សៀមរាប៖ ដើម្បីអបអរសាទរឆ្នាំចាស់ផ្លាស់ចូលឆ្នាំថ្មីឆ្នាំ២០២២ ឈានចូលឆ្នាំ២០២៣ និងដើម្បីផ្ដល់ស្នាមញញឹមដល់ប្រជាពលរដ្ឋនៅក្នុងសហគមន៍ទេសចរណ៍ វិស័យឯកជនផ្នែក​អភិវឌ្ឍន៍​គម្រោងទេសចរណ៍​ នៅក្នុងស្រុកបន្ទាយស្រី ​បានរៀបចំពិធីកំសាន្ដសប្បាយជាច្រើន នៅក្នុងស្រុកនេះ។

ពិធីនេះធ្វើឡើងនៅថ្ងៃ៣១ខែធ្នូឆ្នាំ២០២២ ដល់ថ្ងៃទី០១ខែមករាឆ្នាំ២០២៣នេះ ស្ថិតនៅក្នុងភូមិប្រីយ៍ ឃុំខ្នារសណ្ដាយ ស្រុកបន្ទាយស្រី ។

លោក ម៉េត មករា ជាទីប្រឹក្សារបស់ក្រុមហ៊ុនOASIS “អូអេស៊ីស” មានប្រសាសន៍ថា ការបង្កើត​ព្រឹត្ដិការណ៍ឆ្លងឆ្នាំនៅជនបទនេះ ​ដោយសារចង់ឱ្យប្រជាពលរដ្ឋនៅក្នុងសហគមន៍ នៃស្រុកបន្ទាយស្រី​មានស្នាមញញឹម ​មានភាពសប្បាយរីករាយ ក្នុងឱ្យកាសឆ្លងឆ្នាំ​សកលឆ្លងចូល​ឆ្នាំ២០២៣ ព្រោះប្រជាពលរដ្ឋខ្មែរមួយចំនួននៅជនបទ មិនសូវចាប់អារម្មណ៍នឹងពិធីឆ្លងឆ្នាំ​សកល​នោះទេ។

ជាមួយគ្នានេះដែរ ការរៀបចំឆ្លងឆ្នាំថ្មី រាប់ថយក្រោយ គេតែងធ្វើនៅក្នុងក្រុង ប៉ុន្ដែសម្រាប់វិស័យ​ឯកជនរូបនោះ ​គឺធ្វើឡើងនៅជនបទជិតផ្ទះរបស់ពួកគាត់ ដើម្បីកុំឱ្យប្រជាពលរដ្ឋធ្វើដំណើរ​ទៅ​ឆ្លងឆ្នាំ​សកលនៅក្នុងក្រុងសៀមរាប ព្រោះត្រូវចំណាយពេលវាធ្វើដំណើរឆ្ងាយ ហើយម្យ៉ាង​ទៀត​នៅក្រុងសៀមរាប ​នាពិធីឆ្លងឆ្នាំសកលនេះ ​មាន​មនុស្សច្រើនមកពីតាមបណ្ដាខេត្ដ ​រាជធានី ទៅ​ទស្សនាកំសាន្ដ ​បណ្ដាលឱ្យមានការកកស្ទះចរាចរណ៍។

បន្ថែមលើពីនោះ លោកក៏​ចង់បង្ហាញដល់ប្រជាពលរដ្ឋឱ្យដឹងថា ​នៅសហគមន៍ស្រុកបន្ទាយស្រី មានការអភិវឌ្ឍ​វិស័យទេសចរណ៍ ការរៀបចំកម្មវិធីកំសាន្ដសប្បាយនាពិធីបុណ្យម្ដងៗ មិនខុសពីទីក្រុងនោះទេ ។ជាពិសេសចង់ឱ្យបង្ហាញថា​ ប្រទេសកម្ពុជា ​មានសន្ដិភាព មានការអភិវឌ្ឍគ្រប់វិស័យ គ្រប់ទីកន្លែង ។

លោកបន្ដថា ​ការរៀបចំកម្មវិធីសប្បាយនេះ ​គឺជាលើកទីមួយហើយ ដោយមានរៀបចំកន្លែងរាប់​ថយក្រោយ ការបាញ់កាំជ្រួច ការប្រគុំតន្ដ្រី ​ការសម្ដែងសិល្បៈចំរៀង​ សិល្បៈកំប្លែង និងល្បែងកំសាន្ដជាច្រើនទៀត នៅក្នុងភូមិប្រិយ៍ ឃុំខ្នារសណ្ដាយ។លោកបានអំពាវនាវដល់ប្រជាពលរដ្ឋ អ្នកទេសចរមកពីតាមបណ្ដាខេត្ដផ្សេង ចូលរួមឆ្លងឆ្នាំថ្មីឆ្នាំ​សកល២០២២ ​ឈានចូលឆ្នាំ២០២២៣នេះ ឱ្យបានគ្រប់គ្នា ​នៅឃុំខ្នារសណ្ដាយ ស្រុកបន្ទាយស្រី ៕