បន្ទាយមានជ័យ៖ ឯកឧត្តមទេសរដ្ឋមន្រ្តី គន់ គីម អនុប្រធានទី១ គណៈកម្មាធិការជាតិគ្រប់ គ្រងគ្រោះមហន្តរាយ ​បានថ្លែងថា មន្ត្រីជំនាញពាក់ព័ន្ធ ​និងអាជ្ញាធរខេត្តបន្ទាយមានជ័យកំពុង ធ្វើការស៊ើបអង្កេត ករណីអគ្គិភ័យឆាបឆេះកាស៊ីណូ នៅក្រុងប៉ោយប៉ែត បណ្ដាលឲ្យ មាន​មនុស្សស្លាប់ និងរបួសជាង ១០០នាក់ ។

ក្នុង​សន្និសីទ​សារព័ត៌មានស្តីពី ​លទ្ធផលរុករក និងសង្គ្រោះ ​ចំពោះមនុស្ស ឬសាកសព ក្នុងគ្រោះ​អគ្គិភ័យនេះ នៅថ្ងៃទី៣១ ខែធ្នូ ឆ្នាំ២០២២ ឯកឧត្តមទេសរដ្ឋមន្ត្រី ​មានប្រសាសន៍ថា ជា​លទ្ធផល​ចុងក្រោយ​អ្នកស្លាប់មានចំនួន ២៦នាក់ និងមនុស្សប្រមាណ​ ១០០នាក់ រងរបួសធ្ងន់ស្រាល និង​មានអ្នកចេញពីមន្ទីរពេទ្យបណ្ដើរៗហើយ មិន​មានបញ្ហាប្រឈមរហូតដល់ស្លាប់​ នោះទេ ប៉ុន្តែមានម្នាក់​រងរបួសខ្លាំងពេក ​និងបានស្លាប់ពេលបញ្ជូនទៅដល់មន្ទីរពេទ្យ ។

ឯកឧត្តម បានបន្តថា ចំពោះករណីនេះ មន្ត្រីជំនាញ ​និងអាជ្ញាធរ​កំពុងធ្វើការស៊ើបអង្កេត ហើយ​បញ្ហា​សំណង់ ​ខាងអាជ្ញាធរត្រូវ​ពិនិភាក្សា ​ដើម្បីដោះស្រាយ​ជាមួយភាគីក្រុមហ៊ុន ​ចំពោះ គណៈកម្មាធិការជាតិ​គ្រប់គ្រងមហន្តរាយ ​គឺ​បញ្ចប់ត្រឹមការជួយរុករកនេះ ។

ឯកឧត្តមអនុប្រធានទី១ ​បានបន្ថែមថា នៅមុនពេលកើតហេតុ ​មាន​បុគ្គលិក​ធ្វើការជាង ​៤០០នាក់ និងមានអ្នកចូល​លេងល្បែង​ក្នុង​កាស៊ីណូ​នេះ​ជាច្រើនរយនាក់ ​ក្នុង​ពេល​ឆេះបាន​រត់ចេញ ហើយអ្នក​ស្លាប់​គឺ​កំពុង​ដេក​លក់ក្នុងបន្ទប់ និងអ្នកខ្លះស្លាប់​ពេលរត់ចេញពីបន្ទប់​ ខណៈ​ស្ថានភាព​ភ្លើង និង​ផ្សែងខ្លាំង ​ធ្វើ​ឲ្យ​អ៊ុកស៊ីហ្សែនខ្សោយ ។

ជាមួយនេះ​ឯកឧត្តមទេសរដ្ឋមន្ត្រី ​បានបញ្ជាក់ថា ​កម្លាំងរុករកបាន​បិទ​បញ្ចប់​ទាំងស្រុង ​ហើយ បន្ទប់​ពីបាន​ខិតខំស្វែងរកជនរងគ្រោះ ​ក៏ដូចជាឆ្លើយតប​នឹងសំណូមពររបស់ពលរដ្ឋ ដែលជា​គ្រួសារ​បុគ្គល​ធ្វើការ​ក្នុង​កាស៊ីណូ ​បាន​សង្ស័យថា ​មានជាប់នៅតាមបន្ទប់នោះ ។

គួរបញ្ជាក់ថា ​កាលពីយប់ថ្ងៃទី២៨ ​ឈានចូលដល់ថ្ងៃទី២៩ ​ខែធ្នូ ឆ្នាំ២០២២ ​មាន ករណីឆេះ​អគារ​កាស៊ីណូឈ្មោះ​ ហ្គ្រេនដាយមិន​ កម្ពស់ជាង​១០ជាន់​ ស្ថិត​ក្នុងក្រុងប៉ោយប៉ែត បង្កឲ្យមាន​ការភ្ញាក់​ផ្អើលជាខ្លាំង ​ហើយមាន​កងកម្លាំងជាច្រើនរយនាក់ ​ដែលមានខ្មែរ ​និងថៃ​ បាន​ជួយអន្តរាគមន៍ ៕