ភ្នំពេញ៖ លោកជំទាវវេជ្ជបណ្ឌិត យក់ សម្បតិ្ត រដ្ឋលេខាធិការប្រចាំការ តំណាងដ៏ខ្ពង់ខ្ពស់ឯកឧត្តម​សាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល​ រួមជាមួយឯកឧត្តម ហុក គឹមចេង អគ្គ​នាយកបច្ចេកទេសសុខាភិបាល ​និងឯកឧត្តម សុខ សំអាង​ អគ្គនាយករដ្ឋបាល និងហិរញ្ញវត្ថុ និង​អនុប្រធានអាកាសយានដ្ឋានអន្តរជាតិភ្នំពេញ ​និង​សហការីមន្ត្រីចត្តាឡីស័ក ​បាន​អញ្ជើញចុះ​ពិនិត្យ​ទីតាំង​ដាក់បន្ថែមម៉ាស៊ីនស្កេនកម្តៅចំនួន០៣គ្រឿង ​លើអ្នកដំណើរភ្ញៀវជាតិ​ និងអន្តរជាតិ ចូល​មកកាន់កម្ពុជា តាមច្រកទ្វារអន្តរជាតិភ្នំពេញ ​និងច្រកទ្វារVIP នាព្រឹកថ្ងៃទី២៩ ខែធ្នូ ឆ្នាំ២០២២នេះ។

លោកជំទាវវេជ្ជបណ្ឌិត បានប្រាប់BTV ព័ត៌មានថា ក្រុមការងារក្រសួង និងអាជ្ញាធរផ្នែក​ពាក់ព័ន្ធ​ទាំងអស់ បានចុះមកពិនិត្យអាកាសយានដ្ឋានអន្តរជាតិភ្នំពេញ ​ដែលជាទីតាំងទទួលអ្នកដំណើរ​យ៉ាង​ច្រើន និងដើម្បីពិនិត្យទីតាំងដាក់បន្ថែមនូវម៉ាស៊ីនស្កេនកម្តៅ​ចំនួន៣​គ្រឿងទៀត នៅ​ច្រក​ចេញចូល VIP ចំនួន១គ្រឿង ​និងធម្មតាចំនួន២គ្រឿង ​ដើម្បីធ្វើការតាមដានសុខភាពអ្នកដំណើរ​ដែលចូលមកកាន់កម្ពុជា ​ជាពិសេសដើម្បីឲ្យប្រាកដប្រជាថា គ្រប់អ្នកដំណើរដែលអញ្ជើញ​ចូល​មកកាន់កម្ពុជា មានកម្តៅធម្មតា ​ក្នុងករណីរកឃើញថា ​មានកើនកម្តៅ ​រហូតដល់៣៧.៥អង្សា ក្រុម​គ្រូពេទ្យនឹងអញ្ជើញអ្នកដំណើរទៅពិនិត្យសុខភាព ​ដើម្បីរក្សាសុខភាពជូនគាត់។

ទន្ទឹមនឹងនោះក្រសួងសុខាភិបាល ក៏បានដាក់នូវម៉ាស៊ីន​ស្កេនកម្តៅ​នៅអាកាសយានដ្ឋាន​អន្តរជាតិ​សៀមរាប និងនៅតាមច្រកព្រំដែនអន្តរជាតិផងដែរ ​ដើម្បីប្រាកដប្រជាថា អ្នកធ្វើដំណើរ​ទស្សនកិច្ច​មកកម្ពុជា ​មកលេងបងប្អូននៅក្នុងឱកាសឆ្លងឆ្នាំសកល​ ពួកគាត់មានសុខភាពល្អ។

លោកជំទាវវេជ្ជបណ្ឌិត យក់ សម្បត្តិ ក្នុងនាមក្រសួងសុខាភិបាល ​ក៏ដូចជាថ្នាក់ដឹកនាំ តែងតែ​យក​ចិត្តទុកដាក់ ​ជាពិសេស​សម្តេចតេជោ ហ៊ុន សែន នាយករដ្ឋមន្ត្រី ​តែងតែ​អំពាវនាវដល់ប្រជាពលរដ្ឋ មានការប្រយ័ត្នប្រយែង​ និងអនុវត្តវិធានការ៣កុំ ៣ការពារ ​ជាពិសេសប្រជាពលរដ្ឋដែលមិនទាន់​ទទួល​វ៉ាក់សាំងបង្ការជំងឺកូវីដ-១៩ សូមអញ្ជើញទៅទទួលវ៉ាក់សាំង​នៅគ្រប់ទីកន្លែង ដូចជា​នៅ​មណ្ឌលសុខភាព ​មន្ទីពេទ្យបង្អែកដែលនៅជិតផ្ទះ​ ជាពិសេសបើបងប្អូនប្រជាពលរដ្ឋអញ្ជើញទៅ​កម្សាន្តនៅទីតាំងរមណីយដ្ឋានផ្សេងៗ​ ត្រូវតែប្រយ័ត្នប្រយែង​ បើទោះបីថា​កម្ពុជា មានការ​ថមថយ​នូវអត្រាឆ្លងកូវីដ-19​ ប៉ុន្តែយើង​ត្រូវ​តែ​ប្រយ័ត្នប្រយែង៕អត្ថបទ រដ្ឋា