បាត់ដំបង៖ នៅក្នុងខេត្តបាត់ដំបង មានតំបន់ទេសចរណ៍វប្បធម៌ និងធម្មជាតិជាច្រើនកន្លែង ដែល​គួរជាទីកន្លែងសម្រាកលម្ហែកម្សាន្តអារម្មណ៍ក្នុងឱកាសឈប់សម្រាកអបអរសាទរពិធីបុណ្យចូលឆ្នាំសកល។

ទីតាំងទេសចរណ៍ជាច្រើន ពិសេសរមណីយដ្ឋានទេសចរណ៍បែបធម្មជាតិ ត្រូវបានតុបតែងលម្អ ត្រៀមបម្រុងសេវាកម្មនានា ​ដើម្បីទទួលស្វាគមន៍ និងបម្រើដល់ភ្ញៀវទេសចរ ។ទឹកធ្លាក់ចម្ការស្វាយ នៅស្រុកសំឡូត ជាកន្លែងទេសចរណ៍បែបធម្មជាតិគួរជាទីពេញនិយម​មួយដែល​ទេសចរគួរទៅលេង។

អ្នកស្រី ឡៅ វីន ម្ចាស់រមណីយដ្ឋានទឹកធ្លាក់ចំការស្វាយ បានថ្លែងឱ្យដឹងថា រមណីយដ្ឋាន​របស់​លោកស្រីបានត្រៀមខ្លួនរួចជាស្រេចសម្រាប់ទទួលស្វាគមន៍ភ្ញៀវទេសចរមកពីគ្រប់ទិសទីដែលមានបំណងដើរលេងកម្សាន្តអមដោយកម្មវិធីសប្បាយៗជាច្រើនក្នុងឱកាសបុណ្យចូលឆ្នាំថ្មី ឆ្នាំសកល២០២៣។

ភ្ញៀវទេសចរមកពីក្រៅខេត្ត និងក្នុងខេត្តបាត់ដំបង បានលើកសរសើរមិនដាច់ពីមាត់ថារមណីយដ្ឋាន​ទឹកធ្លាក់ចំការស្វាយ ​ជាកន្លែងទេសចរណ៍ស្រស់ស្អាតដ៏គួរជាទីចាប់អារម្មណ៍ ​មានទីធ្លាធំទូលាយ ទឹកថ្លាស្អាត​គ្រប់រដូវ សេវាកម្មរហ័សទាន់ចិត្ត ​បុគ្គលិក​មានភាព​រួសរាយ​រាក់ទាក់ ម្ហូបអាហារ​មាន​តម្លៃសមរម្យ ជាពិសេសសន្តិសុខសណ្ដាប់ល្អប្រសើរ។

សូមបញ្ជាក់ថា ទឹកធ្លាក់ចម្ការស្វាយ ​ជាប្រភេទរមណីយដ្ឋានទេសចរណ៍ធម្មជាតិកែច្នៃ មាន​ទីតាំងស្ថិតនៅ ភូមិព្រៃស្ដៅ ឃុំមានជ័យ​ ស្រុកសំឡូត ​ខេត្តបាត់ដំបង និងមានចម្ងាយជាង៦០គីឡូម៉ែត្រពីក្រុងបាត់ដំបង ។

សកម្មភាពកម្សាន្តនានាក្នុងរមណីយដ្ឋាននេះ មានដូចជា៖ ការកម្សាន្តតាមចម្ការ ពិសេសរដូវផ្លែ ឈើ ការងូតទឹកកម្សាន្ត ​ការពិសារអាហារនៅមាត់ទឹក​ ការសម្រាកលម្ហែ ​ការលេងកីឡាលើទឹក ការជិះទូក កៃយ៉ាក់​ និងការបោះតង់ ​ជាមួយទេសភាពស្អាតៗ ម្ហូបឆ្ងាញ់ ​កន្លែងគេងក៏ស្អាត ៕