កំពត ៖ ករណីរំលោភយកដីចំណីព្រែក និងដងព្រែកមួយកន្លែងស្ថិតក្នុងភូមិត្រពាំងធំ ឃុំជុំក្រៀល ស្រុកទឹកឈូខេត្តកំពត ដំបូងឡើយ​បុគ្គល​រំលោភ​ត្រឹមបោះរបងឈើហ៊ុមព័ទ្ធ ប៉ុន្តែពេលរដ្ឋបាលស្រុកទឹកឈូចុះទៅឃាត់ និងចេញលិខិតឲ្យបញ្ឈប់​សកម្មភាព បុគ្គលនោះចាប់​ផ្តើម​ចាក់ដីលប់ ហើយរដ្ឋបាលស្រុកបានចេញលិខិតលើកទី២ ឲ្យកាយដីចេញវិញ បុគ្គលនោះក៏ចាប់រៀបរបងថ្មបេតុងហ៊ុមព័ទ ឥឡូវរដ្ឋបាល​ស្រុកចេញលិខិតទី៣ឲ្យរុះរើរបង និងកាយអាចម៍ចេញទៀត ចាំមើលតើបុគ្គលដែលគេស្គាល់ថាជាអ្នករកស៊ីដីឡូតិ៍ និងជាមន្ត្រី​សាលាខេត្ត​ផងនោះធ្វើអ្វីបន្តទៀត?

​

ឆ្លើយតបចំពោះភាពមិនអើពើរបស់អ្នកចាក់ដីបំពានយកដងព្រែក និងចំណីព្រែកក្បែរស្ពានក្បាលរមាស រួចហ៊ុមព័ទ្ធរបងបេតុងបម្រុង​កាន់កាប់​ជាកម្មសិទ្ធិស្ថិតក្នុងឃុំជុំក្រៀល អាជ្ញាធរស្រុកទឹកឈូបានសម្រេចធ្វើលិខិតផ្លូវការជាលើកទី៣ តម្រូវឱ្យបុគ្គលនោះរុះរើ និងកាយ​អាចម៍ដី​ចេញវិញអំឡុងពេល២០ថ្ងៃជាកំហិត។

លោក នាក់ សុវណ្ណារី អភិបាលស្រុកទឹកឈូបានបញ្ជាក់តាមទូរសព្ទថា ទោះបីមន្ត្រីរដ្ឋបាលស្រុកគ្រប់រូបមមាញឹក​ជាមួយកិច្ចការ​បង្ការទប់ស្កាត់​ការរីករាលដាលជំងឺកូវីដ១៩ក្តី ក៏រដ្ឋបាលស្រុកបានតាមដានដឹងថាការលបលួចហ៊ុមព័ទ្ធបំពានយកដីព្រែក និងដីចំណីព្រែក ក្នុងភូមិត្រពាំងធំ ឃុំជុំក្រៀលរបស់ឈ្មោះអេង សុខហេង នៅតែធ្វើសកម្មភាពបន្ត។ នេះជាទង្វើផ្គើនមួយដែលអាជ្ញាធរមិនអាចព្រងើយកន្តើយបានទេ ហើយវាជាកាតព្វកិច្ចដ៏ចាំបាច់ ក្នុងការរក្សាទ្រព្យសម្បត្តិរដ្ឋឱ្យនៅគងវង្ស។

លោកបានបញ្ជាក់ថាទោះបុគ្គលនោះអាងអ្វីនៅពីក្រោយក៏ដោយ រដ្ឋបាលស្រុកនឹងចេញលិខិតលើកទី៣ នៅថ្ងៃទី២១ ខែមេសានេះ ដែលជា​លិខិតចុងក្រោយតម្រូវឱ្យ បុគ្គលអ្នកប្រព្រឹត្ត ចាំបាច់ត្រូវរុះរើ និងកាយអាចម៍ដីចេញវិញ ដើម្បីរក្សាស្ថានភាពដើមក្នុងរយៈពេល២០ថ្ងៃជាកំហិត។

លោកអភិបាលស្រុកបានបញ្ជាក់ថា ក្នុងករណីបុគ្គលរូបនោះមិនអនុវត្តតាម រដ្ឋបាលស្រុកនឹងធ្វើរបាយការណ៍​ជូនឯកឧត្តម​អភិបាលខេត្ត​ដើម្បីស្នើសុំអយ្យការអមសាលាដំបូង ចាត់ការតាមនីតិវិធី ព្រោះបុគ្គលម្នាក់នោះបានដើរធ្វើសកម្មភាពជាច្រើនកន្លែងបង្កការលំបាកដល់​អាជ្ញាធរដែលត្រូវប្រឈមមុខដោះស្រាយឥតឈប់ឈរ។

គួរំលឹកថា លិខិតប្រមានលើកទី២ លេខ៤១/២១ស.ជ.ណ ចុះថ្ងៃទី១២ ខែមីនា ឆ្នាំ២០២១ បានបង្គាប់ឲ្យ លោកអេង សុខហេង បញ្ឈប់សកម្មភាព ហើយកាយអាចម៍ដីដែលបានចាក់ ដីចំណីព្រែក រំលោភចូលនិងដងព្រែកចេញវិញរយៈពេល៣ថ្ងៃជាកំហិត តែលោក អេង សុខហេង មិនត្រឹមតែមិនស្តាប់ទេ ថែមទាំងផ្គើនធ្វើរបងថ្មបេតុងកម្ពស់មួយសន្ទូងដៃមនុស្សចាស់ហ៊ុមព័ទ្ធដីចំណីព្រែក ស្ទើររួចរាល់មួយរភាគរយ៕អត្ថបទ ៖ សារឹម