ភ្នំពេញ៖ មកដល់ថ្ងៃទី៣០ ខែធ្នូឆ្នាំ២០២២នេះ ​នៅរាជធានីភ្នំពេញ ​គេសំគាល់ឃើញថា មាន​ទីតាំងកម្សាន្តសប្បាយនៅតាមទីសាធារណៈ​ ជាពិសេសការរៀបចំឆាកប្រគំតន្ត្រី Count down មិនតិចជាង៥កន្លែងនៅក្នុងរាជធានីភ្នំពេញ ​ត្រូវបានរៀបចំរួចរាល់អស់ហើយ ហើយមួយចំនួន​នឹងត្រូវរៀបចំប្រគំចាប់ពីយប់នេះតទៅ ​ ដើម្បីអបអរសាទរ ​និងការរាប់ថយក្រោយ ឆ្លងឆ្នាំសកលឆ្នាំ២០២២ ​ឈានចូលឆ្នាំ២០២៣នៅថ្ងៃស្អែកនេះ។

បើតាមការឲ្យដឹងពីលោក ម៉ម វាសនា ប្រធានមន្ទីរទេសចរណ៍រាជធានីភ្នំពេញ ​បានថ្លែងថា នៅក្នុងឱកាស​ថ្ងៃឆ្លងឆ្នាំសកល​ ឆ្នាំ២០២២ឈានចូលឆ្នាំ២០២៣នេះ ​នៅរាជធានីភ្នំពេញ ក្រៅពី​មានព្រឹត្តិការណ៍កម្សាន្តសប្បាយនៅវិមានឈ្នះ ឈ្នះ​ នៅតាមទីសាធារណៈរដ្ឋ និងឯកជននានា​ទៀត​គឺបានរៀបចំឆាកប្រគំតន្ត្រីរួចរាល់អស់ហើយ ដើម្បីអបអរសាទរការឆ្លងឆ្នាំសកល​ហើយ​ឆាកទាំង​នោះគឺមានសួនវឌ្ឍនៈមួយកន្លែង ​កោះពេជ្រ២កន្លែង ​សួនណាហ្កាមួយកន្លែង និងសួនវត្តបុទុមវត្តីមួយកន្លែងទៀតជាដើម។

បើតាមតំណាងក្រុមការងាររៀបចំឆាកប្រគំដន្ត្រីរបស់ទូរទស្សន៍បាយ័ន បានឲ្យដឹងថា នៅ​មជ្ឈមណ្ឌល​សន្និបាត​កោះពេជ្រ ​នឹងរៀបចំការប្រគំតន្ត្រី ​អបអរសាទរឆ្លងឆ្នាំ​សកលចាប់​ពី​យប់ថ្ងៃទី៣០ ​ខែធ្នូនេះតទៅ ​ខណៈឆាកប្រគំន្ត្រីនៅសួនវឌ្ឍនៈ ​នៅសួនក្រុងតាខ្មៅ និងតាម​ទីតាំង​កម្សាន្តសប្បាយនានាទៀតបានរៀបចំរួច​ និងមានការ​សមច្រៀងរាំ​ចាប់​ពីល្ងាចនេះតទៅដែរ អមដោយ​មានរៀបចំសួន វិថីម្ហូបអាហារនានាជាច្រើនកន្លែងទៀត។

ពលរដ្ឋនៅរាជធានីភ្នំពេញ ​បានថ្លែងថា ថ្ងៃឆ្លងឆ្នាំសកល​ ឆ្នាំនេះនៅរាជធានីភ្នំពេញ នឹងមាន​ភាពសប្បាយរីករាយអួរអរជាងបណ្តាឆ្នាំកន្លងមក ​ហើយពួកគេនឹងចូលរួមកម្សាន្តសប្បាយ​ទាំងនោះ​នៅថ្ងៃឆ្លងឆ្នាំដោយមានពាក់ម៉ាស់ ​រក្សាគន្លាត និងបន្តចាក់វ៉ាក់សាំង​តាមការអំពាវនាវរបស់​សម្តេចតេជោ ​ហ៊ុនសែន ​នាយករដ្ឋមន្ត្រីកម្ពុជា។

ឧត្តមសេនីយ៍ឯក ឆាយ គឹមខឿន​ អ្នកនាំពាក្យអគ្គស្នងការដ្ឋាន​នគរបាលជាតិ ​ថ្លែងថា នៅ​ក្នុងឱកាសថ្ងៃឆ្លងឆ្នាំសកលនេះ ​នៅតាមគោលដៅសាធារណៈមួយ​ចំនួន​នឹងត្រូវរឹតបន្តឹងសន្តិសុខ សណ្តាប់ធ្នាប់ ​ចរាចរណ៍ ​ប៉ុន្តែទោះយ៉ាងណា​ ឯកឧត្តម​ស្នើពលរដ្ឋចូលរួមកម្សាន្ត​សប្បាយ​ថ្ងៃឆ្លង​ឆ្នាំ​ក្នុង​ស្មារតី​ទទួល​ខុសត្រូវ ​បើស្រវឹង​សូម​កុំបើកបរគោរពច្បាប់ចរាចរណ៍ ចៀសវាង​គ្រោះចរាចរណ៍​ជាយថាហេតុ៕ អត្ថបទ ស៊ុម សុខជា