កំពង់ស្ពឺ៖ រថយន្តសង្គ្រោះបន្ទាន់ចំនួន ៣គ្រឿង ជាអំណោយរបស់សម្តេចតេជោ ហ៊ុន សែន នាយករដ្ឋមន្ដ្រី នៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ត្រូវបាន​ប្រគល់​ជូនដ​ល់​វិទ្យាស្ថាន​ទ័ពជើងគោក បញ្ជាការដ្ឋានកងទ័ពជើងទឹក និងបញ្ជាការដ្ឋានរថក្រោះ។

ពិធីប្រគល់បានធ្វើឡើងក្រោមវត្តមាន នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយ​សេនាធិការ​ចម្រុះ នៃកងយោធពលខេមរភូមិន្ទ លោកឧកញ៉ាបណ្ឌិត ជា រតនា និងលោកឧកញ៉ា សុខ វណ្ណា នៅវិទ្យាស្ថានទ័ពជើងគោក នៅខេត្ដកំពង់ស្ពឺ។

នាយឧត្តមសេនីយ៍ ឥត សារ៉ាត់ បានថ្លែងអំណរគុណយ៉ាងជ្រាលជ្រៅជូនសម្តេចតេជោ ហ៊ុន សែន និង​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានផ្ដល់រថយន្ដនាឱកាសនេះ ដើម្បី​ផ្ដល់​ភាព​ងាយស្រួល សម្រាប់ដឹកជញ្ជូនសង្រ្គោះ អ្នកជំងឺបានទាន់ពេលវេលា។ នាយឧត្តមសេនីយ៍ អគ្គ​មេបញ្ជាការរង ក៏បានថ្លែងអំណរគុណចំពោះទឹកចិត្តប្រកបដោយសប្បុរសធម៌របស់ លោក​ឧកញ៉ា​បណ្ឌិត ជា រតនា ដែលកន្លង​មក​បាន​ចូល​រួម​ចំណែក​ជា​មួយ​រាជ​រដ្ឋាភិបាល​ក្នុង​ការ​បម្រើ​សេវា​សាធារណៈ ពិសេសផ្នែក សុខាភិបាល ដែលជាកិច្ចការសំខាន់បំផុតមិនអាចខ្វះបាន។ នាយ​ឧត្តម​សេនីយ៍ ឥត សារ៉ាត់ បានបន្តថា រថយន្តសង្គ្រោះបន្ទាន់ទាំង៣នេះ នឹង​ប្រើ​ប្រាស់​ឲ្យ​ចំគោល​ដៅ ប្រកបដោយប្រសិទ្ធភាពជូនប្រជាពលរដ្ឋ ដោយមិនប្រកាន់និន្នាការនយោបាយអ្វីឡើយ។

ក្នុងឱកាសនោះ លោកឧកញ៉ាបណ្ឌិត ជា រតនា ទីប្រឹក្សាផ្ទាល់សម្ដេចតេជោ ហ៊ុន សែន សង្ឃឹម​ថា​ រថយន្ដ​នេះ នឹងបានជួយដល់ប្រជាពលរដ្ឋ ដែលត្រូវការសេវាសង្គ្រោះបន្ទាន់ជាចាំបាច់ ដើម្បី​សង្គ្រោះ​ជីវិត​បានទាន់ពេលវេលា ហើយនឹងបន្ដជួយ និង បំពេញ​តម្រូវ​ការ​របស់​ប្រជាពលរដ្ឋ​បន្ថែម​ទៀត ក្នុងការបម្រើសេវាសុខភាពនេះឱ្យកាន់តែប្រសើរ។ 

សូមបញ្ជាក់ថា រថយន្តសង្គ្រោះបន្ទាន់ទី៥៣, ៥៤, ៥៥ ដែលបានប្រគល់នៅពេលនេះ គឺ ១​គ្រឿង​ប្រគល់ជូន វិទ្យាស្ថានកងទ័ពជើងគោក ១គ្រឿងជូនទៅបញ្ជាការដ្ឋានកងទ័ពជើងទឹក និង ១គ្រឿង​ផ្សេងទៀត ជូនទៅបញ្ជាការដ្ឋានរថក្រោះ៕ អត្ថបទ៖ សូដាវណ្ណ