មីយ៉ាន់ម៉ា៖ តុលាការយោធាសហភាពមីយ៉ាន់ម៉ា បានកាត់ទោសលោកស្រី អ៊ុងសាន ស៊ូជី ឱ្យជាប់​ពន្ធនាគាររយៈពេល៧ឆ្នាំបន្ថែមទៀត ដោយការកាត់ទោសឱ្យជាប់ពន្ធនាគារសរុបចំនួន ៣៣ ឆ្នាំ។ អតីតមេដឹកនាំជាប់ឆ្នោតតាមបែបប្រជាធិបតេយ្យរបស់សហភាពនេះ ត្រូវបានឃុំខ្លួន​នៅក្នុង​លំនៅឋាន​ចាប់​តាំងពីយោធាបានបណ្តេញរដ្ឋាភិបាលរបស់លោកស្រីក្នុងរដ្ឋប្រហារកាលពីខែកុម្ភៈ ឆ្នាំ២០២១។ ចាប់តាំងពីពេលនោះមក ​លោកស្រីត្រូវប្រឈមមុខនឹងការកាត់ទោសរយៈពេល ១៨ ខែលើ​បទចោទ​ប្រកាន់ចំនួន ១៩ករណី ​ដែលក្រុមសិទ្ធិមនុស្សនិយាយថា​ជាការធ្វើឡើងដើម្បីបន្លំ។ ក្រុមប្រឹក្សាសន្តិសុខអង្គការសហប្រជាជាតិ បានអំពាវនាវ​ឱ្យ​មានការដោះលែង​លោកស្រីកាលពី​សប្តាហ៍មុន៕