ភ្នំពេញ៖ ប្រជាពលរដ្ឋ និងអាណាព្យាបាល នាំកូនមកចាក់វ៉ាក់សាំងដូសជំរុញ ​និងដូសទី៦ នៅ​មណ្ឌលសុខភាពឃ្មួញ ក្នុងនោះក្រុម ​គ្រូពេទ្យមណ្ឌលសុខភាពឃ្មួញ​ ខណ្ឌសែនសុខ ពង្រីកការងារផ្តល់វ៉ាក់សាំងបង្ការជំងឺកូវីដ-១៩​ ដូសជំរុញជូនប្រជាពលរដ្ឋឲ្យបានគ្រប់គ្នា ដើម្បីបង្កើន​ភាពស៊ាំសហគមន៍ឲ្យបានរឹងមាំ។

បើតាមលោកវេជ្ជបណ្ឌិត អ៊ឹង បញ្ញារិទ្ធ ប្រធានមណ្ឌលសុខភាពឃ្មួញ តាមរយៈបណ្តាញ BTV ព័ត៌មាន ​នាព្រឹកថ្ងៃទី៣១ ខែធ្នូ ឆ្នាំ២០២២នេះថា ​ដោយទទួលបានសេចក្តីជូនដំណឹងរបស់មន្ទីរ​សុខាភិបាល ​នៃរដ្ឋបាលរាជធានីភ្នំពេញ ស្តីពី៖ ការចាក់វ៉ាក់សាំងដូសមូលដា្ឋន ជូនកុមារដែលទើប​គ្រប់អាយុ ៣ឆាំ្ន និងការចាក់វ៉ាក់សាំងដូសជំរុញ (ដូសទី៣, ដូសទី៤, ដូសទី៥, ដូសទី៦ និងដូសបន្ដបន្ទាប់) ជូនដល់កុមារអាយុចាប់ពី៣ឆ្នាំ ដល់ក្រោម៥ឆ្នាំ កុមារអាយុចាប់ពី៥ឆ្នាំ ដល់​ក្រោម១២ឆ្នាំ, កុមារ-យុវវ័យអាយុចាប់ពី១២ឆ្នាំ ដល់ក្រោម១៨ឆាំ្ន និងប្រជាពលរដ្ឋមាន​អាយុ​ចាប់ពី១៨ឆ្នាំឡើងទៅ នៅក្នុងរាជធានីភ្នំពេញ ។

ក្នុងន័យនេះ ដើម្បីជំរុញការបន្តអនុវត្តន៍ "យុទ្ធនាការជាតិចាក់វ៉ាក់សាំងកូវីដ-១៩”និង“គោល​នយោបាយ​ចាក់វ៉ាក់សាំង កូវីដ-១៩ ដូសជំរុញ” ព្រមទាំងអនុសាសន៍​ដឹកនាំដ៏ខ្ពង់ខ្ពស់បំផុត​របស់​សម្ដេចតេជោ ហ៊ុន សែន នាយករដ្ឋមន្ត្រី នាថ្ងៃទី២៩ ខែធ្នូ ឆ្នាំ២០២២ ឱ្យទទួលបានលទ្ឋផលកាន់​តែល្អប្រសើរ សំដៅបង្កើត និងរក្សាឱ្យបាន "ភាពស៊ាំសហគមន៍​រឹងមាំពិតប្រាកដ យូរអង្វែង” ទប់ទល់នឹងជំងឺរាតត្បាតសកលកូវីដ-១៩។ ដូច្នេះក្រុមការងារគ្រូពេទ្យមណ្ឌលសុខភាពឃ្មួញ ​រងចាំចាក់វ៉ាក់សាំងជូនប្រជាពលរដ្ឋគ្រប់វ័យ។

សូមបញ្ជាក់ផងដែរថា កម្មវិធីនៃការចាក់វ៉ាក់សាំងបង្ការជំងឺកូវីដ-19 គឺប្រព្រឹត្តទៅជារៀងរាល់ថ្ងៃ ក្នុងនោះ ពេលព្រឹកចាប់ពីម៉ោង ៨:០០នាទី ដល់ ម៉ោង ១១:០០នាទី ​និងពេលរសៀល ចាប់ពីម៉ោង ១៤:០០នាទី ដល់ម៉ោង ១៧:០០នាទី នៅតាមទីកន្លែងដែលបាន កំណត់ជូនចំនួន៤២ទីតាំង៕អត្ថបទ រដ្ឋា