ភ្នំពេញ៖ ក្រសួងប្រៃសណីយ៍ និងទូរគមនាគមន៍ បានធ្វើការតេស្តសាកល្បងក្នុងការវាស់ស្ទង់គុណភាពសេវាទូរគមនាគមននៅតំបន់មួយចំនួនពិសេសតាមបុរី ដោយនៅពេលនេះ ក្រសួងរួមជាមួយក្រុមហ៊ុនប្រតិបត្តិករនានា ដើម្បីរៀបចំដាក់បន្ថែមនូវបង្គោលអង់តែន ដើម្បីលើកកម្ពស់គុណភាពសេវាទូរគមនាគមនឲ្យកាន់តែល្អប្រសើរជាងមុន ដោយចាប់ផ្តើមពីខណ្ឌដូនពេញតទៅ។
ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ នៅក្នុងកិច្ចសម្ភាសន៍ជាមួយទូរទស្សន៍ព័ត៌ ប៊ីធីវី នៅព្រឹកថ្ងៃទី២៨ ធ្នូ ឆ្នាំ២០២២កន្លងទៅ បានមានប្រសាសន៍ថា ការជួបប្រទះបញ្ហាប្រឈមទាក់ទង នឹងសេវាទូរស័ព្ទចល័ត បានធ្វើឲ្យប៉ះពាល់ដល់ប្រជាពលរដ្ឋយ៉ាងច្រើន ក្នុងការធ្វើការងារ ការប្រកបអាជីវកម្ម ក៏ដូចជាការសិក្សាជាដើម ដែលបញ្ហានេះ ក៏កើតមានជាច្រើនឆ្នាំមកហើយដែរ ជាពិសេសនៅពេលមានកំណើនលំនៅឋាន និងប្រជាពលរដ្ឋ។
ឯកឧត្តម បានឲ្យដឹងថា នៅទីក្រុងភ្នំពេញ បានធ្វើការសាកល្បងគ្រប់កន្លែងទាំងអស់ ដោយចំណាយពេលពី២ ទៅ៣ខែ ក្នុងការធ្វើតេស្ត ដើម្បីផ្តល់សេវាឲ្យល្អប្រសើរជូនប្រជាពលរដ្ឋ។
ឯកឧត្តមរដ្ឋមន្រ្តី សង្ឃឹមយ៉ាងមុតមាំថា នៅឆ្នាំ២០២៣ខាងមុខ នៅទូទាំងក្រុងភ្នំពេញ នឹងមានសេវាល្អប្រសើរជាងមុន ក្នុងការប្រើប្រាស់ប្រាស្រ័យទាក់ទងគ្នា ហើយ ក្រសួងក៏នឹងពង្រីកការងារនេះនៅតាមបណ្តាខេត្តទាំងអស់។
បច្ចុប្បន្នក្រុមការងារជំនាញនៃក្រសួងប្រៃសណីយ៍កំពុងរៀបចំ និងបំពាក់ឧបករណ៍វាស់ស្ទង់គុណភាពសេវានៅតំបន់រាជធានីភ្នំពេញ ដើម្បីលើកកម្ពស់គុណភាពសេវាទូរគមនាគមន៍៕អត្ថបទ៖ បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
