ភ្នំពេញ៖ ប្រជាពលរដ្ឋមួយចំនួនរស់នៅរាជធានីភ្នំពេញ នៅថ្ងៃទី៣១ខែធ្នូនេះ បន្តដំណើរចាកចេញ​ពីរាជធានីភ្នំពេញ​ទៅឆ្លងឆ្នាំចាស់ចូលឆ្នាំថ្មី២០២៣ ​នៅតាមបណ្តាខេត្តផ្សេងៗ​ ក្នុងប្រទេសកម្ពុជា។

ពួកគាត់ បានប្រាប់BTVឱ្យដឹងថា នៅយប់នេះ ទៅឆ្លងឆ្នាំថ្មី ២០២៣ ​នៅខេត្តសៀមរាប ​បាត់ដំបង និង ព្រះសីហុនជាដើម។ ​ការទៅឆ្លងឆ្នាំថ្មី ​នាពេលនេះ ​ព្រោះស្ថានភាពជំងឺកូវីដ-១៩ ​នៅប្រទេស​កម្ពុជា​មាន​ភាព​ស្ងប់ស្ងាត់​ ​មិនរីករាលដាលដូចពេលមុន អញ្ចឹង​ទើបសម្រេចចិត្តទៅដើរលេងកំសាន្តនៅថ្ងៃឈប់សម្រាកចុងឆ្នាំ។

លោក ហេង ពន្លក អ្នកគ្រប់គ្រងទូទៅនៃក្រុមហ៊ុនកាពីតូល ​ប្រាប់BTV​ ឲ្យដឹងដែរថា ក្នុងពេល​ជិត​ឆ្លងឆ្នាំ​ចាស់ចូលឆ្នាំថ្មី ​មានប្រជាពលរដ្ឋជាច្រើន ​បាន​កក់សំបុត្រ​សម្រាប់​ធ្វើដំណើរ​ទៅតាម​បណ្តាខេត្តផ្សេងៗ ​ហើយតម្លៃរក្សាដដែល​ មិនឡើងថ្លៃនោះទេ។

បច្ចុប្បន្ន រាជរដ្ឋាភិបាលកម្ពុជា ​អាចគ្រប់គ្រងស្ថានការណ៍ជំងឺកូវីដ-១៩​បានទាំងស្រុង បន្ទាប់ពី​ជោគជ័យលើនយោបាយចាក់ស្រោចវ៉ាក់សាំងបង្ការជំងឺកូវីដ-១៩ ​ជូនប្រជាពលរដ្ឋ ចាប់ពី​ដូសមូលដ្ឋាន រហូតដល់ដូសជំរុញ។

ការជោគជ័យនេះ ​បានធ្វើឱ្យប្រជាពលរដ្ឋរស់នៅមិនភ័យខ្លាចដូចមុន ហើយអាចដើរលេងកំសាន្ត​នៅទីកន្លែងផ្សេងៗក្នុងឱកាសឆ្លងឆ្នាំថ្មី២០២៣៕ អត្ថបទ៖ទូច សោភ័ណ