កំពត៖ សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា បានសម្តែងការសោកស្តាយចំពោះ គ្រោះអគ្គិភ័យ ឆេះកាស៊ីណូមួយ នៅក្នុងក្រុងប៉ោយប៉ែត កាលពីយប់ថ្ងៃទី២៨ ខែធ្នូ នេះ ដោយសម្តេចបានចាត់ទុកថា គឺជាសោកនាដកម្មដ៏អាក្រក់មួយ សម្រាប់ចុងឆ្នាំនេះ ដែលបានបណ្តាលឲ្យមនុស្សស្លាប់ និងរងរបួសរាប់សិបនាក់ ។
នៅក្នុងពិធីបើកការដ្ឋានស្តារ និងលើកកម្រិតគុណភាពផ្លូវជាតិលេខ៣១ និង៣៣ ស្ថិតក្នុងភូមិ សាស្ត្រខេត្តកំពត និងខេត្តកែប នាព្រឹកថ្ងៃទី៣០ ខែធ្នូ នេះ សម្តេចតេជោ ហ៊ុន សែន នាយករដ្ឋមន្រ្តី បាន សម្ដែងការចូលរួមមរណទុក្ខជាមួយក្រុមគ្រួសារជនរងគ្រោះក្នុងឧបទ្ទវហេតុដ៏សោកសៅនេះ ។
សម្តេចតេជោ ហ៊ុន សែន បានថ្លែងអំណរអគុណចំពោះអាជ្ញាធរថៃ ដែលបានខិតខំជួយពន្លត់អគ្គិភ័យ ដែលបានឆេះនៅក្នុងកាស៊ីណូនោះ និងថ្លែងអំណរគុណចំពោះសម្តេចក្រឡាហោម ស ខេង ឧបនាយករដ្ឋមន្រ្តី និងជារដ្ឋមន្រ្តីក្រសួងមហាផ្ទៃ ដែលបានចុះពិនិត្យហេតុការណ៍ដោយផ្ទាល់ផងដែរ ។
សម្តេចតេជោ ក៏បានប្រកាសផងដែរថា ចាប់ពីពេលនេះតទៅ រាល់អគារខ្ពស់ៗ នឹងត្រូវមានរថយន្ត, ឧបករណ៍ខ្ពស់ៗ និងទំនើបៗ សម្រាប់ត្រៀមបង្ការទប់ស្កាត់ និងពន្លត់អគ្គិភ័យ ដើម្បីធ្វើយ៉ាងណាកុំ ឱ្យមានឧបទ្ទវហេតុដ៏អាក្រក់កើតឡើង ដូចជាករណីនេះទៀត ៕អត្ថបទ៖ បាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
