បាត់ដំបង៖ រដ្ឋបាលខេត្តបាត់ដំបង បានរៀបចំព្រឹត្តិការណ៍ដាក់តាំងបង្ហាញមុខម្ហូប និងបង្អែមខ្មែររបស់អ្នកខេត្តបាត់ដំបង ដែលល្បីល្បាញសម្រាប់ស្វាគមន៍ភ្ញៀវទេសចរ និងអបអរសាទរពិធីបុណ្យចូលឆ្នាំថ្មី ឆ្នាំសកល២០២៣។

ក្រៅពីការដាក់តាំងបង្ហាញម្ហូបអាហារ និងបង្អែមខ្មែររដ្ឋបាលខេត្តបានតុបតែងលម្អ រៀបចំភ្លើង​ពណ៌តាមស្ពាន សួនច្បារ អគារ និងទីសាធារណៈនានា ព្រមទាំងពង្រឹងការថែរក្សា​សន្តិសុខ​សណ្ដាប់ធ្លាប់ សុវត្ថិភាពដើម្បីបង្កលក្ខណៈសប្បាយរីករាយជូនប្រជាពលរដ្ឋ។

ក្នុងពិធីបើកព្រឹត្តិការណ៍ម្ហូបអាហារខ្មែរ នៅរាត្រីថ្ងៃទី៣០ ខែធ្នូ ឆ្នាំ២០២២ ឯកឧត្តម សុខ លូ អភិបាលខេត្តបាត់ដំបង ​បានថ្លែងថា ព្រឹត្តិការណ៍នេះមានរយៈពេល២ថ្ងៃចាប់ពីថ្ងៃទី៣០-៣១ខែធ្នូ ឆ្នាំ២០២២ ​ដើម្បីអបអរសាទរពិធីបុណ្យឆ្លងឆ្នាំសកល ​និងជាការជួបជុំក្នុងន័យសាមគ្គីភាព មិត្តភាព ប្រកបដោយស្មារតីកិច្ចសហប្រតិបត្តិការ និង​ការទទួលខុសត្រូវរួមគ្នាក្នុងការជំរុញការ​អភិវឌ្ឍ​វិស័យទេសចរណ៍​ និងព្រឹត្តិការណ៍នានាក្នុងភាពជាម្ចាស់ ជាខ្មែរអ្នកបាត់ដំបង​ ប្រកបដោយនិរន្តភាព ពិសេសជំរុញសកម្មភាពរួមគ្នាអនុវត្តន៍ជាមួយរាជរដ្ឋាភិបាលក្នុងការស្ដារសេដ្ឋកិច្ចជាតិឡើងវិញបន្ទាប់ពីវិបត្តិជំងឺកូវីដ១៩។

បន្ថែមពីនេះ ឯកឧត្តម បានស្នើដល់ភាគីពាក់ព័ន្ធ ជាពិសេសមន្ទីរទេសចរណ៍ ត្រូវផ្តោតលើការ​អភិវឌ្ឍ​ផលិតផលទេសចរណ៍ ​ការវិនិយោគ ​និងការពង្រឹងការឃោសនាផ្សព្វផ្សាយទេសចរណ៍ ពិសេសការ​ផ្សព្វផ្សាយពីម្ហូបអ្នកបាត់ដំបង ​ការគ្រប់គ្រង និងពង្រឹងគុណភាព​ឧស្សាហកម្ម​ទេសចរណ៍​ឱ្យកាន់តែល្អប្រសើរ ​និងរៀបចំនូវយន្តការទ្រទ្រង់វិស័យទេសចរណ៍ ការសម្រួលដល់ការ​ធ្វើដំណើរ និងដឹកជញ្ជូនក្នុងខេត្តបាត់ដំបង ឈរលើគោលការណ៍ធូរថ្លៃ សុវត្ថិភាព ផ្ដល់ភាពកក់ក្ដៅ និងស្នាមញញឹម។

ឯកឧត្តម អភិបាលខេត្តបានបង្ហាញក្ដីសង្ឃឹមថា ព្រឹត្តិការណ៍ម្ហូបខ្មែរខេត្តបាត់ដំបង​នឹង​ត្រូវរៀបចំឡើង​ជាបន្តបន្ទាប់ទៀតជារៀងរាល់ឆ្នាំ។

លោក អ៊ុចអ៊ុ ភីនីស្សារ៉ា ប្រធានមន្ទីរទេសចរណ៍ខេត្តបាត់ដំបង ​បានថ្លែងឲ្យដឹងថា បាត់ដំបង គឺជា​ខេត្តមួយដែលមានប្រវត្តិសាស្ត្រ វប្បធម៌ ទំនៀមទំលាប់យ៉ាងសម្បូរបែបតាំងពីដើមរៀងមក។

លោកប្រធានមន្ទីរទេសចរណ៍​ បានអំពាវនាវដល់ភ្ញៀវទេសចរជាតិ អន្តរជាតិ និងបងប្អូន​ប្រជាពលរដ្ឋ​ទាំង​អស់ចូលរួមកម្សាន្តសប្បាយ​ ភ្លក្សម្ហូបអាហារ និងភេសជ្ជៈឆ្ងាញ់ៗពិសេសៗ​ដែលមានលក់ក្នុងទឹកដីខេត្តបាត់ដំបងទាំងអស់គ្នា។

ក្នុងព្រឹត្តិការណ៍ពិព័រណ៍ម្ហូបអាហារ និងពិធីអបសាទរបុណ្យចូលឆ្នាំសាកល ​រដ្ឋបាលខេត្តបាត់ដំបង បានរៀបចំឱ្យមានការដាក់តាំងពិព័រណ៍​ផលិតផល ​ការសម្តែងសិល្បៈរបាំប្រពៃណី និងរបាំ​ប្រជាប្រិយ ការសម្តែងសៀករបស់អង្គការហ្វាពន្លឺសិល្បៈកម្ពុជា ​ការប្រគុំតន្ត្រីខ្នាតតូច-ធំ និង​ការអុជកាំជ្រួច ឆ្លងឆ្នាំ នៅរាត្រីថ្ងៃទី៣១ ខែធ្នូ ឆ្នាំ២០២២៕