏ជាថ្ងៃ ​នៃការធ្វើសមាហរណកម្មកងកម្លាំងឧទ្ទាមខ្មែរក្រហម ចុះចូលជាមួយរាជរដ្ឋាភិបាល ​ហើយសង្រ្គាម​បានបិទបញ្ចប់ទាំងស្រុង នាំមកនាំសុខ​សន្តិភាព​ពេញលេញ គ្របដណ្តប់ទូទាំងប្រទេស។

ពាក់ព័ន្ធ មេដឹកនាំឧទ្ទាមខ្មែរក្រហម ចុះចូលជាមួយរាជរដ្ឋាភិបាលនោះ ​កន្លងមកសម្តេចតេជោ នាយករដ្ឋមន្ត្រី ហ៊ុន សែន ធ្លាប់​បានពន្យល់ពីមូលហេតុដែលនាំយកមេដឹកនាំខ្មែរក្រហម​ទៅជួប​ដោយផ្ទាល់​នៅផ្ទះរបស់សម្តេចផងដែរ។ ការជួបនាពេលនោះ​ គឺមាន​បំណង​ចង់ផ្ញើសារ​ចំនួន៣ ទៅកាន់​កងទ័ពខ្មែរក្រហម ប្រជាជន និងសហគមន៍អន្តរជាតិ។

សម្រាប់សារទី១ គឺផ្ញើរជូនកងកម្លាំងខ្មែរក្រហម ឲ្យបញ្ឈប់ការប្រយុទ្ធ ​ព្រោះមេដឹកនាំចុះចូលហើយ, សារទី២ ជូនប្រជាពលរដ្ឋខ្មែរថា​ សង្គ្រាមបានបិទបញ្ចប់ទាំងស្រុងហើយ ព្រោះប្រជាជនរង់ចាំនូវ​ការ​បិទបញ្ចប់ភ្លើងសង្គ្រាម និងសារទី៣ ​គឺជាសារជូនទៅសហគមន៍អន្តរជាតិ​ ឲ្យមកវិនិយោគ ឬធ្វើទេសចរណ៍ ​ព្រោះកម្ពុជាគ្មានសង្គ្រាមទៀតទេ គឺមានតែសុខសន្តិភាពពេញលេញ ទូទាំងផ្ទៃប្រទេស៕ អត្ថបទ ស៊ុម សុខជា